"Рубрик деч посна", 2016 ий, Идым тылзын 30-шо кечыже

Марий ӱдыр Сергей Шойгум ӧрыктарен

Статьян авторжо Татьяна Айтова

Тений шошым Москваште военный вуз-влак коклаште КВН лийын. Курсант-влак Россий обороно министр Сергей Шойгун призше верч таҥасеныт. Тушто  Санкт-Петербургысо физический культур военный институтын курсанткыже, марий ӱдыр Марина Колесникова выступатлен.

Еш — эҥертыш

Марина Сахалинский областьысе Леонидово поселкышто шочын. Ачаже Александр Евгеньевич военный летчик лийын, МИ-8 дене чоҥештылын. Садлан ик вер гыч вес верыш илаш куснаш чӱчкыдын пернен.  Ӱдыр ондак Сахалин областьысе, вара Абхазийысе школлаште тунемын. Тылеч вара Йошкар-Оласе школышто шинчымашым поген. Маринан ачаж ден аваже марий улыт. Коктынат Йошкар-Олаште шочын-кушкыныт. Аваже  Татьяна Олеговна –  математикым туныктышо, курыкмарий писатель, драматург Иосиф Беляевын уныкаже. Кызыт пелашыж дене пырля Моско деч тораште огыл илат, пашам ыштат. Маринан кочаже Олег Беляев  почеламутым рушла возкала. Дмитрий изаже – Санкт-Петербургысо политехнический университетын студентше. Ятыр родышт Марий Элыште ила.

 

Спорт шуарен

Марина изинек моткоч чулым ӱдыр кушкын. «Авамын ойлымыж почеш, ик верыште кужу жап нигунам шинчен омыл, эре иктаж-мом ыштенам, - каласкала курсантке.– Карандашыш тасмам кылденам да лупшен коштынам, художественный гимнастке улам манын ойленам. Лывырге капкылан лийынам, садлан Южно-Сахалинск олаште илыме годым авам спортивный гимнастике кружокыш колтен. Мылам тушто моткоч келшен. Алина Кабаева але Светлана Хоркина гай чемпионко лияш шоненам. А Йошкар-Олаш толмек, «Юбилейный» спорткомплексыш кошташ тӱҥалынам. Тренерем Татьяна Ивановна Кочеганова шуко сай каҥашым пуэн. Тудын полшымыжлан кӧра спортивный гимнастике дене спорт мастер лӱмым сулен налынам».

Спортивный гимнастике деч посна ӱдыр фаершоу дене заниматла. Йошкар-Олаште эртаралтше тӱрлӧ мероприятийлаште ик гана веле огыл участвоватлен. «Латик ияш улмем годым еш дене теҥыз воктеке канаш миенна. Тушто мый тулым «пӱтыркалыше» ӱдырым ужынам, - каласкала Колесникова. – Мылам тиде «модыш» оҥайын чучын. Мӧҥгӧ пӧртылмек, тасмаш пушкыдо модышым кылденам да йырем пӱтыркаленам. А икана Йошкар-Оласе Набережный воктене фаершоум ямдылыше-влакым вашлийынам. Палыме лийынам, а вара кажне кечын нунын деке коштынам. Эркын-эркын тӱрлӧ сынан элемент-влакым ышташ тунемынам. Латикымше классым тунем пытарымек, цирковой артист, воздушный гимнастке але факир лияш шоненам. Тунамак  скалолазаний секцийыш кошташ тӱҥалынам. А эн мастар фаерщик-влак  Санкт-Петербургышто улмым пален налмеке, лач тушко тунемаш каяш кумылаҥынам».

 

Военный институт

чоным савырен

Но ик жап гыч чылажат вашталтын, ӱдыр военный институтыш тунемаш пурен. Кызыт Марина  визымше курсышто тунемеш. «Военный лияш моткоч кугу чап веле огыл, тыгак неле, но суапле паша. Тыгай вузыш тунемаш пураш конкурс кугу, — ойла Марина. — Тидлан профотборым эртыман. Тудо икмыняр этап гыч шога. Ондак физический подготовкым, тазалыкым тергат, тыгак спортын иктаж видше дене разряд уло але укем шотыш налыт. Тылеч посна математике, руш йылме, биологий дене ЕГЭ балл-влакым ончат. Абитуриентын ешыштыже военнослужащий уло гын, тиде эше сайрак».

Военный режим дене илаш куштылгыжак огыл, поснак ӱдыр-влаклан, но Мариналан чылажат келша. «Общежитийыште распорядке почеш илена, — ойла курсантке.- Ӱдыр-влак шагалын улына. Марий Эл гычат икмыняр ӱдыр-рвезым палем. Ме ваш-ваш келшен илаш тыршена. А ты институтыш тунемаш пурымемлан ик ганат ӧкынен омыл. Тыште мый икымше гана парашют дене тӧрштенам. Тунам лач шочмо кечем ыле. Коло ик ийым темымем тыге оҥайын пайремлымем ӱмыреш шарнаш тӱҥалам. Парашют дене кок гана тӧрштенам. Тыгак акваланг дене  икмыняр гана вӱд йымаке воленам. Каласен мошташ лийдымын оҥай!  Тунемме жап писын эрта. Каникулыш кеҥежым кумло кечылан, телым  латныл кечылан колтат. Тылеч посна каныш кечын увольненийыш каяш лиеш».

 

КВН куандарен

Ӱдыр институтысо чыла мероприятийыште участвоватла. Теве военный вуз-влак коклаште эртаралтше КВН-ыш кумылын ушнен. «Утомленные физкультурой» командыште выступатлен. Мероприятий Россий армийын театрыштыже эртен. Финалыште индеш команде таҥасен. Залыште Сергей Шойгу ден Александр Масляков лийыныт. «Номер ден мыскара-влакым лекций ден строевой подготовко кокла гыч ямдыленна, — каласкала Марина. – Реквизит ден костюмым шкеак ыштенна. Таҥасаш оҥай лийын, а шӱм чыташ лийдымын вургыжын».

Йӱла почеш обороно министр эн сай болельщик суворовец-нахимовецлан кидшагатым, а КВН-ыште эн сайын модшо еҥлан фуражкым пӧлеклышаш. Икымше верыш Воронеж оласе военно-воздушный академийын «Седьмое небо» командыже лектын. Санкт-Петербургысо физический культур военный институтын «Утомленные физкультурой» командыже кокымшо верым сеҥен налын. Мучашлан Сергей Шойгу Марина Колесниковам эн сай модшо семын палемден да фуражкыжым пӧлеклен! Ӱдырын акробатикыже, капкыл лывыргылыкше ончаш толшо кажне еҥын чонжым савырен.

 

Яра жап пеш шерге

Военный институтышто тунемше-влакын яра жапышт уке гаяк. Но чолга ӱдыр чылаланат жапым муэш. Марина воздушный акробатике дене заниматла, танцевальный курслашке коштеш, хип-хоп ден кантемпым кушта. Тыгак пианино, гитаре дене шокта. Кидпашам ышташ пеш мастар, крючок, спице дене пидеш, бисер дене тӱрлӧ сылне ӱзгарым ямдыла, урга. А эн чот тӱрлӧ когыльым кӱэшташ йӧрата. «Военный ӱдыр чылажат ыштен моштышаш, — мане курсантке. – Чолга да лӱддымӧ лийме деч посна чон моторлыкым, женственность манмым арален кодаш кӱлеш, шонем».%d0%bc%d0%b0%d1%80%d0%b8%d0%bd

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: