"Улам мый Рве-зы-лык!" рубрик, 2016 ий, Идым тылзын 30-шо кечыже

Ме финн-угор улына

Статьян авторжо Анастасия Эманова

21-24 сентябрьыште Удмуртийыште «Палэзян» молодежный этнокультур VIтӱнямбал финн-угор фестиваль эртен. Тӱрлӧ мероприятий, мастер-класс, «йыргешке ӱстел», выставке, концерт лийыныт. Марий Эл гыч мастарлыкшым «Куат» группо ончыктен.  Марий йылмын моторлыкшо дене самырык возышо Вера Гордеева палдарен.

3n6yyewo24Палэзян удмурт йылме гыч кусараш гын пызле лиеш. «Пызле» фестивальын икымше кечынже Мордовий гыч толшо «Од Варма» арт-театрын участникше-влак да Удмурт тӱвыра колледжын студентше-влак вашла шке калыкыштын мурышт, куштымашышт, костюмышт дене палдареныт.

Ижевскысе Калык келшымаш пӧртыштӧ самырык удмурт сӱретчын «Скрытые знаки» выставкыже ончыкталтын. Туштак «Ингож» молодежный альманахын презентацийже лийын.

Фестивальын кокымшо кечынже участник-влак «Орнаментальные мотивы: традиция и современность» темылан «йыргешке ӱстел» йыр погыненыт. Кызытсе саманыште национальный тӱрын кӱлешлыкше нерген мутланеныт.

«Бобровая долина» этнокомплексыште (Ижевск) финн-угор рок-группо-влакын артистышт дене вашлиймаш лийын. Тушто Марий Элысе «Куат» группын участникше-влак мастарлыкыштым ончыктеныт, тыгак Ижевск оласе 11-ше №-ан школышто тунемше-влак дене шкешотан урокым эртареныт. Йоча-влаклан Марий Элын мотор верлаж нерген каласкаленыт, итальян ӱдырын марий мландыш толмыж нерген фильмым ончыктеныт, шӱвыр да моло марий национальный семӱзгар дене шокталтеныт да муралтеныт.

«Пызле» фестивальын участникше-влак «Лудорвай» архитектурно-этнографический тоштер-заповедникыште этнокасыште участвоватленыт. Мероприятий «Сельское сакральное пространство народов Урало-Поволжья» тӱнямбал полевой этнографический симпозиум годым эртен.

Тений фестивальыш коми, марий, удмурт да мордва самырык возышо-влак миеныт. Нуно «Кенеш» литературно-художественный да мер-политике журнал редакцийыште, Удмурт кугыжаныш университетын удмimage208689675урт филологий, финноугроведений да журналистике факультетыштыже эртыше вашлиймаште творчествышт дене палдареныт.

23 сентябрьыште Армянский Апостольский черкыште кантеле дене шоктышо финн ӱдыр Минна Раскинен, удмурт мурызо Надежда Уткина, удмурт национальный семӱзгарым – крезьым – ыштыше мастар-влак дене вашлиймаш лийын.

«Палэзян» «Аксион» тӱвыра полатыште чапле гала-концерт дене пытен. Тушто фестивальын участникше-влак чылан пырля «Мы финно-угры» мурым муралтеныт.

«Тиде фестивальышке ме «Куат» ансамбль (солисткыже — Марина Садова) дене миенна. Мый самырык возышо семын Марий Эл гыч лийынам. Тыгак коми, удмурт, мордва возышо-влак лийыныт. Ме удмурт студент-влак дене, газет да журнал редакцийысе пашаеҥ-влак дене вашлийынна. Тачысе кечын нунын да мемнан литератур кузе вияҥеш да самырык-влаклан могай полыш ышталтме нерген каҥашенна. Почеламутнам лудынна, шке нерген палдаренна. Куанен каласаш лиеш, моло регионла дене таҥастарымаште, марий кундемыштына литературым вияҥдымаште шукырак паша ышталтеш. Альманах, сборникла да газет ден журналла савыкталт лекме дене ончылно улына. Тидым удмурт-шамычат палемдышт.

Тиде фестивальыш миен коштмаш мыланем у вашлиймашым, палымашым пуэн, да возкалымаште волгыдо кумылым луктын. Руш йылмыш кусарен, мыйын почеламутем-влакым тусо поэт-влак ончен лектыныт, ой-каҥашым пуэныт. Тыгай вашлиймаш мыланем пеш шерге.

«Палэзян» фестивальыште поэт-влакым икымше гана погеныт, умбакыжат тыгай пашам шуят манын, ушанен кодам», -  ойла возышо Вера Гордеева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: