"Улам мый Рве-зы-лык!" рубрик, 2016 ий, Идым тылзын 30-шо кечыже

Колумбын поэзийже сеҥымашке конда

Статьян авторжо Анастасия Эманова

24 сентябрьыште Ханты-Мансийск оласе кугыжаныш художественный тоштерыште «Югра многоликая» многоязычный антологий негызеш «Марий сылнымут лаштык» сылнымут гостиный эртен. Тушто Марий Эл гыч ныл студент участвоватлен. Нунын коклаште иктыже – Морко район ӱдыр Христина Иванова.

Христина кызыт МарГУ-со калык культур да тӱвыра кокласе кыл институтышто нылымше курсышто тунемеш. Марий йылме ден литературым да англичан йылмым туныктышо лияш ямдылалтеш.  

Христина ИвановаЧолга ӱдыр Весшӱргӧ ялыште шочын-кушкын. Изинек поэзийлан шӱман лийын. Шочмо ялысе тӱҥ школышто тунеммыж годым сылнымут конкурслаште мастарлыкшым ончыктен. «Кокымшо классыште районысо Колумб лудмаште «Йоча ден кече» почеламутым лудынам да кокымшо верым налынам. А кумшо классыште тунемме годым республикысе тыгаяк конкурсышто икымше вер дене палемдалтынам. Тунамак шкежат почеламутым возаш тӱҥалынам. Валентин Колумбын поэзийже мыланем эн лишыл, эн оҥай да сылне. Тудын мурсаскаже-влак шонаш таратат да творчествылан кумылаҥдат. Икымше почеламутем Зорька имне нерген лийын. Тудым «Ямде лий» газетыште савыктеныт ыле. Вара почеламутым возымым ик жап чарненам, а шукерте огыл угыч ты пашалан кумыл лектын, йӧратымаш нерген утларак возем.  

Весшӱргӧ школ деч вара Волаксола кыдалаш школыш каенам. Тушто тунемме годым 2011 ийыште «Талантливая молодежь Моркинского района» конкурсышто участвоватленам. Туштат Валентин Колумбын почеламутшым лудынам да икымше верым налынам. Тиде сеҥымашлан кӧра мыланем эстон мландыште лияш пиал шыргыжалын. Морко район гыч шочмо йылмым да литературым туныктышо-влак Эстонийыш марий йылме, тудын тӱвыраж дене палдарыме урок мероприятийым эртараш миен коштыныт. Нунын дене пырля мый шкет йоча лийынам. Сауэ оласе ик гимназийыште мый марий мурым муренам, почеламутым лудынам, тидын дене марий йылмын моторлыкшым ончыктенам. 

Школ деч вара МарГУ-ш туныктышылан тунемаш пуренам. Мыйын авам туныктышо, садлан тиде профессий изинек чонемлан лишыл.            

Икымше курс гычак чолгалыкым ончыкташ тыршенам. «Студвесна», «Голос Юности» фестивальлаште марий сценке-влакым ик факультетыште тунемше йолташ-влак дене модын ончыктенна. Волонтер семын университетыште тӱрлӧ мероприятийым эртараш полшем», - ойла ӱдыр.

Христина марий улмыж дене кугешна. Марий калыкын тӱвыраже, койышыж дене тӱрлӧ мероприятийыште палдара. Тений шошым «Национальное достояние» Российысе конкурсышто кокымшо верым налын. «Конкурс Озаҥыште эртен. Мый йӧратыме поэтемын ик почеламутшым марла лудынам. Пеш шуко участник лийын, кажныже уста да чолга.   «Сылнымут» номинацийыште кокымшо вер дене палемдалтынам. Мыланем диплом деч посна пу гыч национальный тӱр дене сӧрастарыме кубкым, ятыр книгам кучыктеныт. 

Шукерте огыл Ханты-Мансийскыште ныл студент лийынна. Пырля тунемше Анна Смирнова, Анжелика Крылова да Дмитрий Пайбулатов «Югра многоликая» многоязычный антологий негызеш «Марий сылнымут лаштык» сылнымут гостиныйыште участвоватленна. Тушко Сургут, Нижневартовск, Лянтор, Нягань олала, Федоровский, Салым поселкылаште  илыше марий-влак погыненыт ыле. Ме тушто марий тувырым чиен, калык куштымаш-влакым куштен, мурым мурен ончыктенна, поэзийна дене палдаренна», - манеш Христина.

Х.Иванова киноштат сниматлалтын. «Ший Пампалче» фильмыште тудо – тӱҥ героинян йолташ ӱдыр-влак кокла гыч иктыже. Тыгак фильм тӱҥалме годым Христинан йӱкшӧ кадр шеҥгелне йоҥга.

Студентке пашалан кожмак. Тудо тунемеш, культур мероприятийлаште участвоватла, тыгак Йошкар-Оласе «Чаплин» клубышто марий дискотекым вӱда. «Идалык Марий тӱвыра рӱдерыште пашам ыштенам. Но тунеммаште почеш кодаш огыл манын, рӱдер гыч каенам. Туге гынат тушто ыштыме паша – кугу опыт. Кызыт «Чаплин» клубышто марий дискотекым вӱдем. Ончыч Мурызо Эчан дене пырля вӱденна. Кызыт ик тылзе мый вӱдем, весын – тудо.

Шуко гана мый дечем палымем-влак мурым мураш йодыныт. Бард Геннадий Григорьев, мурызо Станислав Устюгов почеламутем-влаклан семым возаш темленыт. А мый ала-молан ӧрам. Такшым школышто тунемме годым чӱчкыдын шкет муренам. Кызыт мурым возаш шонымаште уло», – палдарыш Х.Иванова.

Христина артист койышыжо ачаж деч куснен манын ойла. Ачаже мыскарам ышташ йӧрата, устан тавалтен мошта.

Ончыкылык туныктышын шонымашыже ятыр. Садлан нунын дене ончылгоч палдараш ок тошт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: