"Рубрик деч посна", 2016 ий, Сорла тылзын 19-ше кечыже

Поэт-влак ешаралтшаш улыт

Статьян авторжо Эльвира Терентьева

делегация из марий эл

Крым Республикыште “Таврида” форум кумшо кеҥеж эртаралтеш. Тудым тений “Таврида на Бакальской косе” маныныт. Тушто 2-8 августышто “Самырык поэт, писатель да критик-влак” смене лийын.

Марий Эл Республик гыч ты сменыш кумытын миен коштыныт: Ольга Чайникова, Елена Потапова да Татьяна Япаева.

О.Чайникова “Синяя птица” гуманитарный гимназийыште тунемын. Кок почеламут сборникше уло: “Рисуя мир вокруг себя” (2010), “Вечность в одном ключе” (2013). Нуным 17 ияш мартеак савыктен шуктен. Талантан самырык ӱдырын книгажлан рецензийым педагогика науко доктор, экономика науко кандидат, профессор М.Швецов возен да тудын нерген “Поэтессы взрослеют рано” манын. Икманаш, творчестве шотышто сай ончыкылыкым сӧрышӧ ӱдыр.

Кызыт Ломоносов лӱмеш МГУ-што тунемеш. Тудо филологий факультетын романо-германский отделенийжым ойырен налын. Специализацийже – испан йылме. Почеламутшо-влак “Литера” журналыштат савыкталтыныт.

Елена Потапован лӱмжӧ Марий Элыште тынарак палыме огыл. Тудо Москосо кугыжаныш университетын “Журналистика” факультетшым тунем пытарен. Кызыт аспирант. Кок ий ончыч “За кулисами сердца” книгам савыктен.

А Татьяна Япаевам лудшына-влак волонтёр да тӱрлӧ проект почеш организатор семын палат докан. Сылнымутлан шӱман улмыжлан кӧра тудым Крымышке шинчымашым погаш колтеныт.

- “Тавридыш” миен толмо нерген шонымаш кодшо ийынак шочын ыле. Но тунам тидым ыштен шым керт. Тенийланат ӱжмаш тольо. Тыгодым мый Финляндийыште пашам ыштем ыле. Шӱм-чонем тушко ӱжӧ, сандене палемдыме кечылан тушеч Москош пӧртыльым да Крымыш кудальым, — каласкала Т.Япаева. — Чынжымак, шкаланем шуко уым пален нальым, ятыр вашлиймаш лие. Марла возышылан кусарымаш пашам кузе шуктымо нерген лекцийым колыштнем ыле, но лач тидыжак мыланем тушто ыш сите.

Татьяна почеламут-влакым марла воза. Сандене тудын чоҥалтмыжым, почеламутышто ты але вес образым чоҥымым, шомак-влакын келшен толмыштым да молымат лончылымаш ӱдырлан лишыл лийын. Тидыже, мутат уке, шомакын вержым палаш полша, серыме пашам айда-лийже шуктымо деч кораҥда. Тыгак ӱдыр-рвезе-влак шке проектыштым араленыт.

Ик кече весыж деч ойыртемалтын. Писатель да 2001 ий годсек “Литературная газетын” тӱҥ редакторжо Юрий Михайлович Поляков дене вашлиймаш деч вара икмыняр ушан ойым ушеш пыштеныт. “Литератур тукымла дене вияҥеш. Кӧргӧ гыч ме чыланат гений улына. А лектышнам ӧрдыж гыч гына ужын, чын акым пуэн кертеш, йолташ семын”, — ойлен писатель.

Вес оҥай лекторлан Т.Япаева телевӱдышӧ, писатель, историк да профессор Игорь Леонидович Волгиным шотла. Самырык-влак дене пашам ыштен мошта, ой-каҥашым пуа да почеламут-влакым тӱткын лончыла.

Тынар палыме да пагалыме еҥ-влак дене вашлиймыжак мом шога! РФ президентын помощникше Андрей Фурсенко, журналист, РФ президентын культур шотышто советникше, Лев Толстойын кугезе уныкаже Владимир Толстой, телевӱдышӧ, “Россия-Культура” телеканалын обозревательже Владислав Флярковский, поэт Евгений Рейн да моло денат! Форумын участникше-влак нунын деч тунемыныт, Толстой ден Чеховын лийме верлаштышт творчестве шӱлышым погеныт, Ялтым, Ливадийский дворецым куанен онченыт.

“Тавридыште” самырык-шамычлан пеш кугу программе темлалтеш. Ик жапыштак 10 утла лекций лиеш. Кудыжым ойырен налаш — ӧрат. Кеч-могай опытан еҥ оҥайын да пайдалын каласкален да кӱлешан пашалан кумылаҥден мошта гын, ятыр пачаш сае.

Т.Япаева кажне кечын социальный сетьысе лаштыкыштыже ушеш кодшо ушан ой-влакым возен. Нунышт тудым у пашалан шулдыраҥденыт. Чолга ӱдыр илыме кундемыштыже (шочмо вершӧржӧ — Пошкырт кундем) ятыр корнан произведенийым (тиде ода, поэме але вес семын маналтше) возаш да автор-влак поэзий шӱлышан выступленийым ончыкташ.

Тылеч посна Татьяна Япаеван тений почеламут сборникше савыкталт лекшаш. Тудым писатель Юрий Галютин шукертак редактироватлен. Тугеже “Таврида” форумышто лиймаш марий поэзийым аклаш да ты нурым куралаш утыр кумылаҥден гын, шым кечаш тунеммаш сайын эртен — тидыже ӱдыр-влаклан пайдам конда.

Эльвира Терентьева.

Фотом Т.Япаеван альбомжо гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: