"Рубрик деч посна", 2016 ий, Сӱрем тылзын 22-шо кечыже

«Шийгорно-2016″ да самырык-влак

Статьян авторжо Татьяна Иванова

Марий йылмым чот йӧрата

карина2“Шийгорно” проектна дене ӧрдыж кундемыште илыше марий-влак деке лектын коштмо эре ушеш кодеш. Тӱрлӧ вашлиймаш годым самырык тукым уло гын, чон куана. Теве Дӧртыльӧ

район Турбек ялыште мотор ӱдыр Карина Камалиева дене палыме лийым. 18 июньышто ялыштышт Марий тӱвыра кече эртыме годым Андрей Янситов дене коктын пайремым мастарын вӱдышт. Марий йылме дене кутыралтен колтымышт моткоч сылнын йоҥгалте.

Карина Бирск олаште БГУ-н филиалыштыже биохимий факультетыште тунемеш, химик-технолог лияш ямдылалтеш. “Мылам химий ден биологий келшат, ончыкшым заводышто лаборантлан пашам ышташ тӱҥалам.

Школышто тунеммем годым марий йылме да литератур дене олимпиадыш коштынам. Индешымше классыште тунеммем годым Благовещенск олаште эртыше олимпиадыште икымше верым налынам ыле. Шке йылмым палыме сай, илышыште тиде кӱлешан. Ме, самырык-влак ялыште ятырын улына. Кастене вашлийына, икте-весе дене мутланена. Канышлан ялышке толмо годым поснак весела”, — мане Карина.

Ош Виче эҥер воктене верланыше марий ялыште ныл урем уло, кажне еш сурт оралтыжым шот дене кучаш тырша. Утларакшым самырык-влак Нефтекамск, Уфа да Бирск олалашке тунемаш каят. “Йошкар-Олаште лийын омыл, но палем, пеш мотор да сылне ола. Мемнан ялыште икымше гана тыгай марий пайрем лийын. Тушто чот келшыш. Чоныштем кугешнымашым шижым. Чылан мурат, куштат, гармонист-влакын конкурсышт келшыш. Ме марий улына, тидым кугешнен ойлена”, — умбакыже каласыш Карина.

Ешыште кум йоча гыч Карина эн изиже. Мылам ӱдырын марий йылмым палымыже, аклымыже да мый денем марла аптыраныде мутланымыже келшыш. Тудын ончыкылыкшо волгыдо лийже манын тыланем.

Мер илыш тудлан келша

Турбек ялын вес чолга шочшыжо – 16 ияш Валентин Гайниев — кум ӱдыр да ик эрган Роза ден Ирек Гайниевмытын эргышт. Тудо пайрем кечын мылам “пурла кидем” гаяк лие. Адакшым кугу камандына лач тиде ешын суртыштыжо канен, мален лектын. Кастене Валентин мемнам клубым ончыкаш наҥгайыш. “Ала иктаж-могай пашадам шукташ полшаш кӱлеш?” — йодо. Воктенем билетым, марий диск-влакым кумылын ужалаш полшыш. Клубыш пурышо кажне еҥ дене “Сай мо?” манын саламлалте. Шыма улмыжо да порылыкшо чоныштем пагалымашым ешарыш.валент

Марий рвезе Нефтекамск олаште ила да Нефтекамскысе шуко профилян колледжыште тунемеш, кокымшо курсышко куснен, каменщик лиеш. Валентин тыгак кеҥежым урем кафеште официантлан пашам ышта. Тудо общественный пашалан кумылан. Нефтекамск оласе администрацийыште молодежь ушемыште шога, студсоветын председательже. Тыгак тудо студенческий инициативе рӱдерын вуйлатышыже. Колледжым тунем пытарымек, Валентин ВУЗ-ыш тунемаш каяш шона. Юлия ден Анастасия акаже-влак БГУ-н Бирскысе филиалыштыже тунем лектыныт: Юлия марий йылме ден литературым туныктышылан тунемын, а Анастасия йошкар диплом дене тӱвыра кокласе кылым туныктышо факультетым пытарен. Акашт-влак ешан улыт, Нефтекамскыште илат. Ялыште, ача-ава пелен Ксения шӱжарже уло. Тудо мураш-кушташ пеш мастар.

Гайниевмытын ешыште мемнан лийме кечын моло уна-влак лыҥ улыт ыле. Тулар-тулачыже-влак пайремыш толыныт, уна лийын каеныт.

Суртоза Роза Гайниева “Победа” ООО племзаводышто дояркылан пашам ышта, пелашыже калымыш коштеш.

Валентин гай чолга рвезым Марий самырык тукымын VIII слетыштыжо ужмо шуэш ыле. Ийготшо дене самырык гынат, пашалан кожмак улмыжо палдырна. Вет тыгай слетышто тӱрлӧ кундемыште илыше ӱдыр-врезе-влак икте-весе деч шукылан тунемыт. Шке кундемыштышт марий калыкым ончыко вӱдаш тӱҥалыт.

“Шийгорнына” дене ты гана Пошкырт кундемыште вич кече лийынна, туге гынат ятыр еҥ дене вашлийынна, поснак самырык-влак дене шуко мутланенна. Ты сомыл пайдам пуа, шонем. Вет кылым ыштыше “Кугарня” газетна марий тӱняшке омсам почеш, палымым ышта, у ошкылым ышташ полша.

Тиде снимкыште Дӧртыльӧ районысо “Марий ушемым” вуйлатыше Владислав Сайфанович Сафаровым да тудын Татьяна пелашыжым ужыда. Пиалан мужыр туныктышо улыт, мер пашам чолган виктарат. IMG_2033Ӱмаштат, теният “Шийгорно” дене мийыме годым ты поро еш мемнам шокшын вашлийын, шке суртыштыжо унам ыштен. Дӧртыльӧ районышто Марий тӱвыра кече эртыже манын, вуйын шогат, вет лач нунын тӱҥалмыштлан кӧра ты пайрем кажне ийын эртаралтеш. Тӱрлӧ вер гыч марий-влак чумыргат, шочмо йылмыштым, йӱлаштым арален толыт.IMG_2045

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: