"Кидмастар" рубрик, 2016 ий, Сӱрем тылзын 22-шо кечыже

Кидпаша неле годым илен лекташ полшен

Статьян авторжо Анастасия Эманова

Кидмастар Нурфия Масхудовна Желонкина куэ кумыж гыч сӧрастарыме ӱзгар-влакым, сувенирым ыштылеш, тӱрлӧ тӱсан меж гыч сӱретым ямдыла да чыла тидлан йоча-влакым туныкта. Поро ӱдырамаш дене шукерте огыл Йошкар-Олаште Самырык-влакын кечыштым палемдыме годым кидпаша ярмиҥгаште палыме лийынна. Тудын пашаже-влакым налаш кумылан-влак шукын лийыныт. Национальный орнаментан суксо сувенир мыланем поснак чот келшен. Шкешотан аралтышым мыят налде шым чыте.

Диана уныкаж денеНурфия Масхудовна Йошкар-Олаште шочын. Кидпашалан 90-ше ийлаште кумылаҥын. “Перестройко годым шуко еҥ паша вер деч посна кодын. Неле пагытыште илен лекташ тӱрлӧ йӧным кычалме. Лач тунам Йошкар-Оласе инвалид обществыште уа дене пидме шотышто курс нерген пален налынам. Тушко икмыняр ӱдырамаш дене пырля кошташ тӱҥалынам, но вара туныктышо каен да мыланна шке гыч тунемаш книгам пуэныт. Тыге шке гыч эркын-эркын уа гыч пидаш тунемынна. Кидпаша мыланем кеч изи гынат, оксам ыштен налаш полшен да чонем луштарен. Вара 1993 ийыште Дубки микрорайонышто “Гармония” сымыктыш да ремесло йоча школ почылтын. Тушко мыйым туныкташ ӱжыныт. Эн ончыч уа гыч тӱрлым ышташ тунемме, вара чаганшудо (рогоза) да кумыж гыч. Шукерте огыл куаш кумылаҥынам.

Ик кидпаша техникылан тунеммеке, весым палыме шуэш. Мастарлыкым эре нӧлтыман. Интернетыште иктаж мастер-классым ончем, вара шке гыч ышташ пижам. Пашам-влак тӱрлӧ улыт. Марий Элыште илена, садлан ятыр изделийым национальный орнамент-влак сӧрастарат”, - ойла Нурфия Масхудовна.

Кидмастар мастарын сӱретла. Сӱретшым тӱрлӧ тӱсан меж дене “чиялта”. “Меж акварель – декоративно-прикладной творчествын видше. Тыгай паша-влак сайын аралалтыт да пеш моторын койыт. Чия семынак тӱрлӧ тӱсан межым вашла вараш лиеш. Эн ончыч сӱретын фонжым “чиялтыман”, а вара шке сӱретым ыштыман, ӱмбакше ӱплан лакым изиш шыжыктыман. Ямде картиным рамыш келыштарыман. Изирак картиным кум-ныл кечыште ышташ лиеш”, - каласкала Н.Желонкина.

20160624_135600Нурфия Масхудовна изинек творчествылан кумылан кушкын, но художественный образованийым кушто налаш лийме нерген пален огыл, адакшым тунам паша профессий утларак аклалтын. “Йоча шонымашем Елена ӱдырем шуктен, манаш лиеш. Тудо Йошкар-Оласе художественный училищым да Чуваш кугыжаныш педагогический университетысе художественно-графический факультетым тунем пытарен. Кызыт художник-дизайнерлан пашам ышта. Диана уныкамат – уста ӱдыр. Кумыж гыч кидшолым ышташ йӧрата, шкеак дизайным шона”, - ойла кидмастар.

Н.М.Желонкина шуко конкурсышто, мутлан, “Русь 20160624_135654мастеровая” Россий конкурсышто, выставкылаште участвоватлен. Пашаже-влаклан эре кӱкшӧ акым пуат. Арам огыл тудо РМЭ Правительствын “Душа народа” премийже дене палемдалтын. Нурфия Масхудовнан ныл персональный выставкыже эртаралтын. Тудо РМЭ-н калык мастарже. “Кеч-могай пашам кыртмен, чонем пыштен ыштем. Кызыт интернет вияҥме дене прикладной творчествылан тунемаш йӧн шукырак. Ыштышашлык пашам, шонымашем моткоч шуко. Жап гына шагалла чучеш, самырыкрак лияш ыле манын шонем,” — манеш Н.Желонкина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: