"Рубрик деч посна", 2016 ий, Сӱрем тылзын 1-ше кечыже

Марий солык – ӱдырамашын йӱд омыжо

Статьян авторжо Марина Богданова

Республикысе «Саскавий» марий ӱдырамаш ушемын еҥже-влак «Марий солык» конкурсым эртареныт.

пеледыш7Тушто марий ӱдырамашын кидпашалан мастар улмыжым, чолгалыкшым, марий йӱлам сайын палымыжым онченыт. Марий солык калыкнан илышыштыже рӱдӧ верым налеш. Кажне марий солык шкешотан лийын, тудым тӱрлӧ вере кучылт моштеныт. Южыжо ю шӱлышанат лийын. Ожно кугезе кована-влак шуко солыкым тӱрленыт. Тунам марлан кайыше ӱдырлан мыняр солыкым ямдылашыже логалын! Республикын индеш районжо гыч конкурсант-влак лийыныт. Чылаже 10 еҥ тӱрлымӧ солыкшым ончыктен. Жюриште культурологий науко доктор Г.Е.Шкалина, «Саскавий» ушемын еҥже, ончычсо туныктышо З.С.Артюшкина, историй науко кандидат, МарНИИ-н пашаеҥже Т.Л.Молотова шинченыт.

Тушто кинде-шинчал, сӱан, онапу, юмылук да моло солык нерген шуко уым пален налаш  лийын. Кажне солыкышто марий калык посна тӱрым, тӱсым кучылтын, тыгодым нуно мом-гынат почын пуэныт. Теве Звенигово районысо Кужмара тӱвыра пӧртын вуйлатышыже Галина Алексеевна Щеглова кинде-шинчал солык деч посна мужедме, кепшылым руымо, рвезылан армийыш ужатыме солыкым ончыктен, нунын нерген кумдан каласкален. Солык-влакым ожно кузе кучылтмым модын ончыктеныт. Шернур кундемын палыме тӱрлызыжӧ Лидия Васильевна Веткина онапу солык дене палдарен.

«Онапу солыкым аҥысыр вынер куэм гыч ыштеныт. Солыкын тупынь велже гыч утларакшым йошкар меж шӱртӧ дене тӱрым тӱрленыт. Тиде солыкышто ромб дене кечын символжым ончыктымо. Онапу солык Агавайрем Кугу Юмылан, Агавайрем Юмын Авалан пӧлеклалтын. Ялышке марлан толшо у шешке-влак Агавайремышке Онапулан тӱрлымӧ солыкым луктыныт. Карт кугыза онапушко сакаш, иктаж у шешкын эн мотор тӱрлеман солыкшым ойырен налын гын, тудо шешкылан да ешыжлан пеш кугу пиал лийын, ты шешке кугу пагалымашым сулен. Солыкым онапу йыр кылден сакен, уло ял калыклан сай, улан илышым, пеҥгыде тазалыкым йодыныт да вес ийын Агавайрем пайремыш тыгак лекташ надырлен сакеныт», — каласкала Лидия Васильевна.

А юмылук солык нерген Советский район гыч Галина Николаевна Волкова каласкален.

Морко район Эҥерсола ден Октябрьский тӱвыра пӧрт-влакын пашаеҥышт тӱрлӧ марий калыкын тӱрлӧ солыкшо нерген умылтареныт. Тыгодым Морко сӱан куштымаш ден мурымашым ончыктеныт.

Кажне участнице кид мастарлыкшым, пӱсӧ уш-акылжым, усталык койышан улмыжым сценыште ончыктен. Тыге икымше вер дене Морко район Эҥерсола да Октябрьский тӱвыра пӧрт-влакын пашаеҥышт палемдалтыныт, кокымшо верым Советский район гыч Галина Николаевна Волкова налын, а кумшым — Марий Турек кундем гыч Таисия Ивановна Чупракова.

Тыгай конкурсым эртарыме дене «Саскавий» марий ӱдырамаш ушем моткоч пайдале пашам ыштен. Вет кызыт самырык-влак тидын шотышто шагал палат. Тушто самырык еҥлан шуко уым пален налаш йӧн лийын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: