"Ме марий улына" рубрик, 2016 ий, Сӱрем тылзын 1-ше кечыже

Эх, огыл, а ух, кувавай-влак!

Статьян авторжо Денис Очиев

IMG_8819Самырык марий ӱдыр-влак «Марий ӱдыр» конкурсыш рӱжге ушнен огытыл. Садлан нунылан кугурак ийготан-шамыч пример семын лийшаш улыт. Калык ончылно «Эх, кувавай!» конкурсышто кок пачаш шукырак участник-шамыч шке мастарлыкыштым ончыктеныт. Конкурс Сеҥымашын ХХХ идалыкше лӱмеш тӱвыра полат ончылно эртен.

Айдемын чолгалыкше нигунамат огеш йом. Ийгот дене тудо тапталтын да пеҥгыдем гына толеш. «Эх, кувавай!» конкурсым ончышо-влак тидым шкеак ужыныт. Кувавай-влак конкурслан сайын ямдылалтыныт. Нуно рӱдола да районла гыч лийыныт.

Конкурс кум этап гыч шоген: «Визитке», «Интеллектуальный конкурс» да «Куштымаш».

Икымшыштыже кувавай-влак шке ешышт нерген каласкаленыт. Тидым южышт почеламут йӧн денат ыштеныт. Шке номерыштышт ешын да калыкын йӱлаштым дене палдареныт. Шукышт мурым муралтеныт.

«Интеллектуальный конкурсышто» шуко оҥай йодыш пуалтын: «Молан агытан эрдене мура?», «Мончаш миен пурышым, а тушто пелашем шога. Молан?», «Мыйын кугызам тракторист. Мом ышташ?», «Пелашем пашаш каен, но 15 минут гыч мӧнгеш пӧртылын, тыгодым нимом монден огыл улмаш. Молан пӧртылын?». Кувавай-влакын илыш опытан улмышт шижалтын. Вашмут-влак шукыж годым йӧратымаш дене кылдалтше мыскараче сынан лийыныт.

Марий ӱдырамаш кушташ йӧрата. Садлан кумшо конкурсышто тӱрлӧ муро почеш участник-влак черет дене лектын куштеныт.

«Конкурсышто районын чапшым араленам. Уло чонем да вием пыштен ямдылалтынам. Ик кече жапыште «визиткым» ямдылышым, вара репетицийым ыштыльым. Чыла сайын эртен. «Эх, кувавайыште!» мый ончыкшылан ешартыш вийым налынам. Йӧратыме калыкем ончылно сеҥаш — кугу чап!» — каласкала конкурсышто сеҥыше Лидия Серафимовна Павлова.

Лидия Серафимовна Шернур районысо Марисола села гыч. Конкурсышто кокымшо верыш Светлана Васильевна Гаврилова (Медведево район) лектын, кумшышто — Римма Алексеевна Кудрявцева (Оршанке район).

«Эх, кувавай!» конкурсым «Марий кас» мучашлен. Тушто участник да уна-влак пырля куштеныт да муреныт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: