"Кузе илет, ялем?" рубрик, 2016 ий, Сӱрем тылзын 15-ше кечыже

“Мӱкш мыйым эмла”, — манеш суртоза Михаил

Статьян авторжо Татьяна Иванова

Кеҥежын рӱдыжат лишеме. Пуйто шукерте огыл, лачшым гын, чевер шошо кечын, Морко районысо Чодырасола ялыште Апакаевмыт еш мемнам кугу уна гай вашлие. Тушто подписке кампаний кайыме годым лийынна. Тунам капка ончылно толмынам озавате Зоя Апакаева вучен, шкеж дек пуртыш да вигак пакчашке наҥгайыш. “Миша пелашем ялышке толмыдам колынат, моткоч вуча”, — мане Зоя Ивановна. Почешна пошкудо-влак пурышт, а пакчаште, кочаж воктен изи уныкаже, Настюша, шогылтеш, кочаж йыр мӱкшиге гаяк пӧрдеш.

Апакаевмыт еш мӱкшым ончаш йӧрата. Пакчаште 57 омарта уло. Лачак вощиным шупшмо жап ыле. Михаил Апакаевым шке кундемыште уста связист семын палат. Ынде ик ий утла тазалыкше начар, тудым Мукшызопаралич перен. Туге гынат Михаил Михайлович неле черлан шкенжым сеҥаш ок пу. “Ачам ӱмыр мучко отарыште тыршен, мемнам мӱкшым ашнаш туныктен. Кызыт мыланна Сергей эргына моткоч полша. Шкеже ешыж дене Моркышто ила, тудо военный. Советский районысо Ясный поселкыш шумеш пашаш кудалыштеш. Паша деч вара вигак мӱкш пакчаште сомылым шукта. Тыгак Алеша кресэргым мыланна моткоч полша. Шкеже тояш чараклен ошкылам, пӱкеныш шинчын, мом ышташ кӱлмым ойлем, тыге пырля кугу мӱкш ешнам ончена”, — мане Миша изай. Тоя полшымо дене ошкыл колтыш да омарта-влак воктеке лишеме. “ Мӱкшым ончымо шуэш”, — угыч каласыш.

Апакаевмыт ныл икшывым куштеныт, шым уныкашт уло. “Кугарня” газетнан эртарыме “Воштылаш, товатат, сулык огыл” мыскара конкурснан ик участницыже – Наталия Алексеева – Апакаевмытын кугурак ӱдырышт. Тудо Морко эмлымверыште медсестралан пашам ышта. Тыгак Морко калык театрыште модеш. Вес ӱдырышт Ольга — продавец, а Юра Козьмодемьянскыште ила. “Марлан толмешкем мӱкшым ужын омыл, мӱйым кочкын омыл, ”- манеш Зоя Ивановна. Эре поварлан, столовый вуйлатышылан пашам ыштен, “РСФСР-ын пашан ветеранже” лӱм дене палемдалтын. Морко районысо Макарсола гыч Чодырасолашке Мишалан 24 ияш улмыж годым марлан толын. Пӧртым чоҥеныт да пакчаштым мӱкш отарыш савыреныт. Сад лоҥгаште мӱкш-влак ызгат, мӱйым погат. Кажне омартажын шке номерже уло. “Ӱмаште, 25 майыште, пелашем, пашаш каяш лекше, кенеташте кертдыме лие. Тымарте ниможат корштен огыл, эре йолӱмбалне шогылтын, телефон меҥгышкат кӱзен. Очыни, илышаш кечыже лийын, мӱкш-влак пиал дене илен кодын, кызыт тазалыкше эркын саемеш. Миша 8 мартыше 60 ийым темыш. Шошо толмым чот вучен, кече дене пырля кынелеш, вигак пакчашке эркын ошкылеш, пӱртӱс дене пырля чонжым куандара”, — ойла Зоя Ивановна.

Икте-весыштым тунар пагалат, ончен шерет ок тем. Михаил Михайлович дене туткар лиймеке, Зоя акай паша гыч лектын. “Зоюкем мыйым мӱкш полшымо дене эмлаш тӱҥалын. Паралич перыме могырыш мӱкшым шынден. Ондак нимом ом шиж ыле, вара пӱшкылмӧ вер вийым пуаш тӱҥале. Мыйым мӱкш эмла”, — каласыш Михаил Апакаев.

Фотокорреспондент Иван Речкин ятыр фотом ыштыш. Иктыже весыж деч мотор, пуйто кече шыргыжеш, тугай чуриян лектыч, газет лаштыкышкына кудыжым савыкташат, ӧрат. Зоя акай ден Миша изай, тек чевер кече семын илышда волгалтеш, ӱшаным, вийым пуышо, тазалыкдам пеҥгыдемдыше мӱкш ешда ӱмыргорныдам шуйдара.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: