"Айдеме да закон" рубрик, 2016 ий, Сӱрем тылзын 22-шо кечыже

Погонан тукым

Статьян авторжо Светлана Кушакова

Kucherovy_004-800x600Кучеровмыт еш эреак койыш-шоктышыж, шкем кучен моштымыж дене эреак ойыртемалтын. Арам огыл тиде ешын пӧръеҥже-влак шке илышыштым правам да порядкым аралыме дене кылденыт, визытын элгӧргӧ паша службым ойырен налыныт.

Эн ончыч тиде корнышко Леонид Кучеров шогалын. Тудо Морко районысо Кӧкрем ялыште шочын-кушкын. Пелий ончыч Леонид Леонидович 65 ияш лӱмгечыжым палемден. Милицийын отставкысе подполковникше ты органыште 29 ий служитлен.

А чылажат 1971 ий 30 августышто тӱҥалын. Ик ий Йошкар-Оласе милицийыште пашам ыштымеке, Леонид ГАИ-н Саратовысо кыдалаш специальный школышкыжо тунемаш пурен. Палемдыман, Кучеровын тунамсе вуйлатышыже тидлан ӧрынат: 10 ий жапыште Марий кундем гыч тушко иктат тунемаш пурен кертын огыл. Но Леонид нелылык ончылно вуйым тунам савен огыл. Шындыме цельышке шуаш тыршен, чот ямдылалтын.

Лейтенант званиян, дипломышто кок “нылытан” отметке дене (молыжым “визытанлан” сдатлен) шочмо Морко поселкышкыжо пӧртылын. ГАИ школ кугурак автоинспекторлан пашам ышташ тышке колтен. Ты должностьышто Леонид Леонидович шагал огыл — 23 ий — тыршен. Корнышто лӱдыкшӧ ынже лий манын вуйын шоген, южо неле осал паша-влакымат наҥгаен, свидетель-влакым йодыштын, преступникын кышажым кычалын. Шке пашажымат жапыштыже шуктен, тыге пырля тыршыше йолташыже, еҥ-влак коклаште пагалымашым сулен. Арам огыл 1975-1976 ийласе паша лектышыж дене ГАИ-н эн сай инспекторжо лӱмым налын.

Служитлыме корныжын пытартыш ийалыштыже – чылаже вич ий – участковый инспектор-влакын службыштышт пашам ыштен. Тушко 1993 ийыште куснен. 45 ийым темымыж жаплан лачак икымше чеченский кампаний тӱҥалын. Леонид Кучеров моло полиций пашаеҥ-влак дене пырля Йӱдвел Кавказыш служебный командировкыш каен. Ведено села деч икмыняр километр тораште лийын: Андийский перевалысе блокпост-влакым оролен. Командованийыштыже 20 утла военнослужащий лийын. Кызытат Леонид Леонидович боевой йолташыже-влакым порын шарналта.

1997 ийыште подполковник Кучеров пенсийыш лекташ рапортым возен. Тиде жаплан кугурак эргыже, Юрий, вич ий наре ты органыштак пашам ыштен. Тудат кокымшо чечен кампаний жапыште Йӱдвел Кавказыште служитлен. Ятыр ий уголовный розыскын оперуполномоченныйже лийын. Пенсийыш уголовный розыск отделым вуйлатыше должность гыч майор званиян каен.

Леонид Кучеровын ӱдыржӧ, Олеся, полицийыште пашам ыштен огыл гынат, ФСБ пашаеҥлан марлан лектын. Погонан еҥын пелашыже могай лийшашым сайын пала.

Изирак эргыже, Анатолий, ачажын корныжым тошка: икмыняр ий ГИБДД-ын оласе батальоныштыжо ДПС инспекторлан пашам ыштен.

Леонидын Валерий шольыжат тиде службым ойырен нылын. Армий деч вара вес вере пашам ышташ шонен гынат, илыш вес семын савыралын. Ончыч районысо эмлымверыште шоферлан пашам ыштен. Но икана ОВД вуйлатышым вашлийын, тудо милицийышке толаш темлен. Но тунам Валерий шыргыжалын да “Изам пашам ышта, сита!” манын вашештен. Туге гынат 30 ийым ты службылан пӧлеклен.

Ятыр жап Валерий ИВС (изолятор временного содержания) структурышто тыршен. Пытартыш индеш ий охране отделын отделений командирже лийын, тушеч пенсийыш лектын. Валерий Кучеров службышто сай могырым шкенжым ончыктен, командировко-влакат лиеденыт. 1981 ийыште Москваште КПСС-ын XXVI погынжо эртыме годым ик тылзе наре общественный порядкым эскерен. Арменийыште мландечытырналтмаш деч вара шаланыше Ленинакан олам чоҥымаште лийын. Ты командировко нерген “За восстановление Ленинакана” медаль ушештара. Кужу капан, лопка туп-вачан Валерий Кучеров тӱрлӧ спорт таҥасымаште отделжын чапшым арален. Тудо ятыр ий кирам нӧлтымаште ончылно лийын.

Изак-шоляк Кучеровмыт ешын альбомыштыжо жаплан кӧра изиш нарынчалгыше, но тунамсе ийласе шӱлышым арален кодышо фотокартычке-влак улыт: теве милицейский форман изак-шоляк пелашышт дене. Чыланат самырык улыт, шинчаштышт ӱшан, вий коеш. Варарак ты альбомышко вес фото ешаралтын: Валерий Кучеров пелашыже да Алеша эргыж дене. А теве эше икте: Морко милицийын пашаеҥже-влак — отдел воктенсе тошкалтышыште. Нунын коклаште – изак-шоляк Кучеровмыт, Валерий воктене — эргыже.

Очыни, эреак ача дене пырля лиймыже, ончыкылык корным ойырен налаш полшен. Алексей МВД внутренний войскаште служитлен толмо деч вара милицийыш пашаш пурен. Тыге 2003 ий март гыч службо тӱҥалын. Лу ий наре Алексей участковый лийын, кум ий ДПС инспекторлан пашам ышта. Тудо — ответственный, серьезный, еҥ-влак дене кылым муын мошта.

Шукерте огыл Алексей ДПС инспектор-влак коклаште профессиональный мастарлыкым ончыктымо конкурсышто таҥасен. Участник-влак тале лийыныт. Туге гынат Морко районын инспекторжо Алексей Кучеров эн сай-влак коклашке логалын. Тыге погонан еҥ-влак дене чапланыше шке тукымжын, отделжын, районжын достойный еҥышт улмыжым ончыктен.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: