"Сылнылык тӱня" рубрик, 2016 ий, Сӱрем тылзын 5-ше кечыже

“Шанель Тарля” марий койышыжым ончыктен

Статьян авторжо Татьяна Иванова

М.Шкетан лӱмеш марий театр кеҥеж гастроль гыч пӧртылын, артист-влак шке усталыкыштым тӱрлӧ кундемыште ончыктеныт. Эн ондак 20 май гыч 3 июнь марте “Роза-Розмарий” постановко дене марий-влакын тӱшкан илыме Татарстан, Одо, Пошкырт кундемлаш лектын коштыныт. IMG_6472_1

А 20-29 июньышто Екатеринбург олаште кызытсе драматург Николай Коляда лӱмеш “Коляда-PLAYS” Х тӱнямбал театр фестиваль эртен. Тушко Марий театрын артистше-влак Николай Колядан пьесыж почеш шындыме “Шанель Тарля” спектакльым ончыктеныт.

Театрын тӱҥ режиссержо Роман Алексеев фестивальыш миен коштмо да кеҥежымсе паша тургым дене палдарыш.

“Николай Коляда — театр илышыште моткоч лӱмлӧ да палыме драматург. Екатеринбург олаште тудын “Коляда-театрже”, самырык драматург-влакым ямдылыме школжо улыт. Шкежат тушто туныкта. Николай Коляда кызытсе саманлан келшыше пьесе-влакым воза. Фестивальын участникше-шамыч Н.Колядан да тудын ученикше-влакын возымо пьесышт почеш спектакльлам шынденыт.

Икманаш, Николай Владимирович — Урал кундемысе театр тӱнялан вуйын шогышо еҥ, тудын театрже Пермь, Урал да Йӱдвел кундемлан рӱдержылан шотлалтеш. Фестиваль Екатеринбург олаште лу кече каен. Российын 22 олаже да йот элла гыч толшо театр-влак индеш площадкышке кумло спектакльым ончыктеныт. Ме “Шанель Тарля” спектакльым намиенна, Камерный театрын сценыштыже 22 июньышто модынна. Ты постановкышко марий тӱсым пуртенна, мемнам ончаш Урал кундемыште да Екатеринбург олаште илыше марий-влак шукын толыныт. Моткоч шокшын да сайын вашлийыныт. Спектакль сай кумыл дене эртен. Николай Коляда ты спектакльым шкежат ончен, сай акым пуэн, програмкыш кидпалыжым пыштен. Фестиваль годым журналист-влак пашам писын шуктеныт, кажне кечын газетым луктыныт. Спектакль пытымек, участник да ончаш толшо-влак деч интервьюм налыныт, шуко уверым, шонымашым возеныт, а эрлашыжым свежа газетым кучыктеныт. Кажне спектакль деч вара лончылымаш лийын. Ме шкежат икмыняр спектакльым онченна, тыгодым моло коклаште шкендым ужат, таҥастарет. Ме академический да драматический театр улына, шкенан тӱсна, чурийна улыт. Ты кӱкшыт деч кораҥаш, моло деч почеш кодаш огыл манын, шекланена. Кеҥеж каныш гынат, пашана шолынак шога. Кызыт кок у пьесым лудына, тудым шындаш ямдылалтына. Сентябрьыште Озаҥ олаште лийшаш фестивальыш каяш ямдылалтына. Октябрьыште у тургым почылтеш, а ноябрьыште “Майатул” театр фестиваль вуча. Икманаш, пашана шуко, гастроль корнына кужу лийын гынат, вий-куатна ешаралтын толеш”.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: