"Рубрик деч посна", 2016 ий, Сӱрем тылзын 1-ше кечыже

Cкейт-борд нелылыкым сеҥаш туныкта

Статьян авторжо Денис Очиев

2миша медведев000-ше ийла тӱҥалтыште рӱдолаштына скейтборд дене кылым кучышо-влак лекташ тӱҥалыныт. Ондак тудын нерген телепередачылаште гына колмо гын, ынде Йошкар-Оласе рӱдӧ паркыште ораван оҥаш шогалын кудалыштше еҥ-влак моткоч шукын вашлиялтыт. Южышт скейтбордым спорт огыл маныт, но Михаил Медведев тидын дене огеш келше. Рвезе ынде ныл ий наре тудын дене пеҥгыде кылым куча.

Шкендам лӱддымым ышташ шонеда гын – тиде спорт тыланда,” — тӱҥале мутланымашым Миша.

Шлем деч посна кудалыштын

Рвезе тений Йошкар-Оласе 2-шо №-ан школым тунем пытарен. Эше кандашымше классыште улмыж годым Максим йолташыжым изаже скейт дене кудалышташ туныктен. Мишалан шканжат оҥайын чучын, но лӱдыкшӧ лийын. Икымше гана оҥаш шогалмыж годым виян кудал колтен, но чарнен шогалын кертын огыл, садлан пырдыжыш керылтын.

- Кугу профессионал лият гынат, пурен кает. А ме тунам оҥаштыжат чытырен шогенна. Туге гынат нелылыкым сеҥаш лӱдман огыл. Камвозын мошташат кӱлеш. Ондак мый тидым лӱмынак ыштем ыле. Икмыняр гана шлемымат чиен кудалыштынам, но тыгодым вуемлан неле чучын. Чынжым каласаш гын, шлем деч посна оҥа ӱмбаке ида шогал, — ойла М.Медеведев.

Каныме паркыште пӧрдын

Иктаж пел ий наре Миша эре тунемын. Тудо калык ончыко лектын огыл. Еҥ-влак камвозмыжым ужыт да воштылыт манын шонен. Кеҥежым лӱмынак, эр кынелаш манын, ондак малаш возын. Шкеже Сомбатхей микрорайонышто ила. Тунам тудо тренировко семын кажне эрдене Ленин лӱмеш тӱвыра полат марте кудал кӱзен, вара волен. Тыге иктаж кок шагат жапыште 10-12 гана пӧрдын. Жап эртымеке кудалышташ тунемын.

- Южыжо скейтлан тунемаш манын, тудым эреак пырля нумалеш. Лектышыже уло мо – ом пале, но мый кудалышташ гына луктам. Вет практике годым гына тунемалтеш. Кудывечылаште да тротуарлаште ом кудалышт, тушто корныжат уда да шуко тыгыде кӱ уло. Ондак тидым пален омыл, но скейт орава-лакым шалатымеке да ик гана веле огыл пурен кайымеке, тыге ом ыштыл. Йошкар-Оласе рӱдӧ да каныме паркыште гына кудалышташ тыршем, — каласкала рвезе.

Скейтбордышто кынервуй ден пулвуй эн чот сусыргат. Миша шукерте огыл курыкышто кудалыштмыж годым камвозын да адакат йолым сусыртен. Но рвезе тидлан тунемын. Шке семынже нуным “минус” манеш.

Скейтбордист велосипедист гаяк

Ондак скейтборд уремыште кудалыштше-влакын гына лийын. Садлан ӱмаште Ленин лӱмеш тӱвыра полат шеҥгелне скейт паркым почмаш ты спортым вияҥдаш моткоч полша. Тушко олан тӱрлӧ луклаж гыч самырык влак шке оҥаштым налын кудалышташ толыт.

- Мый тушко пеш чӱчкыдын ом кошт. Курыклаште мунчалташ оҥай. Но изишак тӧрштылмеке, мый садак рӱдӧ да каныме паркыш каем. Туштат скейтлан кудалаш куштылго огыл вер-влак улыт. Калык коклаште лияш оҥайрак. Скейтборд дене кудалыштше велосипедист гаяк, эре пырля кӱлешан ключым да гайкым налшаш. Сай скейт-шамыч пеҥгыде улыт, но нунынат иктаж вере рончалт кертеш. Садлан пырля инструмент уло гын, вигак ачалаш да умбакыже чымаш лиеш, — ойла Миша.

Куштылго трюк гыч тӱҥалман

Тыглай кудалышташ тунеммаш – тиде тӱҥалтыш гына. Ты спортым чыланат трюк-шамычлан кӧра аклат.

- Кужун тренироватлалтмеке гына шукыжым умылет. А иктаж трюкым ыштен кертат гын, тидыже ешартыш вийым эше пуа. Шонымаш лектеш: тыйын гай ыштен моштышо тӱняште шукынжак огытыл. Оҥа ӱмбалне пеҥгыдын шогаш тунеммеке гына, трюк-шамычлан пижаш лиеш. Нуныжо тӱрлӧ, но эн проста-влак, шав-ит да гринд улыт. Шав-итыште скейтбордист тӧршталта да оҥажын шеҥгелжым ончыко савырта. Тудым нелыракынат ышташ лиеш – тӧршталтмеке, шке йыр 360 градуслан пӧрдыкташ. Мыят тудлан тений гына тунем шуктенам. Гринд трюк годым орава олмеш, подвеске ӱмбалне кудалат. Тидлан тунемаш эн куштылго. Садлан тӱҥалше-влаклан нелым ышташ тыршыман огыл, — каласкала Миша.

Лӱддымӧ спорт

Миша ты спорт дене кылдалтше таҥасымашлаште шке вийжым терга. Шукыж годым нуныжо Йошкар-Олан чемпионатше улыт. Тушто виян кудалышт моштышо-шамыч шукны таҥасат. Ӱмаште тыгаяк кӱкшытан соревнованийыште кумшо лийын. Тургыжланымыжлан кӧра оҥаже тудым йӧршын колыштын огыл, манеш.

Южгунам скейбордист-шамыч иктаж акцийым эртарат. Мишат тушко уло кумылын ушна.

- Скейтборд йолташым муаш полша. Скейт паркыште ме чыланат ваш-ваш палена да полшаш тыршена. Садлан – нелылык деч огыда лӱд да шуко у йолташым муаш шонеда гын, ты спорт дене кылым кучыза, — каласыш рвезе.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: