"Илыш йогын" рубрик, 2016 ий, Сӱрем тылзын 15-ше кечыже

Сурт гыч суртыш почтальонко коштеда…

Статьян авторжо Анастасия Эманова

Шке жапыштыже почтальоным увер он маныныт. Но кызытсе компьютеризаций, интернет саманыште почто кокымшо планыш куснен. Олалаште шукынжо коммунальный услугыланат оксам интернет полшымо дене тӱлат. Туге гынат почто пашаеҥ-влак пашаштым кыртмен да сайын ыштат. Тӱнӧ кеч-могай уда игече шогыжо, шкеныштын кеч-могай проблемышт лийже, нуно калык деке жапыштыже тӱрлӧ газетым да журналым, сатум намият, пенсийым пуэдат.

Шола гыч пурлашке: Кораксола почто отделенийым вуйлатыше Л.А.Ефимова, почтальонко-влак Н.Алексеева, А.Зайцева, Л.Эманова

Морко почтамтын Кораксоласе связь отделенийже шым ялыш тӱрлӧ корреспонденцийым коштыкта. Ты пашам ныл чолга ӱдырамаш шукта. Кораксола почтым Йопланыште илыше Лариса Анатольевна Ефимова вуйлата. Тудын паша опытшат кугу – 19 ий. Кок ийже тыглай почтальонкылан ыштен. “Шкеже профессий дене ветеринар улам. Почтышто ышташ тӱҥалмеке, квалификацийым нӧлташ манын, Йошкар-Олаште ятыр гана курсым эртенам. Латшым ий вуйлатышылан ыштем. Паша куштылгыжак огыл. Пеш шуко отчетым ыштыман. Ончыч эре кид дене возаш логалын гын, кызыт компьютер полшымо дене ыштем. Кажне пелийлан планым шуктыман. Коллективна икоян, садлан чыла нелылыкым пырля сеҥена. Шым ялыш: Кораксолаш, Алсолаш, Шӱргыялыш, Ярансолаш, Йопланьыш, Токсарыш, Йырыш – газетым коштыктена, калыклан пенсийым намиена. Яллаште калык газетым лудаш йӧрата. Тидын шотышто подписке план эре темеш. “Морко мланде”, “Кугарня”, “Марий Эл”, “Ямде лий”, “Семейная газета”, “Марийская правда” газет-влакым налыт. Почто отделенийыштына йоча изданий-влакым, тӱрлӧ книгам, журналым ужалена, сату шуко.

Подписчикна-влак чолга улыт. Кораксолаште Роза Николаевна Иванова кажне пелийыште чыла марий изданийлан подпискым ышта. Тыгак Нина Степановна Эманова, Ксенофонт Сергеевич Данилов, Йопланыште Галина Степановна Васильева шуко газетым налыт. “Кугарня” газетым поснак чот лудаш йӧратат. Икымше пелийлан подписчик-влак шукынрак улыт ыле, ты гана паша тургымлан кӧра шагалемын”, — каласыш Лариса Анатольевна.

Почтальон паша шуко чытышым йодеш. Сурт еда коштман, газетым, пенсийым пуэдыман, сатум ужалыман, чыла еҥ дене мутланен моштыман. Адакшым пашадаржат изи. Кораксола почтышто тидлан тунем шуыныт. Шке манмыштла, нуным ынде пийжат пала.

Пашам йӧратен ыштет гын веле чон куана, кумыл нӧлталтеш. Тыге ойла Лидия Викентьевна Эманова. Тудо газетым да пенсийым Кораксола ден Алсолаште пуэда. Кокымшо пелийлан тӱрлӧ газетлан 59 подпискым ыштен. “Тений июльышто почтыш пашаш толмемлан 18 ий темын. Ончыч Йошкар-Оласе “Контакт” заводын Морко филиалыштыже ыштенам. Сокращенийыш логалмеке, почтыш толынам. 18 ий жапыште тӱрлыжат лиеден. Тӱҥжӧ – пашанам чылан кумылын ыштена. Эре калык ончылно улына. Кажне тылзын кумшо числаштыже пенсийым пуэдаш тӱҥалына, сатунам темлена. Газетым сурт еда эреак нумалына. Южгунам жапыштыже намиен огына шукто гын, подписчикна-влак йыҥгыртен йодыт”, - манеш Лидия Викентьевна.

Н.А.Алексеева Кораксола почто отделенийыште 2002 ий годсек ышта. Тудо Шӱргыял ден Ярансолалан вуйын шога. Оршанке педучилищыште воспитательницылан тунемын. Морко поселкысо “Аленушка” йочасадыште 10 ий пашам ыштен. Вара йочасадым петыреныт.

Почтышко пашаш Лариса Анатольевна ӱжын. Эн ончыч кеч-могай пашаштат неле. Мый Шӱргыялыште илем. А корреспонденцийым эше пошкудо Ярансола ялыш коштыкташ кӱлын. А тушто мый еҥжымат, суртшымат пален омыл. Ик жап газетыш подписчикын фамилийже ден пӧрт номержым возем ыле. А вара тунем шуынам. Коча-кова-влак мемнам эреак чон вургыжын вучат. Айда, шич каналте манын ойлат да теҥгылыш пырля шинчаш темлат. Мутланаш кумылан улыт. Шке илышышт гыч тӱрлӧ историйым каласкалат. Калык тыге пагален вашлиеш гын, кунам пашам ышташ кумыл йомеш?” - ойла Надежда Александровна.

Почтышто тӱрлӧ аланыште ончыч ыштыше специалист-влак тыршат. Теве Алевтина Анатольевна Зайцева профессийже дене фельдшер. Иктаж-мо коршта, але эмлалтме шотышто иктаж-могай каҥаш кӱлеш гын, тудын деке толын йодыт. Поро ӱдырамаш вуйым ок шупш. Кертмыж семын эреак полша. “Почтыш толмо деч ончыч медпунктыштат пашам ыштенам, “Знамя” колхозыштат тыршенам. Ынде кудымшо ий почтальонко улам. Токсарыш, Йырыш, Йопланыш тӱрлӧ газет ден сатум нумалам. Машинам шке виктарем, садлан ик ял гыч весыш кошташ йӧнанрак”, - каласыш А.Зайцева.

Чынжымак, почтальонын пашаже шуко: газетым намиен шуктыман, серышым, пенсийым, тӱрлӧ извещенийым пуэдыман, сатум ужалыман. Кораксола почто отделенийыште ӱдырамаш-влак пашаштым йӧратен ыштат. Газет редакцийна почто пашаеҥ-влакым эртыше пайремышт дене алал кумылын саламла да неле пашаштышт чытышым тылана.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: