"Улам мый Рве-зы-лык!" рубрик, 2016 ий, Сӱрем тылзын 1-ше кечыже

Школышто тудын дене кугешнат

Статьян авторжо Анастасия Эманова

Ирина Смелова — лывырге капкылан ӱдыр. Тудо изинек кушташ йӧрата. Мастарлыкше дене сымыстара, конкурслаште тунемме Чакмарий школын чапшым арален. Тудын фотожо кызытат школысо почет оҥаште кеча.

смеловаИрина Звенигово район Пӱнчылӱвал ялыште кушкын. Чакмарий кыдалаш школыш коштын. Сайын тунемын, спорт, тӱвыра мероприятийлаште участвоватлен. Мӧҥгыштыжӧ ача-аважлан тӱрлӧ сомылым ышташ полшен. Икманаш, вийжым да жапшым моштен кучылтын. “Мый тыглай ялысе ӱдыр улам. Авам повар, а ачам тӱрлӧ вере пашам ыштен. Илыш тӱрлӧ шӧрынан, кызыт ача дене пырля огына иле. Туге гынат тудын дене вашлияш тыршем. Чаманен каласыман, шуэн мутланена. Но садыгак ачамын полышыжым, мыйын верч тургыжланымыжым шижам, - ойла Ирина. — Школышто сайын тунемынам. 5-7-ше класслаште отличнице лийынам. Почеламутым лудаш, мураш, кушташ йӧратенам. Тылеч посна баскетбол да волейбол секцийлаш коштынам. Кушташ йочасадыште кумылаҥынам. Икымше гана кушташ лекмем тачат шарнем. Тунам “Пеледышым кидышке налын” муро почеш тавалтенам. Вара школышто куштымаш кружокыш коштынам. Ӱдыр-рвезе-влак дене Виче вел марий куштымашым утларак куштенна. А 9-ше классыш вончымеке, тӱрлӧ конкурсышто участвоватленна, но сеҥышыш лекмынам ом шарне, лач участникын грамотшым эре налме.

Калык куштымаш-влакым утларак куштенна. А мыйын тӱрлӧ стиль дене куштен ончымем шуын, садлан кружокыш коштмым чарнаш шоненам, репетиций гыч южгунам шылынат куржынам. Икана ялысе тӱвыра пӧртыш миенам. Тушто пырля тунемше икмыняр ӱдыр-рвезе кызытсе куштымаш занятийыш коштыныт. Мыят тушто эрвел куштымашым да кызытсым пырля кушташ тӱҥалынам, тыгодым школысо кружокышкат коштынам. Но кок мераҥым иканаште покташ огеш лий, садлан калык куштымашым ойырен налынам. Туге гынат телевизорышто ончен заниматленам, шке гыч хип-хоп, индийский, эрвел да моло куштымаш-влакым тунемынам. 10-шо классыште тунеммем годым узбек куштымашым шынденна. Тӱрлӧ школ, ялысе мероприятийлаште тудым ончыктенна.

Мурым колышташ моткоч йӧратем. Шкемынат мурымем шуын, но кӱжгӧ йӱкан улам.

Тӱрлӧ конкурсышто участвоватленам. Мутлан, “Вожатый и его команда” районысо конкурсышто кокымшо верым налынам. М.Шкетан лӱмеш драме театрлан 90 ий темме лӱмеш республикысе сочинений конкурсышто диплом дене палемдалтынам”.

И.Смелова школ деч вара хореографлан тунемаш шонен, но пӱрымаш МарГУ-со Финноугроведений институтыш (кызыт Калык культур да тӱвыра кокласе кыл институт) конден. Икымше курсыштак пырля тунемше ӱдыр-влак дене куштымашым шынден. А вара группым поген. Попурри куштымашым ямдылен, да “Голос юности” фестивальыште тудын дене калык ончыко лектыныт. “Ты куштымаш шукылан келшен, мемнам мокталтеныт. Кумыл кавашке нӧлталтын. Да ты аланыште пашам утларак ыштыме шуын. Эше ик куштымашым ямдыленна да видеош войзенна. Йолташемлан тудым ончыктенам, а тудо ты куштымаш дене дискым Дальний Восток гыч ик рэперлан пӧлеклаш темлен, ме тыгак ыштышна. Кызытеш вич куштымашым шынденам”, — манеш Ирина.

И.Смелова университетын мер илышыштыже участвоватла. Тудо тунемме институтыштыжо волонтер движенийлан вуйын шога, тыгак 5-ше №-ан тӱшкагудысо студент-влак советын председательже.

Чолга ӱдыр ончыкшым куштымаш школым почаш, йоча-влакым туныкташ да виян куштымаш командым погаш шона.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: