"Сылнылык тӱня" рубрик, 2016 ий, Идым тылзын 16-шо кечыже

М.Белецкий: «Ик спектакльыште икмыняр рольым модаш оҥайрак»

Статьян авторжо Анастасия Эманова

Шукерте огыл Йошкар-Оласе Курчак театрыште Д.Войдакын пьесыж почеш шындыме «Не болей, не кашляй, не чихай» спектакль дене 75-ше тургым почылтын. Тудым самырык режиссер да актер Максим Белецкий шынден. Тений тудо курчак театрын режиссержо специальностьым налын. Санкт-Петербургысо сценичекий искусство кугыжаныш институтым заочно тунем пытарен.

%d0%b1%d0%b5%d0%bb%d0%b5%d1%86%d0%ba%d0%b8%d0%b9-1Максим — театрын ик эн тале да уста актержо. Тудо шуко постановкышто тӱҥ роль-влакым модын. Кажне ийын манме гаяк «Театральный Йошкар-Ола» фестивальыште, ӱмаште «В гостях у Оле Лукойе» курчак театр-влакын фестивальыштышт критик-влак М.Белецкийын пашажлан кӱкшӧ акым пуэныт. Коллегыже-влакат тудын дене кугешнат. РМЭ-н калык артистше Эльвира Семеновна Лисицына тудын нерген теве мом ойла: «Пеш уста да ушан рвезе. Модмо кажне рольжо шарнымашеш кодеш. Персонажше-влакым оҥайым да ойыртемалтшым ыштен мошта. Актер пашам йӧратымыже коеш. Тидат тудлан сай режиссер лияш полша, шонем».

- Максим Юрьевич, театрыш толмо корныда дене палдарыза.  

"Бармалей"- Козьмодемьянск олаште тыглай пашаче ешыште шочын-кушкынам. Сылнылык тӱня деке изинек кумылан лийынам. 5-ше классыште тунемме годым школышто У ий пайремыште шке ямдылыме программе дене фокусникым модынам. Подростко пагытыште гитар, ударный семӱзгар-влак дене шокташ тунемынам. Пырля тунемше икмыняр йолташ дене музыкальный группым чумыренна ыле. Тӱрлӧ мурызын мурыштым муренна, тыгак шкеат музыкым возенна. Семӱзгар-влакым шокташ шке гыч тунемам. Флейте, умша гармонь, укулеле дене изиш шоктен моштем. Тиде пеш оҥай, шинчымашым келгемдаш полшышо паша.

Школ деч вара Палантай лӱмеш тӱвыра да сымыктыш колледжыш курчак театрын артистше специальностьлан тунемаш пуренам. Студент годым театрыште спектакльлаште тӱрлӧ рольым модынам. 2008 ий годсек Курчак театрыште пашам ыштем.

- Модмо могай рольда эн неле лийын?"Емелино счастье"

- Очыни, «Бедный Акакий» спектакльыште. Тудым шындыме годым армийыште лийынам. Театрыш пӧртылмеке, мыйым вигак спектакльыш пуртеныт, тидым ввод манына, садлан репетиций шагал лийын. Адакшым спектакль технически неле, декораций ӧрыктарыше. Тудо кугыеҥ-влаклан ончыкталтеш. Ты постановкышто мый шинельым ургызо Петровичым модынам. Мемнан шке семын пьесым умылтарыме почеш, Петрович  — чоным налше ия, Люцифер. Спектакльым Санкт-Петербург гыч режиссер, туныктышем Александр Янович Стависский шынден. Тудын дене пашам ыштыме годым кумыл нӧлталтеш, шуко улан тунемаш лиеш. «Прозоровы. Эпитафия», «Жак и его слуга, или Как стать Людоедом» спектакль-влакынат режиссержо тудо. Пытартыш постановкышто мыят модам. Тушто чылаже ныл артист тӱрлӧ образым чоҥена. Мый, мутлан, Изан, маркиз Блюдолизын, Ирмузын, Кроликын, кресаньыкын, оролын рольыштым модынам.

- Йоча-влаклан возышо автор-влак коклаште кӧн произведенийже тыланда утларак келша?

"Не болей, не кашляй, не чихай"- Йоча-влак юзо вийлан, йомаклан ӱшанат. А эн палыме да йӧратыме йомакче тиде, конешне, Ханс Кристиан Андерсен. Тудын йомакше-влак ойыртемалтше, юзо, порылан туныктышо улыт. Мыйын шонымаште, тудо произведенийже-влакым лач Курчак театрлан келыштарен возен. А вет Андерсен шкенжым нигунам йоча писательлан шотлен огыл. Умылаш лиеш, йомакше-влак кугыеҥым шонаш таратыше, чоным тарватыше улыт.

- Курчак театрыште ыштыше шуко артист деч ятыр гана курчак «илыше» манын колынам. Нуно курчакышт дене мутланат, тудым сайын кучылтыт. А тыланда курчак тиде мо?

- Тидын шотышто Российысе да Европысо школ-влак улыт. Икымшыже курчакым юзо виян, илыше манын шонат. Тудын дене чон почын от мод гын, шалана, кидше, вуйжо але йолжо кӱрлеш манын ӱшанат. Тыгайже мый денемат лийын. А Европышто курчак арвер веле, тудым кукольник модмыж годым «иландара». Мый курчак дене спектакль деч ончыч ом мутлане, но тыгодым нунын дене пагален пашам ыштем.

- Могай сынан рольым модаш йӧратеда?"Прекрасное далеко"

- Курчак постановкышто шукыж годым тӱҥ персонажын мутшат шагал, сценыштат шуэн коеш. Садлан виян характеран роль чонемлан утларак лишыл. Ик спектакльыште иканаште тӱрлӧ образым чоҥаш оҥай. Мутлан, «Емелино счастье» постановкышто мый вич рольым модам. Актер ик спектакльыште шкенжым тӱрлӧ могырым ончыктен кертеш. Тиде неле, но пайдале.

- Театрын художественный вуйлатышыже Алексей Анатольевич Ямаев Курчак театрыште уникальный артист-влак пашам ыштат, нуно курчак постановкышто веле огыл, драме спектакльыштат сайын модыт манын ойлен. А тендан тыгай паша опытда лийын?

- 2011 ийыште «Прекрасное далеко», «Мотылек» спектакльлаште модынам. Тушто йӧратымаш, чап, икманаш, самырык еҥым тургыжландарыше йодыш-влакым нӧлталме. А «Прекрасное далеко» спектакль «Театральный Йошкар-Ола» фестивальыште икмыняр номинацийыште палемдалтын.

- 1 с"Жак и его слуга, или Как стать Людоедом"ентябрьыште «Не болей, не кашляй, не чихай» спектакльын премьерже лийын. Режиссер семын тиде икымше пашада? Мо дене спектакль сымыстара?

- Тиде мыйын кокымшо пашам. Тений мартыште «Звездочка» спектакльым шынденам ыле. У спектакль Войдакын пьесыж почеш шындыме. Тудо геройжо-влак, темыж дене оҥай. Пьесын сюжетше тыгай: изи рвезе черлана, вирус дене кучедалеш да эмлалтеш. Ме тушко доктор ден интерн-влакым пуртенна. Нуно шкеак ситуацийым моделироватлат да модыт. Тыге спектакль шкешотан урокыш савырнен.

Актер-влак Микроб курчак-влак дене модмо годым «черланаш» огыл манын, маскым чият. Тиде йӧн постановкышто келшен толын. Спектакльыште тыгак ӱмыл театр формым кучылтынна. Йоча-влаклан келшен.

Спектакльыште самырык артист-влак Сауле Этлис, Максим Иванов, Данила Гребнев, Егор Ярандаев модыт. У тургымышто мемнан деке Марина Созонова толын. Тудо спектакльыште ӱмылыштӧ лийын.

- Ончыкшым могай у спектакльыште модыда да могай пьесе почеш пашам ышташ тӱҥалыда?

- Ноябрьыште «Золотой ключик» спектакльын премьерже лиеш. Тудын режиссержо -  Санкт-Петербург гыч Николай Боровков.

Йоча да кугыеҥ-влаклан спектакльым шындынем. Но кызытеш тидын нерген ойлаш эр.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: