"Улам мый Рве-зы-лык!" рубрик, 2016 ий, Сорла тылзын 12-шо кечыже

Самырык ме улына! Ме марий улына!

Статьян авторжо Денис Очиев

слёт27-11 августышто Оршанке районысо Кугу Ӧрша тӱҥ школышто Российысе марий самырык тукымын VIII слётшо эртен. Вич кече жапыште ӱдыр-рвезе-влаклан оҥай лекций, кӱлешан тренинг, проект-шамычым возаш туныктышо мероприятий-влак лийыныт. Виче, Одо, Пермь, Пошкырт, Свердловск, Татарстан кундемла да Марий Эл Республикын чыла гаяк районжо гыч 80 наре самырык еҥ слётыш ушнен.

Участник-влакым ныл лужалан шелыныт: «Тулвий», «Рвезылык», «Кутко еш», «Ӱжара». Эн тале-влак кокла гыч ныл лужавуйым ойырымо: Анна Васильева (Йошкар-Ола), Инна Конокпаева (Одо), Софья Шарабуева (Татарстан), Алексей Ибулаев (Пошкырт).

Самырык министр-влакат пашам кыртмен ыштеныт: тӱҥ министр – Игорь Эштуков (Курыкмарий район), образований министр – Татьяна Козлова (Оршанке район), тӱвыра министр – Людмила Карпова (Морко район), тазалык министр – Надежда Ильина (Волжский район), аралыше министр – Михаил Кубеков (Курыкмарий район), тӱшка увер министр – Вероника Мустаева (Шернур район).

Чоным тарватыше да вучымо ик событий – слётым торжественно почмаш. Тышке пагалыме шуко уна толын: Россий Кугыжаныш Думын депутатше Лариса Яковлева, Марий Эл Республикын образований да шанче министрже Галина Швецова, тӱвыра, печать да национальность паша шотышто министрын алмаштышыже Галина Ширяева, Марий Эл Республикын Кугыжаныш Погынжын вуйлатышын алмаштышыже, 2012-2016 ийласе Марий Оньыжа Анатолий Иванов, Мер Каҥашым вуйлатыше, Марий Оньыжа Эдуард Александров, Марий Элысе «Калык фронтым» вуйлатыше Надежда Ефремова, Оршанке район администраций вуйлатыше Леонид Безденежных, Оршанке районысо депутат-влак погыным вуйлатыше Александр Плотников. Ӱмаште Марий самырык тукым слёт Провой кундем Чакмарий школышто лийын. Тиде школын директоржо Владимир Кашков слётым эртараш эстафетым Оршанке район Кугу Ӧрша школ директор Сергей Кузьминыхлан пуэн.

Кажне кече моткоч оҥай да кӱлешан мероприятий-влаклан поян ыле. Икымше кечын «Марий мер толкынын вияҥме корныжо» лекцийым историй шанче кандидат Сергей Свечников лудын.

Пашам ыштымеке, веселан каналтыме шуэш. Икымше кастене марий шӱлышан весела дискотеке лийын. Верысе калыкат пайремышке ушнен. Тыгаяк чапле дискотеке слётым петырыме кечын лийын.

Кажне кастене лужа-влак «изи тул» воктене погыненыт. Тушто нуно эртыше кечын мом ыштыме нерген мутланеныт. Слёт пашан сай улмыжо тыгодым шижалтын. Ӱдыр-рвезе-влак, чоныштым почын, чыла келша манын ойленыт.

«Проект пашан тӱҥжӧ», «Оҥайын шонен моштымаш», «Тӱшка пайремым ямдылымаште да эртарымаште тӱрлӧ йӧн», «Марий калыкын ойыртемже» занятий-влак кокымшо кечын лийыныт.

«Самырык тукым, кушто улат?» теме дене «йыргешке ӱстел» годым слётын почётан унаже-влак самырык еҥ-влаклан илышыште шке шонымашышт дене каяш ойленыт. Кастене Кино идалык дене кылдалтше мероприятийым эртареныт. Тушко М.Шкетан лӱмеш марий кугыжаныш драме театрын артистше-влак – Светлана Строганова ден Василий Домрачев толыныт. Киношто сниматлалтше артист-влак киносъёмко годым лийше оҥай историй-влак дене палдареныт.

Игече шокшо шоген, но тиде ӱдыр-рвезе-влакым тургыжландарен огыл. Кугу Єрша ял воктене памаш вӱд ден эҥер йогат. Яра жап лиймеке, чыланат тушко йӱштылаш куржыныт.

«Кугарня» газет пашаеҥ-влак кумшо кечын нунын деке унала миеныт, вашлиймашым эртареныт.

Слётын тӱҥ пашаже – самырык-влакым проектым возаш туныкташ. Кажне лужа шке проектшым возен да комиссий ончылно тудым арален. Эн сайже-влак дене умбакыже пашам ышташ тӱҥалыт.

Слёт кугу тулото дене пытен. Участник-влак сылне марий муро-влакым муреныт, слёт нерген шонымыштым почын пуэныт. Вес ганат тушко уло кумылын ушнаш мутым пуэныт.

Фото-влакым «Арслан» журнал гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: