"Улам мый Рве-зы-лык!" рубрик, 2016 ий, Сӱрем тылзын 22-шо кечыже

Кушташ изи годсек йӧрата

Статьян авторжо Марина Богданова

Лариса Ипулаева

Марий кугыжаныш университетыште чолга, усталык шӱлышан, пӱсӧ уш-акылан ӱдыр-рвезе-влак тунемыт. Нуно сайын тунемыт веле огыл, а тӱрлӧ вере шке мастарлыкыштым нӧлтат. Калыкле тӱвыра да тӱвыра кокласе кыл институтын 2–шо курсшым тунемын пытарыше Лариса Ипулаевам поснак палемден кодаш лиеш. Тудо университет пеленысе «Марий мурсем» ансамбльын уста куштызыжо.

Лариса — Пошкырт кундемын шочшыжо. Йоча жапше Караидель районысо Шопкер ялыште эртен. Ты районышто утларакшым татар-влак илат, сандене тудо йоча годсек татарла сайын мутланен мошта. Районышто куд марий ял уло, а эн кугулан Ларисан Шопкер ялже шотлалтеш. Ял чодыран, курыкан кундемыште верланен. Тудо изиж годсек пӱртӱс деке мелын кушкын, моторлыкым, сӧраллыкым чонжо дене шижын моштен. Лывырге кид-йолан ӱдыр кушташ йӧрата.

Ларисан тукымыштыжо шуко туныктышо уло.

«Ачам вел гыч кугезе кочам ден ковам туныктышо лийыныт. Кочам биологий ден химийым туныктен. Авам велымат ты профессиян еҥ-влак улыт. Ачам ондак марий йылме ден литературым шкенан школышто туныктен, кызыт Подлубово ял шотан илем вуйлатышылан пашам ышта. Авам школышто руш йылме ден литературым туныкта да Шопкер школын директоржылан ышта. Чаманаш логалеш, кызыт школышто 9-ше класс марте веле тунемыт», — манеш тудо.

Ларисан 1 гыч 11 класс марте тиде школышто тунемын.

 «Икымше классыш тунемаш кайыме годымак школ пеленысе «Изи оҥгыр» образцовый ансамбльыш сералтынам. Тудым икымше туныктышем Надежда Андреевна Салиева вуйлатен. Кушташ да мураш туныктымыжлан тау шомакым ойлыде ом керт. Тушто татарла, рушла, марла куштенна. Ме шкенан школышто веле огыл, а Пошкырт кундемысе шуко районышто концертым ончыктенна, тыгодым тӱрлӧ степенян дипломым, лауреат лӱмым налынна. Ансамбльышке тӱрлӧ ийготан йоча-влак коштыныт, сандене ме кум тӱшкалан шелалтынна. Тиддеч посна школышто тӱрлӧ спектакльым шындыме. Нунын кокла гыч «Пеледыш пайрем», «Шорыкйол», «Шонанпыл», «Ӱярня» постановко-влакым кызытат сайын шарнем. Кушкын шумеке, ялысе тӱвыра пӧрт пеленысе «Ший памаш» фольклор ансамбльыште кушташ тӱҥалым. Ондак ачам ден авам ты ансамбльышке коштыныт. Тудым Башкортостан Республикысе тӱвыран сулло пашаеҥже Эмма Алексеевна Салиева вуйлата. «Ший памаш» ансамбль дене Пошкырт кундемысе тӱрлӧ районлашке, олалашке концерт дене коштынна. Шочмо верыш канышлан пӧртылмӧ годым тушко миен толам, кӱлеш годым пырля концертыште мурем-куштем. Спектакльым, дискотеке-влакым эртараш полшем», — каласкала Лариса.

Школ деч вара Марий кундемышке кӱшыл шинчымашым налаш толын. Тудо этнокультурный рӱдерым вуйлатышылан тунемеш. Лариса студент пагытым веселан, пайдалын эртара. Тунемме деч посна тӱрлӧ мероприятийлаште, конкурслаште участвоватла да университет пеленысе «Марий мурсем» фольклор ансамбльыште мура, кушта. Концерт дене тӱрлӧ районлашке лекме годым вӱдышӧ сомылымат шукта.

Лариса — творческий кумылан ӱдыр. Ӱдырын илышыштыже куштымаш рӱдӧ верым налеш манына гын, йоҥылыш огына лий. Куштымаш неле-йӧсым сеҥаш полша, ончыко каяш вийым пуа. Л.Ипулаева эше магистратурышто, аспирантурышто тунемаш шона.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: