"Айдеме да закон" рубрик, 2016 ий, Сорла тылзын 12-шо кечыже

Загранпаспортым налаш черетыште шогыман огыл

Статьян авторжо Светлана Кушакова

Дмитриев Алексей Евгеньевич ФМСКеҥеж – каныме жап. Тудым изижге-кугужге уло кумылын вучат. Каныме йӧнат — кажныжын тӱрлӧ. Икте ялыште, шочмо кундемыште жапым эртара, весе вес элышке миен толеш. Таче загранпаспортым налме, оформитлыме шотышто республикысе МВД-н миграций йодыш шотышто управленийжым вуйлатышыже, элгӧргӧ службын подполковникше Алексей Дмитриев дене мутланена.

- Алексей Евгеньевич, палена: кызыт кок тӱрлӧ загранпаспорт – тошто да у образецан — улыт. Еҥ-влак могай загранпаспортым ышташ йодмашым утларак возат?

- У образецан паспорт йӧнанрак. Тушто айдемын биометрический данныйже: фотокартычкыже, лӱмжӧ, фамилийже, ача лӱмжӧ, шочмо кечыже, паспорт данныйже — чипыш возалтеш. Шонымо семын парня палым кодаш лиеш. Садлан еҥ-влак тиде паспортым ойырен налыт, действийжын жапшат кугурак — 10 ий, тоштын – вич ий.

- Кызыт загранпаспортлан кугыжаныш пошлинын кугытшо могай?

- Кугыжаныш пошлине тыгай: тошто образецан загранпаспортлан – 2000 теҥге, 14 ий деч изирак ийготан йоча-влаклан – 1000 теҥге. У образецлан 3500 теҥгеш шуэш, 14 ий деч изирак ийготан йоча-влаклан 1500 теҥгем тӱлыман.

- Ӱмашсе дене таҥастарымаште тений мыняр тыгай паспортым кидыш пуымо?

- Тений 30 июньлан 2714 (ӱмаште – 5697) загранпаспортым ямдылыме. Тушеч 1525 (ӱмаште — 3564) у образецаным, 1189 (ӱмаште — 2133) – тоштым.

- У загранпаспортым ышташ шуко жап кая мо?

- У образецан загранпаспорт чыла документым кондымо деч вара ик тылзе жапыште ышталтшаш. Секретностян але кугыжаныш тайнылан шотлалтше сведений дене пашам ыштыше еҥ-влаклан, 1993 ий 21 июльышто лукмо “О государственной тайне” закон дене келшышын, тиде жап кум тылзыш шуэш. Тыгодым илыме вер почеш огыл документым кондымо гын, ныл тылзе марте шуйналтын кертеш.

- Загранпаспортым ышташ черет кугу мо?

- Тидлан черет уке. Гражданин загранпаспортым налаш йодмаш дене МВД-н миграций йодыш шотышто пашам ыштыше подразделенийлашке толын кертеш. Тыгак йодмашым “Единый портал государственных и муниципальных услуг (функций)” федеральный кугыжаныш информационный системыште кодаш лиеш. Тошто образецан загранпаспортым налаш шонышо-влак кугыжаныш да муниципальный услугым темлыме шуко функциян рӱдерлашке йодмаш дене лектын кертыт.

- Биометрический паспортым репсубликыште кушто налаш лиеш? Парня палым тушко пуртынем гын, кушко кайыман?

- Республикыште цифровой фотокартычкым ыштыше да парня палым сканироватлыше кум тыгай отделений Йошкар-Олаште, Волжскышто да Шернур поселкышто уло. Тыгодым йоча деч 12 ийым темыме деч вара веле парня палым налыт.

Загранпаспортын ямде улмыжым, тыгак гражданствым вашталтыме, илыме вер, жаплан илаш разрешенийым налме шотышто йодмаш-влакым ончымо нерген www.guvm.mvd.ru сайтын “Сервисы” разделыштыже пален налаш лиеш. Миграций шотышто йодышда уло гын, республикысе МВД сайтын “Прием обращений” разделыштыже кодаш лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: