"Рубрик деч посна", 2016 ий, Сӱрем тылзын 1-ше кечыже

Пеледыш пайрем — шонанпыл гай веле урем

Статьян авторжо Марина Богданова

Пеледыш ппеледыш2айрем – марий калыкын йӧратыме пайремже, тудым ме шошо ага пашам пытарыме деч вара пайремлена. Йошкар-Олаште тений тудо 25 июньышто лийын.

Пеледыш пайремыш уна-влак Удмуртий, Башкортостан, Татарстан, Киров, Нижегородск, Свердловск областьла, Хант-Манси автономный округ (Югра) да Марий Элын тӱрлӧ районлаж гыч толыныт. Кажнын марий тувыржым тӱслен ончымеке, пеледыш дене таҥастарыме шуэш. Гармонь сем почеш кузе чаплын марий муро шергылтын! Тыгодым игечат сай лийын. Эрдене индеш шагатлан Пӱнчер отышто Агавайрем кумалтышым эртарыме. Тӱрлӧ верла гыч толшо делегаций-влак Ленин лӱмеш тӱвыра полат деч, пайремым почмо верышке, Ленин площадьышке колонно дене ошкыл каеныт.

Пайремым «Марий Эл» кугыжаныш ансамбль Морко сӱан куштымашыж дене почо. Оньыжа Э.В.Александров марий калыкым уло шӱм-чонжо дене саламлыш. Агавайрем кумалтыш, Пеледыш пайрем нерген тӱҥ онаеҥ А.И.Таныгин умылтарыш, марий калыклан поро шомакым ойлыш. Саламлымашке Россий Федераций Кугыжаныш Думын депутатше Л.Н.Яковлева, Марий Эл Республик Кугыжаныш Погын вуйлатышын алмаштышыже А.Н.Иванов да ялозанлык министрын алмаштышыже И.В.Логинов ушненыт. Йошкар-Олан мэрже Е.В.Маслов ден Йошкар-Оласе депутат-влак погынымашым вуйлатыше А.Н.Принцев сценыште поро шомакым ойленыт.

Пеледыш пайремыште мер илышыште тыршыше еҥ-влакым чапкагаз дене палемдыме. Кугыжаныш Погынын Чап грамотшо дене Марий Элын сулло артистше Ю.В. Алексеев палемдалтын.

Пайрем кечын ялозанлык предприятий-влакын вуйлатышыштым, ончыл тракторист-машинист-влакым палемденыт. Ялозанлык да продовольствий министерствын таумутшо да кубокшо дене «Эн сай муниципиал район» номинацийыште Медведево район лектын. А «Эн сай ялозанлык предприятий» номинацийыште ончыл верыште Медведево районысо «Шойбулак» племзавод, Марий Турек районысо «Акпарс» агрофирме, Медведево районысо «Семеновский» племзавод» лийыныт.

Чапкагазым да окса премийым ялозанлык пашаште  тыршыше тракторист-машинист-влаклан: Медведево районысо «Семеновский» племзаводын пашаеҥже А.А.Ивановлан, У Торъял район «1 Май» ялозанлык кооперативын тракторист-машинистше С.П.Соловьевлан, Марий Турек районысо «Акпарс» агрофирмын пашаеҥже А.Ю.Винокуровлан кучыктымо.

Вара Пеледыш пайрем Йошкар-Олан рӱдӧ тӱвыра да каныме паркышкыже куснен. Марий калыкын тӱвыраже, йӱлаж дене кылдалтше тӱрлӧ конкурс программе калыкым куандарен. Тӱрлӧ ийготан еҥлан келшыше мероприятий, конкурс-влак лийыныт: «Марий кудо» «Йоча пагыт», «Марий солык», «Марий ӱдыр», «Эх, кувавай» да молат. Фольклор коллектив-влак «Мураршаш» концертыште чолгалыкыштым, мастарлыкыштым ончыктеныт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: