"Рубрик деч посна", 2016 ий, Сӱрем тылзын 29-ше кечыже

Наркотик шотышто 1125 йочам йодыштмо

Статьян авторжо Светлана Кушакова

Кызыт самырык-влак коклаште спайсын (наркотикан шупшмо вартыш) шарлымыже кугу тургыжланымашым луктеш. Тудо самырык тукымын психикыжлан да физически вияҥмыжлан эҥгекым ышта.

Спайс (англичан йылме гыч “специй, пряность” манын кусаралтеш) – шупшмо вартышын ик видше. Тӱрлӧ шудым виян химический вещества, синтетический каннабиноид, дене варен ужалат. Действийже марихуанын гай.

Садлан ты проблемым сайынрак шымлаш манын, Роспотребнадзорын республикысе управленийже йоча-влак коклаште анкетированийым эртарен. Тушто 9-11 класслаште тунемше 1125 йоча коло йодышлан вашештен.

Иктешлаш гын, “Мо тыгай спайс, паледа мо?” йодышлан вашмутым пуышо кокла гыч ик кумшо ужашыже синтетический наркотик семын палемден. Наркотик шотышто информацийым тунемше-влак Интернет гыч утларак (46 %) пален налыт, 22 % — йолташ-влак деч.

Ийготыш шудымо йоча-влак кокла гыч 2 % лӱдыкшӧ радамыш логалыт. Нуно наркотик дене пайдаланыше еҥ-влак дене кылым кучат.

Могай социальный средаште улмымат пален налме. 71% тунемше наркотик дене аяргыше еҥым ужын огыл, 17 %-лан тыгайым ужаш оҥайла чучын, 9 %-лан наркотикым тамлен ончашат темленыт. Палемдыман, оласе йоча-влак тидын дене чӱчкыдынрак тӱкнат. Волжский, Советский, Морко районлаште Козьмодемьянск олаште тыгайже лиеден.

Куандара, 99 процент подростко икганат спайсым тамлен ончен огыл манын вашештен. А тамлен ончаш кайфым пален налаш шонымо тарата.

Спайсым кушто налаш лиеш шотышто 82 % палыдымыжым ончыктен. А Волжскышто, Козьмодемьянскыште, Йошкар-Олаште, Морко, Параньга, Юрино, Шернур, Советский районлаште наркотикым муаш куштылгырак улмаш.

Наркотикын тазалыклан эҥгекым кондымыж шотыштат подростко-влак сайын палымыштым ончыктеныт.

Анкете-влакым шымлен лекмеке, каласаш лиеш: республикыште наркотик шарлыме шотышто лӱдыкшӧ аралалтеш. Садлан тунемме тӧнежлаште, ача-ава-влак коклаште профилактике сынан пашам утларак эртараш кӱлмӧ нерген палемдыме. Тидыже самырык тукымын тазалыкшым арален кодымаште ик тӱҥ сомыл лийшаш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: