"Рубрик деч посна", 2016 ий, Сорла тылзын 12-шо кечыже

Пӧртым шкеак нӧлтат

Статьян авторжо Эльвира Терентьева

 

Кажне ийын августын кокымшо рушарнян Чоҥышо-влакын кечыштым палемдат. Такшым кызытсе саманыште профессионал чоҥышыш савырныше еҥ моткочак шуко. Марий Эл гычат ятыр пӧръеҥ тиде пашам шукташ ӧрдыж кундемлаш кудалыштеш. Тыге нуно чоҥымо сомылым пален налыт да шочмо вершӧрыштышт шке ешлан пӧртым чоҥат, пошкудыштлан полша.

Кодшо арнян Кужэҥер районышто “Кугарня” газетлан 25 ий темме лӱмеш веломарафон тӱҥалме кечын Руш Кугунур ялыште пӧртым чоҥышо-влакым ужна. Умылен нална: тыште Тошто Йӱледӱрыштӧ илыше Костроминмыт пӧртым нӧлтат. Майя Альбертовна – профессийже дене тӱҥалтыш класслам туныктышо. Кызыт Тошто Йӱледӱр школысо библиотекарьыште пашам ышта. А кидыштыже мастерокым ужмеке, ӱдырамаш да эше педагог шкеак пӧртым опта манын ӧрым.

- Пӧртым чоҥышаш верым марием Сергей Робертович ойырен налын. Теве воктенак — пелашемын ачажын пӧртшӧ. Кок олмапу шога, саскам пуа. Ты вер мыланемат келшыш. Пӱртӱс сылне, тораште огыл пӱя верланен. Икманаш, чылажат тыште илаш кумылаҥда. Газосиликатный блокым оптен шогаш нимо нелыжат уке: тушан ямде вартышым йытыран йыгалтет да блокын тӧр вочмыжым шекланет. Ик блокшо кандаш кермычым алмашта, — каласкала Майя Альбертовна. — Кок шочшем уло. Икымше пелашем, чаманен каласыман, ты тӱням шукертак коден каен. Эргына тений “Волгатехым” тунем пытарен, магистратурыш пураш ямдылалтеш. Вара кокымшо гана марлан кайышым. Адак эрге шочо. Степан школышто тунемеш, кызыт лагерьыште кана.

Пошкудыжо Владислав Горшков вес кундемлашкат чоҥышылан пашам ышташ коштеш. Ты сомылым Клим Борисоват сайын пала. Мийымына годым блок пыштымым вискала ыле. Полышкалыше моло еҥ-влакат ыльыч. Нунат тыгай пашалан шкевуя тунемыныт да ятыр оралтым чоҥаш полшеныт.

Тений Костроминмыт пӧртым тувраш йымаке пуртынешт. А кӧргысӧ пашам вес ийлан кодат. Такшым пӧртлан негызым кум ий ончычак пыштеныт. Но окса чӱдылан кӧра тудым нӧлтен кертын огытыл. Суртоза Йӱдвелыш пашаш кудалыштеш. Оксам поген, моло сомылым эркын-эркын шукташ шонат. Пӧртлан проектым вате-марий коктын шоненыт. Кугытшо дене тудо изижак огыл: кӧргӧ гыч висаш гын, лопкытшо 6 метр, а кужытшо 10 метр лиеш. Воктеныжак ош кермыч дене верандым чоҥаш тӱҥалме. Икманаш, пӧрт кажне кечын “кушкеш”.

Ты мутланымашна да вашлиймашна Костроминмыт ешланат палым кодыжо манын, “Кугарня” газетын тӱҥ редакторжо Э.А.Иманаев пӧрт пырдыжеш ик газосиликатный блокым вераҥдыш. Вашешыже оза-влак “Кугарня” газетым йӧратен лудаш да подпискым ышташ товатлышт.

Эльвира Терентьева.

И.Речкинын фотож-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: