"Саман" рубрик, 2016 ий, Сорла тылзын 19-ше кечыже

Водитель правам налаш нелырак лийын

Статьян авторжо Светлана Кушакова

Кажне кечын ола уремлаште машина-влак ешаралтыт. Яллаштат ты транспорт кызыт ятыр пӧрт ончылно шога. Машинаш шинчын кудалаш да жапыштыже палемдыме верыш миен шуаш пеш йӧнлӧ. Но кеч-могай транспорт лӱдыкшымат луктеш.

Тений икымше пелийыште республикыште 358 ДТП лийын, 38 еҥ колен, 490 сусырген. Аварийыш кок ий деч шагалрак стажан ятыр водитель логалыт. Ты жапыште нунылан кӧра 28 ДТП лийын. Садлан кызыт “самырык” водитель-влакым ямдылыме йодыш тургыжландара.Тӱҥ шотышто нуно кудал эртыме черетым шотыш огыт нал, машина-влак коклаште дистанцийым огыт шеклане, чакныме правилым шотыш огыт нал.

Тидлан кӧра кодшо арнян ГИБДД-ын республикысе управленийыштыже ты йодышым “йыргешке ӱстел” годым чыла автошколла дене каҥашыме. ГИБДД-ын регистраций да экзамен пӧлкажым вуйлатыше С. Козлов эн сай автошкол-влакын рейтингыштым ямдылен. Тыгак транспортым виктараш правам налме шотышто экзаменым кучымо радамыш вашталтышым пуртымо дене палдарен. Надзор пӧлкам вуйлатыше, управлений вуйлатышын алмаштышыже И.Воронцов “самырык” водитель-влаклан кӧра лийше аварий сӱрет нерген каласкален.

Кызыт республикыште 31 автошкол пашам ышта. Водитель правам налаш шонышо-влак коклаште икымше гана гыч экзаменым сдатлыше кажне ийын шагалемеш. Водительым сайын ямдылыше автошкол-влак рейтингым ончалаш гын, Россий ДОСААФ-ын школыштыжо тунемше кокла гыч 67 процентше вигак сдатла. Тиде школышто эн сайын ямдылат. Шым школын 50 процент деч утларак еҥ веле экзаменым икымше гана гыч эрта. Тыште “Клаксоным”, Йошкар-Оласе 23-шо №-ан школын, автодорожный техникумын, Медведево районысо 2-шо №-ан школын, Марий политехнический техникумын, Марий кугыжаныш университетын автошколаштым палемдаш лиеш. Икманаш, кумло ик школ гыч сай водительым ямдылышыже пеш шагал.

Тений 1 сентябрь гыч транспортым виктараш правам налме шотышто кугыжаныш услугым темлыме да водитель удостоверенийым кучыктымо шотышто МВД-н административный регламентше вийым налеш. Тудын почеш, экзаменын теорий ужашыжым сдатлымым нелемдыме. Коло минутышто коло йодышлан вашештыман. Нуным вич йодыш гыч шогышо ныл тематический блоклан шеледыме. Тӱрлӧ тематический блокышто кок йоҥылышым ышташ лиеш. Кажне йоҥылышлан вич ешартыш йодышлан вашешташ темлалтеш. Тидлан вич минут пуалтеш. Эше йоҥылыш вашештеда гын, эше вич йодыш пуалтеш. Иктешлен каласаш гын, кум йоҥылышым ыштымылан, ик тематический блокышто кок йоҥылышым ыштымылан, ешартыш тематический блокышто йоҥылышым ыштыме годым экзаменым кучымо огыллан шотлалтеш.

“В” категорийлан экзаменын практический ужашыжым кучымо годым машина дене вич упражненийым ыштыман. Водитель парвам налаш шонышо эстакадыш кудалын кӱзен, боксыш кудалын пурен, змейке дене кудалын, параллельно парковатлен моштымыжым ончыктышаш. У упражнений, 90 градусыш савырнен кудалмаш пурталтыныт.

Олаште кудалыштме годым правилым пудыртымым шотыш налын, кажне йоҥылышлан 5,3 але ик балл шындалтеш. А мутлан, светофорын йошкар тулжо йӱлымӧ годым кудалмылан, “встречкыш” лекмылан кандидат экзаменым кучыдымылан шотлалтеш.

Ты регламент почеш, экзаменым автоматический передаче коробкан машина дене кучаш лиеш. Тыгодым тидыже водитель удостоверенийыште ончыкталтеш. “Механике” машинаш куснымо годым угыч автошколышто тунемман да экзаменым кучыман.

Шушаш жапыште транспортный средствам регистрироватлаш, регистрационный документыш вашталтышым пурташ, водитель удостоверенийым налаш да вашталташ шонеда гын, www.gosuslugi.ru кугыжаныш услуго-влак портал дене пайдаланаш лиеш. Тидыже жапым аныклаш полша, черетыште шогаш огеш кӱл.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: