"Корнывожышто вашлиймаш" рубрик, 2016 ий, Идым тылзын 16-шо кечыже

Илышат пародий гай, умылен веле мошто

Статьян авторжо Татьяна Иванова

Советский район Шуарсола кундемыш командировко дене мийымына годым “Кугарня” газетна поро йолташыже Андрей Васильев деке унала пурышна.

Тудлан мийымына нерген ончылгоч увертарен огынал, пӧртшӧ воктеке шогалын, уло-укем веле пален налнена ыле. Вашешна кече семынак порын шыргыжалын, Андрей Ефимович лекте.

“Мемнан кундемыш толында да огыда пуро гын, товатат нелеш налам ыле”, — шыргыжалын мане.

Ялыште вес шӱлышак: пакчаште пареҥгым, пакчасаскам поген налме, мландӱмбалне ковер гай койын, йогышо олма-влак кияш. Пеледыш чоным куандара. Андрей йолташна вигак олмам погаш наҥгайыш да йокмам пуэн колтыш.

Пӧрт кӧргат пеш мотор, шке манмыжла ХХI курымышто илена, чылажат йӧнан да илышлан келшен толшо лийшаш. Теве туштак сауна сынан монча, пӧртыштак душевой кабине да мойн…

Андрей Васильев — усталык шӱлышан еҥ, гитарым шокта, мура, мурылан семым я почеламутым воза. Самырыкше годым, 1982 ийыште музучилищым тунем толшо Эдуард Зырин дене Шуарсолаште “Висвис” ансамбльым чумыреныт. Ты группо шке районышто веле огыл, моло вереат палыме лийын шуктен. Теве ӱмаште “Воштылаш, товатат, сулык огыл” конкурсышто муро пародийже дене икымше верым налын ыле. Тений угыч у костенечым — Виктор Комаровым койдарен мурымо номерым — ончыктен. “Виктор Комаров 50 ияш усталык каш эртарыш, тудым саламлаш шарнымашеш кодшо муро кӱлын. Шинчым да иктаж шагат жапыште пародий шочо. Гитарым шокташ Йошкар-Оласе совхоз-техникумыш тунемаш пурымек, тунемынам. Кокам семӱзгарым налын пуэн, группышто ик рвезе шоктен мошта ыле, тудо туныктен. Южо кечын тунемаш огына кай, пӧлемыш петырналт шинчын, гитарым шоктенна. Пединститутын тӱшкагудышто илыше родем деке унала коштам ыле, фойеште гитарым шоктем, а тушто тунемше ӱдыр-влак “Андрей, шокталте, ме мурена, маныныт”, — шарналта семмастар.

Андрей Васильев Шуарсола воктенысе Тошлем ялыште шочын. Ешыште вич йоча кушкын, кум акаже да ик шольыжо уло. Кызыт шольыжо шочмо ялыштыже у пӧртым чоҥа, иза полшаш коштеш. “Ачам пеш ондак колен, индеш ияш коднам. Авалан шуко нелылык логалын гынат, весылан марлан каен огыл. Шуарсолаште кандаш классым тунеммек, Йошкар-Олашке каенам, техник- механиклан тунем лектынам”, — умбакыже ойла Андрей Ефимович.

Вара армийыш каен. Куйбышев олаште мотострелковый дивизийыште порысшым шуктен, старший сержант званий дене мӧҥгыжӧ пӧртылын. Икмыняр салтак йолташыже ден тачат пеҥгыде кылым куча, икте-весе деке унала коштыт.

Теве Чувашийыште Петр Филиппов ила, прокурорлан пашам ышта. Тудо Андрейым армий деч вара Саратовысо юридический институтыш пырля тунемаш каяш ӱжын, рвезе окса укелан кӧра каен огыл. А вет тунемаш пеш кертеш ыле. Филиппов армийыште служитлымыж годым ешан лийын. Андрей тудын шӱмбелжылан сай савыртышан, кумылым куандарыше, поро мутан серышым возен, а вара Петя тидымак пелашыжлан шке кидше дене угыч возен колтен. Армийыштак Татарий гыч улшо Юрий Васильев ден Андрейым изак- шоляк улыт манын шоненыт. Нине кок йолташ Андрий Ефимовичын 50 ияш лӱмгечышкыже толыныт.

Марий рвезын паша корныжо Йошкар-Оласе автобазыште тӱҥалын. Тушто ик ий шке специальность дене пашам ыштымек, шочмо верышкыже толын, председатель Василий Иванович Павлов ӱжын: “Мом ала-кушто илен кошта, ялыште пачерым чоҥена, колхозышто самырык вий кӱлеш”. Колхозын пуымо пачерыште кок ӱдыр шочын. Пелашыже Юлия Ивановна Шуарсола школышто марий йылме ден литературым туныктен, вара йочасадым вуйлатен.

Андрей Ефимович ондак трактор бригадын бригадирже лийын, 25 ияш улмыж годым ялсоветым вуйлаташ ӱшаненыт. “Висвис” ансамбльыште мурен. Уста еҥым Советский районысо “Район илыш “ газетыш пашаш ӱжыныт. МарГУ-што историй ден филологий факультетыште заочно тунем лектын. “Ныл ий корреспондентлан пашам ыштыме жапым эн веселалан да оҥайлан шотлем. Тышечын Йошкар-Олашке куснышым, “Плёс агур “ газетын редакторжо да “Плёс! фирмым вуйлатыше Вячеслав Воронцовын алмаштышыже лийым. Индеш ий жапыште шуко сай паша ышталтын”, — шарналта тудо.

Но илыш ончыко кая. Тудо таче пашам ышташ Москвашке кудалыштеш. Ялыште тудым пагалат, колыштыт. Вет мер пашам виктарен моштымыжо моткочак кӱлеш. Ялсовет тораште верланен, колхоз шаланен, кӧ кузе мошта, туге ила. Шошым Москва гыч толмекше, кевыт ончылно тыгай сӱретым ужын: чыла вере куштыра, яра кенча кият, кузе тыгай марте илен шумо? Увертарымашым сакен, калыкым субботникыш луктын, уло уремым эрыктен шынденыт. Ял воктенак кӱсото уло. Тушто иктаж 80 ий наре нимогай кумалтыш эртен огыл. Ялыште 50 ийыш шудымо пӧръеҥ-влак колаш тӱҥыныт, тӱрлӧ туткар лиеден, тидат Андрей Васильевым тургыжландарен. Тудо ӱмаште шыже кумалтышым эртараш калыкым тарватен. Эн ондак онаеҥ А.Таныгин деке миен, тудым отыш конден, ончыктен коштыктен. Марий йӱлам пӧртылташ кӱлмӧ нерген ойлен. Тыге Юмым сӧрвалаш лектыныт.

Волгыдо чонан да шке калык, ял верч чон коржын илыше пӧръеҥлан кажне кече шке семынже сӧрал. Виктория уныкаже куандара. Марина ден Ирина ӱдыржӧ-влак тыматле, ача- авам пагален моштышо кушкыныт. Марина Москваште ила да пашам ышта, МарГУ-што логопед-психологлан тунем лектын. Ирина Кировысо медакадемий деч вара Шернур районысо Казанский селаште врачлан пашам шыта. Тудлан, ялышке пашам ышташ толшо специалистлан, кугыжаныш ик миллион теҥге оксам пуэн.

“Мыйым мурызо манын увертарымылан тореш улам. Музыкант омыл. Мыйын шонымаште, мурызо музучилищым але вузым тунемын пытарышаш, ӱмыржӧ мучко ты аланыште сомылжым шуктышаш. Таче радио дене кӧ ок муро, чылан мурызо улыт. Ик- кок мурым мурымо деч вара мурызо от лий. Мылам тиде чон йодмо сомыл веле”, — мане “Ой, таҥем, таҥем”, “Марий сӱан”, “Эртыш сылне пагыт” да моло муро гоч мыланна палыме Андрей Васильев.

Марий пӧръеҥын чон аланжым гитар семже тек ончыкыжымат луштара, молынат шокталтен колтымыжым колыштын, кумылышт нӧлтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: