"Айдеме да пӱрымаш" рубрик, 2016 ий, Сӱрем тылзын 22-шо кечыже

Участковый-влак огыт сите

Статьян авторжо Светлана Кушакова

коллегияТиде арнян республикысе МВД пелияш паша лектышыжым коллегийын заседанийыштыже иктешлен. МВД пашаеҥ-влак дене пырля тушто республикысе правительствым вуйлатышын икымше алмаштышыже, республикым вуйлатышын администрацийжым вуйлатыше Т.Григорьева, Кугыжаныш Погыным вуйлатыше Ю.Минаков, республикысе тӱҥ федеральный инспектор П.Логинов лийыныт. Тенийысе пелийыште кугу мероприятий-влак эртеныт, Калык фронтын форумжо эртен, Святейший Патриарх Кирилл толын коштын. Тыгодым полиций пашаеҥ-влаклан чот тыршаш логалын. 230 мер-политик, спорт да тӱвыра мероприятийлаште порядкым эскерыме.

Элгӧргӧ министерствын структурыжо вашталтын, у паша ешаралтын. Тыге миграций да наркотикым кучылтмым тергыме шотышто управлений-влак ышталтыныт. Кызыт Национальный гвардийын республикысе подразделенийжым ыштыме шотышто йодыш-влак ончалтыт. А преступностьым ончалаш гын, эл мучко тудо ешаралтын, но мемнан кундемыште шагалеммым (8,4 процентлан) палемдаш лиеш: пуштмаш – 13,6 %, пачерым толымаш — 37,1 %, чодырам закондымын руымаш — 9,4 %, виешлымаш — 46 %. Кызыт Марий Эл Республик Юл кундемыште эн ласка регионлан шотлалтеш. Чылаже 2426 осал пашам мучаш марте терген шуктымо, следствий деч шылше 150 преступникым мумо.

Кугу паша организованный преступность ваштареш кучедалмаште ышталтын. Тений пелийыште индеш тыгай осал пашам чарашке лукмо, организованный преступный группысо 10 еҥ шотышто уголовный пашам судыш колтымо.

Экономикыште лӱдыкшӧ да коррупций ваштареш кучедалме йодыш эреак шинча ончылно. Ты жапыште 205 осал тыгай паша ышталтын. Ӱмаште ик нылымше ужашлан шукырак лийын.

Корнысо ситуаций вашталтын: йӱшӧ водитель-влаклан кӧра лийше ДТП кум пачаш шагалемын. Чылаже 1756 тыгай случайым пален налме.

Коллегий кадр йодышым нӧлталын. МВД-лан пашаеҥ-влак эреак кӱлыт. Кызыт министерстве участковый-влак службо кадрым ситараш задачым шынден. Молан манаш гын калык дене пашам ыштыме годым лач тиде пашаеҥын кылже кугу.

Погынымаш оперативно-служебный пашам шуктышо эн сай отдел-влакым палемдыме дене пытен. Сеҥышыш Медведево районын отделже лектын. Кокымшо верым Марий Турек район отдел налын.

Уна-влакат полицийын пашажым сайын акленыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: