"Кузе илет, ялем?" рубрик, 2016 ий, Сӱрем тылзын 22-шо кечыже

Курыкмарий районын ик эн кугу селаже

Статьян авторжо Ирина Ямбаршева

в08 в09Тиде села — Виловат — Козьмодемьянск – Чебоксар кугорно ӱмбалне, Козьмодемьянск деч 25 меҥге тораште, шинча.
Шукерте ожно ты села гоч Сибирьыш кайыме корно улмаш. Исторический документыште возымо почеш, 1717 ийыште тышеч екатерининский тракт шуйнен. Села олмышто ссылкыш колтымо еҥ-шамычым да нуным оролышо-влакым вераҥдаш икмыняр оралтан ямской станций лийын. Сандене тиде села ончычшо Этапный маналтын. Тысе вершӧр шаньык гай койшо кум келге кореман улмыжлан кӧра кызытсе села олмысо ялым Виловатый Враг манын лӱмденыт. Изиш варарак тышан почтовый станцийым чоҥеныт. Озаҥ могырыш кайышыштла, 1798 ийыште тышакын Россий император Павел I Александр да Константин эргыже-влак дене кечывал кочкышым ышташ шогалыныт. 1833 ий 4 сентябрьыште руш поэт А.С.Пушкин Урал да Юл кундемыште Е.Пугачёв восстаний нерген материалым погымыж годым тыште имньыжым вашталтен, канен.
в06Легенде почеш, селаште эн ончыч руш отставной салтак Иван Рубейкин илаш тӱҥалын. Тудо казарме пеленысе памаш воктене илыме пӧртым ыштен. Вес легенде почеш, тыштак Сатай лӱман ик марий илаш тӱҥалын. Сандене Виловатым шоҥгырак марий-влак Сатсола маныт. Туге гынат таче кечылан Виловат села лӱм официально руш мутвож гыч шога. Но каласаш кӱлеш, шуко марий кызытат шке тукым вожшым арален коден. Мутлан, Эшполдин, Яшмолкин, Яштыков, Сидушкин, Саватеев, Салдаев, Акпарсов да молат улыт.
в01Таче кечылан Виловат селаште 447 суртышто 1301 еҥ ила. Кум пачашан школышто кумшӱдӧ наре тунемше шинчымашым пога. «Петушок» лӱман йочасадыш 150 наре икшыве коштеш. Тылеч посна тыште амбулаториян эмлымвер, почто да аптеке улыт. Тысе тӱвыра полат сӧралже да пашаж дене республик кӱкшытыштӧ чапым налше учрежденийлан шотлалтеш.Тыштак библиотеке верланен. Стадионат воктенак. Кызыт тыште кугу да чапле культурно-спортивный комплекс чоҥалтеш.
Села калык мланде паша деке утларакшым шӱмаҥын, пакчасаскам ончен кушта. Ковышта, пареҥге, кешыр да ушмен сайын шочмылан кӧра ешартыш парышым налаш йӧн лектын. Олма, сливе да вишне сай лектышым пуат.
Иван РЕЧКИН.
Авторын фотожо-влак.

в04 В12

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: