"Улам мый Рве-зы-лык!" рубрик, 2016 ий, Сорла тылзын 8-ше кечыже

Кеч-могай пашаште чолгалыкым ончыкта

Статьян авторжо Марина Богданова

А.Смирнова

Студент пагыт годым шинчымаш дене ушнам йӱдшӧ-кечыже пойдарыме деч посна шуко ӱдыр-рвезе-влак мер илышыште чолгалыкым ончыктат, тӱрлӧ мероприятийлаште выступатлен, жапым пайдалын эртарат. Нине чолга студент-влак радамышке Марий кугыжаныш университетысе Калыкле тӱвыра да тӱвыра кокласе кыл институтын студенткыже Анна Смирновам пурташ лиеш.

Аня тений визымше курсышто тунемаш тӱҥалеш, марий да йот йылме туныктышо лияш ямдылалтеш. Школышто йоча-влак дене пашам ышташ тудо изиж годсек шонен.

Анна Параньга район Изи Пумарий почиҥгаште шочын-кушкын. Тӱҥалтыш класслам шке ялысе, а вара Кугу Пумарий школлаште тунемын. Школ годсек  уста, чолга ӱдыр кушкын, тӱрлӧ мероприятий, олимпиаде деч нигунам ӧрдыжеш кодын огыл, а уло кумылын ушнен.

«Икымше классыш кайыме деч ончычак сайын лудынам, возенам, тыгодым шотленат моштенам. Тидлан акам мыйым туныктен. Садланак, очыни, икымше классыште тунемаш йокрокын чучын. Туге гынат тунемаш мыланем чот келшен. Кугу Пумарий школышто чолгалыкым ончыкташ, мастарлыкым нӧлташ шуко йӧн лийын. 5-ше классыште Звенигово районышто эртаралтше турслетыш мийымем тачат сайын шарнем. Тушто краеведений секцийыште выступатленам. Тиддеч вара моло районласе турслетлаште лийынам. Тиддеч посна тӱрлӧ предмет дене районысо олимпиадылашке чӱчкыдын коштынам, но утларакшым марий йылме дене миенам. Кугурак класслаште кум ий почела шочмо йылме дене республикысе олимпиадыште лийынам. 10-шо классыште икымше верым налынам ыле», — ойла тудо.

Йоча годсек кушташ кумылан лийын. Школ пеленысе йоча ансамбльышке куанен коштын, шуко мероприятийлаште выступатлен. Спортланат шӱман кушкын. Баскетболла, футболла модаш поснак йӧратен. А университетыште  шке институтысо спорт аланлан вуйын шогаш тӱҥалын.

«Кокымшо курсышто тунемме годым тиде сомылым темленыт. Тунемме ий тӱҥалтыште кажне факультет ден институт гыч икымше курсышто тунемше-влак  футболла, баскетболла, волейболла модын ӱчашат. Мый шке институтышто икымше курсышто тунемше-влак коклаште виян командым погаш тыршем. Спортын могай видше нунылан лишыл улмо нерген пален налам да посна командылан шеледем. Вет тунемме ий мучаште тыгай модмаш-влак лийыт», - ойла Анна.

Волонтер паша Анялан палыдыме огыл. Тиде пашам тудо сайын шукта.

«Университетысе кугу мероприятийлаште, форумлаште волонтер лийынам. Тений марий калыкын Xпогыныштыжо тиде сомылым шуктенам. Майыште Йошкар-Олаште Россий президент Владимир Путин толын, «Общероссийский калык фронт» форумым эртарен ыле. Туштат лийынам», — каласкала ӱдыр.

Университетыште англичан йылмым тунемме деч посна венгр йылме дене курсышко кок ий коштын. Венгр йылмым эше сайын тунемаш манын, кокымшо курс деч вара Анна курсышто тунемше ӱдыр Екатерина Изергина дене пырля Дебрецен олашке кеҥеж курсышко тылзылан миен. Февральыште Марий кугыжаныш университетыште «Lingo-территория» фестиваль годым тудо венгр йылме урокым эртарен. Фестивальыште латиндеш йылме дене урок-влак лийыныт. Тушко студент, вузын туныктышыжо-влак да моло кумылаҥше еҥ-влак ушнен кертыныт. Ӱдырлан венгр йылме йотла огеш чуч, йылмым сайын пала.

Аня кеч-куштат чолгалыкым ончыкташ тырша, неле-йӧсӧ манын, вуйым нигунам огеш саке. Самырык ӱдыр кажне кечым пайдалын, веселан эртара, илышыште шуко уым пален налаш тырша.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: