""Кугарня" газетлан - 25 ий" рубрик, 2016 ий, Сӱрем тылзын 8-ше кечыже

“Сылнымут аршаш” эре чоҥешташ, чоҥешташ кӱштен

Статьян авторжо Татьяна Иванова

Морко мланде шуко еҥлан шӱм шепка да чон йолгорно, кумыл толкын ден мурсем памаш гай лишыл. Лач ты сылне вершӧрыштӧ 1 июльышто регион-влак кокласе “Колумб лудмаш” поэзий пайрем эртыш. Ты гана тудо кум поэт-влакым: В.Колумбым, Нурӱмбал ялын кок эргыжым — Ю.Русановым да А.Степановым — шарныме дене кылдалтын. Юрий Русановын паша корныжо “Кугарня” газетыште тӱҥалын, ик эн ойыртемалтше да пӱсӧ перан журналист лийын. Тунамак “У вий” ушем шочын, самырык толкын 1991 ийыште “Колумб лудмаш” конкурсым эртараш тӱҥалын. Ю.Русанов кажне сылнымут пайремыште поэт, мер пашаеҥ семын калык дене пырля лийын. “Кугарня” газетнан девизше — В.Колумбын “Эре чоҥешташ, чоҥешташ, чоҥешташ” корнылаже. Шоналтет да, ӧрат, чылажат чак кылдалтын. IMG_5000

Эн ондак ик тӱшка делегаций В.Колумбын шӱгар ӱмбалныже пеледышым пыштыш. Поро шарнымашым М.Соловьева, “Марий памаш” ансамбльым вуйлатыше, Пумыр ялын ӱдыржӧ, ойлыш: “Валентин Колумб ачам дене пырля тунемын. Ачамын сӱаныштыже савуш марий лийын. Пеш чапле сӱан дене Кугу Шоръял гыч авамым конденыт. Икана мемнан деке Валентин Колумб ден Миклай Казаков унала толыныт. Тунам кок самырык еҥ нуным палем мо манын йодыч. Мый чын вашештышым да М.Казаковын “Йошкар галстук” почеламутшым лудым. Валентин Колумб нерген уло ялна поро мутым гына ойлен, тудын уке лиймекыже, ачам “Эх, сай айдеме каен колтыш” манын, ятыр гана шортын. Колумбын Юра эргыжынат ӱмыржӧ кӱчык лийын. Ачаж ден эргыже, кок чулым марий еҥ, Юмо пелен улыт, ме нуным эре шарнен илаш тӱҥалына”. Вара Самырык театрын тӱҥ режиссержо О.Иркабаев ушныш: “Мый Йошкар-Олаште Колумбын илыме пӧртыштыжӧ илем. Пошкудо улмыла чучеш, пырля шинчын кутыраш ыле, шонем. Почеламутшо-влакым лудын, тӱнямбал кӱкшытыштӧ улмыжым шижат, чыла марий калыклан — чон эҥертыш”.

Вара корнына Морко районышко шуйналте. Моткоч шуко еҥ М.Шкетан лӱмеш театрын ончычсо директоржо, поэт Юрий Русановын шӱгарже воктене погынен. Уста еҥлан шарныктышым шогалтышт. Шукын поро шарнымашым ойленыт, сай йолташым йомдарымым кажныже умылен, шижын. Кӱ оҥа гыч мемнан ӱмбаке Юрий Русанов онча, туге чучеш, пуйто кече тудын чонышкыжо пурен, шинчажым волгалтен, илышым пӧлеклен. “Айдеме чон – кавасе шӱдыр” ойлен ик почеламутыштыжо Юрий Русанов. Лач кавасе шӱдыр семын мемнан уш-акылнам, ошкылмо корнынам, вудака шонымашнам шке пӱрымашыж дене волгалтараш ош тӱняшке толын, йолташ-влакым иктыш чумырен, келшен илаш кӱштен шога. Тошто марий радамыште гынат, ты кечын мемнан воктене улмылак чучын.

Вара кугу делегаций Нурӱмбал ялышке тарваныш. Тыште пайрем шӱлыш шижалтеш. Йырваш марий тувырым чийыше-влак пеледышла койыт. Кинде-шинчал, сылне мурсем почеш шергакан уна-влакым ялысе калык вашлие. Уремыште рат дене участник-влак шогат. Шкешотан коридорым ыштен, “Сылнымут аршаш” фестиваль-конкурсын унаже-влакым саламлат. Ынде чыланат поэт Альберт Степановым шарныме кӱ воктеке лишемыч. Пеледышым пыштымек, поэзий аланыш куснышт.

Конкурсыш Морко, Звенигово, Волжский, Советский, У Торъял, Кужэҥер, Параньга районла да Йошкар-Ола гыч чылаже 61 участник толын. “Колумбын почеламутшо-влак”, “В.Колумбын кусарыме почеламутшо-влак”, “Автор-влакын произведенийышт”, “Поэт Ю.Русановын почеламутшо-влак”, “В.Колумбын да Ю.Русановын почеламутшо-влаклан возымо муро-влак”, “Автор-влакын мурышт” номинацийла дене таҥасымаш-влак лийыныт. Конкурсышто 12 ияш, 12 гыч 16 ияш, 16 гыч 20 ияш марте, 20 ияш да кугурак ийготан-влак усталыкыштым ончыктеныт. Тӱрлӧ номинацийыште икымше верым налше-влакын лӱмыштым палдарена:

12 ияш марте ийготан-влак коклаште Ксения Григорьева (Морко район, Эҥерсола школ), Юлия Васильева (Советский район, Алексеевский школ).

12-16 ияш коклаште – Екатерина Рыбакова (Шернур район, 2-шо номеран школ), Иван Васильев (Морко, Арын школ)

16-20 ияш коклаште – Ольга Васильева (Йошкар-Ола, 14-ше номеран школ) .

“В.Колумбын кусарыме почеламутшо-влак” номинацийыште 12 ияш марте ийготан-влак коклаште: Александра Аникеева (Волжский район, Памар школ).

12-16 ияш коклаште – Ирина Кугергина (Йошкар-Ола, 21-ше номеран школ).

16-20 ияш коклаште – Татьяна Горохова (Советский район, Ӱшнур школ).

“Шке возымо почеламутым лудшо-влак” номинацийыште 12 ияш марте ийготан-влак коклаште — Леонид Андреев (Морко район, Шӱргыял школ).

12-16 ияш – Валентина Кушакова (Советский район, Кодам школ) .

“Поэт Ю.Русановын почеламутшо” номинацийыште :

12 ияш марте – Анастасия Сидорова (Морко район, Унчо школ,

12-16 ияш марте – Дарья Яковлева (Морко, 2-шо номеран школ).

16 -20 ияш марте – Дарья Иванова (Морко, Унчо школ).

“В.Колумбын да Ю.Русановын почеламутыштлан возымо муро-влак” номинацийыште Наталья Васильева (Йошкар-Ола, 30-шо номеран школ), Надежда Ильина (Ижевск оласе медицине училище), Евгений Каменщиков (Кужэҥер район, Йывансола) да “Куан памаш” (Морко район, Кокласола. Вуйлатышыже Валерий Петров) .

20 ияш да кугурак ийготан-влак коклаште 1-ше вер дене Елена Григорьева (Морко район, Шӱргыял) да Людмила Игнатьева (Морко район , Унчо) палемдалтыныт.

А.М.Юзыкайным шарныме лӱмеш поэтессе З.Дудинан премийжым Морко район Купсола школ гыч Анастасия Ивановалан кучыктеныт. “Кугарня” газетын призшым эн изи участник, вич ияш Екатерина Александровалан (Морко, 2-шо номеран йочасад) пуэнна. М.Шкетан театр ятыр пӧлекым кучыктен. “Марий Эл” газет посна призшым кучыктен.

Паша лектышыж дене куандарен. Тудо кӱкшытыш шуаш, марий йылмым арален, сылнымутым жаплен толаш ончыко ӱжын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: