""Кугарня" газетлан - 25 ий" рубрик, 2016 ий, Сорла тылзын 19-ше кечыже

«Кугарня» дене пырля ме педальым пӱтырена

Статьян авторжо Ирина Ямбаршева

(Тӱҥалтышыже — 12 августысо номерыште).
Шап5Эрлашыжым Кокшайск трактыш лекмеке, рульнам ондак Таир ер могырыш савырышна. Тыште каналташ жап утларак ыле, шер теммеш йӱштылна. Вара “Шап” йоча каныме лагерьыш кудална, тушто йӱдым эртараш кутырен келшыме. «Шапыште» мемнам оҥай кас вучен – «Кугарня» газетын коллективше дене пырля йоча-влакым утларак кумылаҥдаш мурызо-влак миеныт. Велосипедист ден журналист-влакым ончычсо тӱҥ редактор, а кызыт республикысе йоча тазалыкым аралыме да пеҥгыдемдыме «Шап» комплекс вуйлатышын сомылжым шуктышо Сергей Иванов порын вашлийын.
Марий бард Г.Григорьев шке йолташыже-влак дене палымым ыштен. К.Шемякин – автотурист, запасыште улшо боевой офицер, подполковник. Кушто гына лийын огыл?! А тений кеҥежым Байкал ер воктеке миен коштын. Турист муро-влакым ныл ий ончыч возаш тӱҥалын. Латкандаш ияш улмыж годым икмыняр почеламутым возен улмаш. Но 25 ий ФСБ-ште служитлымыж годым мурпаша деч торлен. Поэзий шӱлыш Константин Михайловичым ынде угыч авалтен.
Шап150 наре почеламутым возымекыже, шочмо кечыжлан йолташыже-влак гитарым пӧлекленыт. А вара бард-влакын фестивальышкышт миен коштын. Сурок деч ныл меҥге тораште верланыше Сумка ер воктене бард мурызо-влак турист семынак палаткыште маленыт, пырля изи подым да моло ӱзгарым налыныт. А кидыштышт гитар лийын. “Ятыр нелылыкым эртымеке, шӱм-чон мурым йодеш. Теве ик мурым Эльбрусыш кӱзен шумеке шоненам ыле. Спорт, ваш мутланымаш да мурым мурымаш шӱм-чоным куандарат”, — ойлен К.Шемякин да шкенжын возымо икмыняр мурым мурен.
Вес мурызо М.Мальгина – профессийже дене туныктышо. Ик жап Марий Эл Республикысе Правительстве пӧртыштӧ пашам ыштен. Кызыт сулен налме канышыште. Почеламутым возкала. Тӱрлӧ композитор полшымо дене мурыжо-влак поҥгыла шочыт. К.Шемякин дене коктын икмыняр мурым мурат. Моткоч оҥайын, сӧралын да куштылгын шомак-влакым кучылт мошта. Йӱкшӧ яндар.
Шап2А эн ондак тудо йоча-шамычлан Голландийыште велосипед дене кудалыштме нерген оҥайын каласкален. Мурызын ӱдыржӧ Эйндховен олаште ила. Лач тушто Ван Гогын “Звездная ночь” картинжым сӱретлыман велосипед корно уло. Но тушто Марта але лийын огыл. Голландийыште шукын велосипед дене кудалыштыт, тидлан эсогыл правам налман. А правилым пудыртет гын, чот наказатлат. Кудалышташ лӱмын ыштыме корно йошкар тӱсан.
А Г.Григорьев велопробегын участникше-влак дене пырля икымше-кокымшо кечылаштат лийын, марий муро-влак дене шӱм-чоныштым лыпландарен. Геннадий Владимирович самырык-влак дене пашам ышташ кумылан. Тудын полшымыж дене муро тӱняшке икмыняр мурызо пеҥгыдын тошкалын. Тачысе илышым умылен моштышо весыланат тудым умылтара, илыш тамым налаш полшенак шога.
Ты вашлиймаште кажне еҥ шӱм-чонжо дене каналтен да шканже уым пален налын. А вара бард мурызо, кугарнязе да веломарафонец-влак кол шӱр ден шашлыкым кочкыныт.
Эльвира ТЕРЕНТЬЕВА.
Нылымше кечын 63 меҥгым кудалме.

Шап4Эн кужу дистанций (88 меҥге) визымше кечын лийын. “Шап” лагерь гыч лекмеке, участник-влак Йошкар-Олашке толыныт. Печать пӧртыштӧ нуным икмыняр редакцийыште вученыт. Тыштак велопробегын кажне участникшылан «Кугарня» газет редакций деч Тауштымо серышым да пӧлекым кучыктенна. Йоча-влак “Ямде лий” да “Марий Эл” газет редакцийлаште уна лийыныт, «Политехник» ФОК-ыш пуреныт, Т.Евсеев лӱмеш Национальный тоштерыште нунылан посна экскурсий эртен.
Варажым Йошкар-Ола урем дене кудалме, Изи Какшан серыште кызыт чоҥалтше сӧрал у полат-влакым ончал савырныме. Умбакыже корно Оршанке район могырыш шуйнен. Вет Кугу Єрша ялыште Марий самырык тукым слёт эртен. Санденак велопробег дене эртыше-влакым тушко уна семын пуртенна. Тыге слетын участникше-влак дене “Кугарня” газет редакцийын вашлиймашыже оҥайын эртен. Слетышто улшо-влак велопробег нерген утларак пален налыныт, а велотурист-влак – слет нерген. «Ончыкшым мыят самырык-влакын тыгай погынымашкышт логалнем», — мане Параньга кундем гыч толшо Кирилл Колесников.
Шап6Тошто Крешын тӱҥ школышто уна-влакым эреак куанен вашлийыт. Садлан ты кастене тушто лийна. Школ директор М.Молотов шкеак кас да эр кочкышым ямдылен.
Эрлашыжым эрдене, М.Шкетанын пӧрт-тоштерышкыже пурен лекмеке, корно адакат Кужэҥер могырыш лупшалтын. Мӧҥгӧ кудалме годым нелылыкшат, нойымыжат мондалтеш.
Пытартыш кечылан корно кужыт кӱчыкшак кодын огыл ыле (70 меҥге) гынат, йоча-влак кечывал деч вара кок шагатланрак мӧҥгыштышт лийыныт.
- Корно кужу гынат, йоча-шамыч воктене нимогай нелылыкым шижын омыл. Эртыше велопробег тыглай участниклан гына огыл, мыланемат моткочак келшен. Ты гана 450 наре меҥгым кудалме. Шуко районышто лийме. Кунам эше тыгай пиал логалеш? Машинаште окнаш ончен огыл, а шкеак кажне меҥгым шижын да педальым тошкен пел республикым ужынна. Мыят “Кугарня” газетлан моткоч кугу таум каласынем. Кугу Єрша ялым ужын омыл ыле, ынде тушто лийым, — каласыш Н.Золотарёв.
Меат “Кугарня” газет редакций лӱм дене кажне участниклан, Николай Александрович Золотарёвлан, мемнам унала пуртышо-влаклан таум ойлена. Куд кече жапыште эртыме корно событийлан поян да весела лийын. Вич ий гыч адакат велопробегым эртарена гын, ушнаш кажныжым ӱжына.
Денис ОЧИЕВ.
И.Речкинын фотожо-влак.

Вело1

Вело3

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: