"Рубрик деч посна", 2016 ий, Сорла тылзын 12-шо кечыже

Тазалыкым аралыме йодышым шымла

Статьян авторжо Светлана Кушакова

10 августышто Куяр поселкысо “Каменная речка”  санаторий   профилакторийыште йоча да подростко-влаклан финн-угор лагерь пашажым иктешлен.

НастяӰдыр-рвезе-влак дене мутланыме годым кажныже каласен: нунылан лагерьыште канаш келшен. Тыште кажне кече иктаж-мо дене шарнымашеш кодын. Кажне отряд нерген пырдыжгазет каласкала. Икте-весе дене палыме лияш яра жап годым веле огыл йӧн пуалтын. Нуно икой дене илаш тӱрлӧ тернинглаште тунемыт. Тӱрлӧ оҥай занятий-влак эртаралтыт. Ик вере карел калык аралтыш курчакым ышташ, вес пӧлемыште кӱсле дене шокташ туныктат, калык промысел мастерской пашам ышта. Викторинылаште, конкурслаште шке мастарлыкым ончыкташ лиеш. Икманаш, лагерьыште чылажымат самырык тукымын пайдажлан ыштыме.

Тыгак ойла лагерьын ик участницыже Анастасия Дубникова.

Настя — Волжский район Корамас кундемын ӱдыржӧ. “Мый “Аллея “Сирень победы” социальный проектым ямдыленам. Тиде проект дене эн ончыч районышто сеҥенам, вара республикысе проект-влак ярмингаште Йошкар-Олаште участвоватленам. Школысо тӱрлӧ мероприятийлашке коштам, сайын тунемаш тыршем. Тидымак шотыш налын, очыни, мыланем тышке путевкым пуэныт”, - ойла ӱдыр.

Настя кызыт луымшо классыш вончен. Шошым химий, биологий дене экзаменым пеш сайын кучен. Тыгай пагытыште кажне ӱдыр-рвезе шке ончыкылыкшо верч тургыжланат, могай корным ойырен налме нерген шонкалат. Настя Дубникова врач лийнеже. Тидлан чот ямдылалтеш. Школ деч вара Озаҥысе медицине академийыш тунемаш пураш шона. “Врач – пеш ответственный паша. Тидлан шкем ончылгоч ямдылен шогыман. Мыланем еҥ-влаклан полшаш келша. Тыге кӱлешлыкем, пайдале улмем шижам”, - манеш тудо.

Лагерь — финн-угор калык-влакым ушышо вер. Тышке тӱрлӧ кундемла гыч чолга ӱдыр-рвезе-влак толыныт. Нуно илышым саемдаш шке шонымашышт дене икте-весым тыште палдарат. Настят кажне делегаций дене палыме лийын, йолташ-влакым муын. Умбакыжат нунын дене кылым кучаш шона. “Ынде Пермь, Угарман кундемлаште, Коми, Удмуртий, Мордовий республиклаште йолташем-влак улыт. Нуно шке организацийыштышт лидерлан шотлалтыт. Мыят нунын койышышт, пашашт гыч улан тунемам, шканем пайдам налам. Шонем: Интернет гоч кылым умбакыжат кучаш тӱҥалына”, — манеш ӱдыр.

Н.Дубниковам тӱҥ шотышто ялысе медицине йодыш тургыжландара. Шукерте огыл “Здоровые дети – здоровая нация” проектым арален. Тидлан школышто тунеммышт годым , йоча-влакын тазалыкышт молан начарештеш — шымлен.

Ял-влак пустаҥме йодыш пӱсӧ. Кызыт шукынжо сай паша верым кычалын, шочмо верыштым коден каят. Ялозанлыкым вияҥдаш, образований, медицине системым саемдаш кӱлеш”, — манеш тудо.

Шкежат, вузым пытарымеке, самырык специалистлан ялыште пашам ышташ йӧн лиеш гын, шочмо верышкыже пашам ышташ толаш кумылан.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: