"Ме марий улына" рубрик, 2016 ий, Сӱрем тылзын 1-ше кечыже

Марий ӱдыр эн мотор

Статьян авторжо Денис Очиев

пеледышПеледыш пайрем годым марий шӱлыш рӱдолаштына ойыртемалтынак озаланен. Пайремым сылнештарышыже марий ӱдыр-влак лийыныт: марий вургеман, пеледыш гай чечен. Нунын кокла гыч икмынярыже Йошкар-Оласе каныме рӱдӧ паркыште шке мастарлыкшым да чолгалыкшым «Марий ӱдыр» конкурсышто терген.

Ты конкурсышто куд еҥ участвоватлен. Нунын коклаште школышто тунемшат, студентат да марлан кайышат самырык-влак лийыныт. Ӱдыр-влак шке моштымыштым ныл этапыште ончыктеныт.

«Визиткыште» участник-шамыч шкешт дене палдареныт. Ӱдыр-влак тидым оҥайын ыштеныт. Шернур район гыч Екатерина Актуганова кӱсле сем почеш, шке шочмо Кукнур кундемжым мокталтен, шкеж нерген каласкален. Провой кундем гыч Ксения Юркинан артист койышыжо вигак шижалтын, шке визиткыштыже мыскара йӧн дене мутым шуен:

- Шочын вочмекем, авам деч вигак марлан каяш йодынам, а тудыжо умшаш чызашым гына чыкен пуэн, — ойлен К.Юркина.

Сценыште ӱдыр-влакын тургыжланымышт шмжалтын гынат, тидыже конкурслан эше лыжгарак сӱретым веле пуэн.

Лотерей дене шуко оксам сеҥен налат гын, мом ыштет ыле? Тыгай йодышым конкурсын кокымшо этапыштыже кажне участниклан пуэныт. Ӱдыр-влакын поро улмышт койын: йочапӧртыштӧ илыше икшыве-влаклан полшаш шонышо-шамыч лийыныт. Мыскара сынан вашмут йоҥген: «Пеледыш пайремым умбакыже шуем ыле» але Шернур районышто чыла корным тӧрлаш шонышат лийыныт.

Кажне участникын моткоч сылне йӱкан. Тидыже «Муро» этапыште койын. Оршанке районын ӱдыржым Елена Матвеевам, палемдыде кодаш огеш лий. Тудо гармоньым шоктен марий мурым йоҥгалтарен. Конкурс вальс дене мучашлалтын. Ӱдыр-шамыч ончаш толшо-влак кокла гыч иктажым ойырен налын куштеныт. Жюри нунын чолгалыкыштым тыштат терген ончен.

Сеҥыше-влак: Гран-При — Екатерина Актуганова (Шернур район), I вер — Ксения Юркина (Провой кундем), II вер — Елена Матвеева (Оршанке район), III вер — Альбина Мартьянова (Морко район).

Марий ӱдыр — чынак мотор да чолга ӱдыр. Ӱшаныме шуэш, вес Пеледыш пайремыште кажне район да вес регионла гычат участник-влак лийыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: