"Сылнылык тӱня" рубрик, 2016 ий, Сӱрем тылзын 5-ше кечыже

Кужу ӱпым да пондашым лӱмынак куштен

Статьян авторжо Татьяна Иванова

М.Шкетан лӱмеш Марий театрын актержо Алексей Юнусов дене кеҥеж гастрольыш миен толмыж деч вара мутланышна. Тудо “Роза-Розмарий” спектакльыште тӱҥ рольым модын. юнус5
Алексей Курыкмарий районысо Йоласал (Еласово) селаште шочын, тысе школышто 11 классым тунем лектын. Школышто театральный да куштымо кружок-влак лийыныт. Рвезе театр кружокыш коштын, тӱрлӧ йомакым шынденыт, оҥай рольым модын. Классым вуйлатыше Светлана Николаевна Петрова ты постановкым шынден, Алексейлан “Красная шапочка” йомакыште Пирым модаш ӱшанен. Тиде Алексейын икымше рольжо лийын. Тыгодымак рвезе танцевальный кружокыш кошташ кумылан лийын. Тудым вӱдышӧ Валерий Митрусков Алексейын усталыкшым ужын, кушташ ӱжын. А туныктышыжо вес кружокыш колташ тореш лийын улмаш. “Тыгай хулиганым тушко огыт нал” манын. Аваже Маргарита Никоноровна Юнусован тыршымыжлан кӧра рвезе содыки кушташ кошташ тӱҥалын. “Школышто ме чӱчкыдын куштенна. Эре концерт дене коштынна. тӱрлӧ конкурсыш коштынна. Эсогыл мыйын нерген мокталтен районысо газетышкат возеныт ыле. Моткоч куаненам, кугешнен колтенам. Кугурак лиймем семын усталык илыш деч кораҥынам, кидпашалан шӱмаҥынам. Ынде столярын мастарлыкшылан Йоласалысе 29-ше номеран СПТУ-што тунемынам, туштак ачам Валентин Иринархович пашам ыштен”, — палдарыш Алексей Юнусов. Тыге тудо пу гыч тӱрлӧ фигурым пӱчкеден, арверым ыштен. Кыдалаш школым тунем лекмекыже, кушко тунемаш каяш, йӧршын пален огыл. Курыкмарий театрын артистше-влак толынытат, чапле спектакльым ончыктен кодышт. Алексейын кумылжо нӧлталтын, И.Палантай лӱмеш тӱвыра да сымыктыш колледжыш театр пӧлкаш тунемаш толаш шонен пыштен.

«Тунемаш 12 еҥ пурышна, визытын гына пытарышна: ныл ӱдыр да мый. Чыла пӧръеҥ рольым модынам. Мастарлык да сценыште мутланымаш предмет дене педагог-влак М.Шкетан театрын артситше-влак Светлана Строганова ден Марина Почтенева лийыныт. Ик спектакльыште колышо еҥын рольжым модынам. Ыресыште шагатат пеле пуйто кеченам, пеш неле ыле. Тыге кажне гана лийын. Икана ик гастроль деч вара черланенам, кокыраш тӱналынам. Теве спектакль кая. Кокыртыш толын. А мый колышо улам, шкат умыледа, кокыралташ огыл, тарванылаш ок лий. Пыкше чытенам, шагатат пеле жап тугай кужун чучын. 2012 ийыште, колледжым тунем лекме деч вара, Москасе М.Щепкин лӱмеш кӱшыл театр училищыш тунемаш пуренам. Кум турым эртенам, почеламутым лудынам, муралтенам, мом кӱштымыштым чыла ыштен ончыктенам. Мо оҥайже, могай артистым паледа манмылан чылан гаяк Сергей Безруковым ойленыт. Москаште тыршен тунемынна», — умбакыже ойла Алексей.
Тудо сценический движений ден фехтований предмет-влакым эн чот йӧратен. Тунам 4-ше курсышто шпаге дене номерым шынденыт да курсышто тунемше рвезе-влак Москваште эртыше тӱнямбал фестивальыш ушненыт да икымше верым налыныт. Туддек Ленкомын артистше Дмитрий Певцов миен да «Молодец, пеш чаплын фехтоватлен моштет» манын, «Эн сай кучедалмаш» номинацийыште сеҥымылан грамотым кучыктен.
Алексей Юнусов «Русский секрет» спектакльыште Кисельврод немычым модеш. М.Горькийын «Мещане» пьесыж почеш шындыме постановкышто священник лийын. Ты образыште шкенжым шижаш манын, лӱмынак пондашым да ӱпым куштен. Рольжо-влак улыт, теве «Кожла кокласе омышто» — йыргешке пурса пырче, Роза-Розмарийыште» — Петруш. «Гастроль годым чыла вере сайын вашлийыныт. “Роза-Розмарий” оҥай спектакльым воштыл-воштыл онченыт. Южгунамже шкежат модмем годым чуч воштыл колтен омыл», — манеш артист Юнусов.
Алексейын усталыкше, чатката кап-кылан улмыжо, шкенжым сценыште моторын кучен моштымыжо да ончаш толшын кумылым савырен моштымыжо ончыкылык корныжым волгалтарат, шонем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: