"Айдеме да закон" рубрик, 2016 ий, Сорла тылзын 12-шо кечыже

27 ий правам аралыме органлаште

Статьян авторжо Светлана Кушакова

Тений милицийын отставкысе прапорщик Петр Митрофанов чапле лӱмгечыжым палемда: 40 ий ончыч, армий деч вара, правам аралыме системыш пашаш толын. 13 ий утла МВД-н внутренний войскаштыже служитлен, тынарак вневедомственный охраныште пашам ыштен. Тудын йочаже-влакат илышыштым правам аралыме паша дене кылденыт.

митрофановПетр Митрофанов Морко районышто шочын. Краснодарский крайысе Тихорецк олаште водительлан тунем лектын. 17 ияшыж годым, правам налмеке, Новокубанский станицыште шоферлан пашам ышташ тӱҥалын. Вара военкомат гыч повестке толын.

Армий деч вара шочмо Морко поселкышко пӧртылын. Службым тушто эртымыже, шкем сай могырым ончыктымыжо пашаш пураш полшен: Петр Митрофановым СССР МВД внутренний войскан Казанский полкшын посна ротышкыжо служитлаш налыныт. Тудыжо 3997-ше воинский часть семын палыме лийын. Ты подразделенийын тӱҥ пашаже — Морко колонийыште (официально ОШ 25/2 маналтын) шинчыше-влакым оролаш. Тушто кугу ранган тӱрлӧ пашалан титаклыме прокуратур, МВД, КГБ пашаеҥ-шамыч, эсогыл судья-влакат наказанийым эртеныт.

1989 ийыште ты тӧнеж петырналтын. Туге гынат Петр Аркадьевич службым кодаш шонен огыл. Ешым ончаш, пукшаш кӱлын. Тиде жаплан кумшо йочаже, Анастасия ӱдыржӧ, шочын. Ончычсо паша верыште погымо опытшо, ИТСО вуйлатыше марте кушмыжо сай пашаеҥым умбакыже ты сферыштак кодаш амал лийын.

Тыге Петр Аркадьевичым Морко район милиций отделысе тунам почылтшаш гына вневедомственный охране пӧлкан задержаний группыжын милиционержылан шогалтеныт. Тудым ты службын икымше пашаеҥже-влак радамыш пурташ лиеш.

2002 ийыште Петр Митрофанов пенсийыш лектын. Но тудо паша деч посна шинчаш тунемын огыл. Кызыт МВД ветеран организацийын Морко районысо пӧлкажым вуйлата.

Тыгак 2015 ий февраль гыч федеральный казначействын республикысе управленийжын Морко районысо пӧлкаштыже охраным вуйлата. Но шке йӧратыме пашажымат коден огыл, манаш лиеш: МВД-н эртарыме тӱрлӧ акцийышкыже уло кумылын ушна.

Петр Аркадьевичын кум йочажат ача корным ойырен налын: кугурак эргыже полиций майор марте кушкын, кыдалаш ӱдыржӧ отставкыш кайымыж деч ончыч Салехардысе ГИБДД-ын административный практикыж шотышто инспекторлан пашам ыштен. Кызыт изирак ӱдыржӧ МВД-н Нижний Новгородысо академийыштыже тунемеш. Россий Следственный комитетын Чувашийысе управленийжын резервыштыже улеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: