"Рубрик деч посна", 2016 ий, Идым тылзын 20-шо кечыже

Олег Тактаров марий тукым гыч!

Статьян авторжо Эльвира Терентьева

toktarov_mari_patr14-15 сентябрьыште кумдан палыме киноактер да спортсмен О.Тактаров Йошкар-Олаште икымше гана уна лийын.

Тудо рӱдолам ончен савырнен, Национальный президент школышто тунемше-влак дене вашлийын, лекцийым лудын, мастер-классым ончыктен, “Единоборец12” клубыш миен коштын, мер организацийын еҥже-влак да усталык шӱлышан молодежь дене, тыгак верысе властьын представительже-влак дене мутланен. Тудо калык дене вашлийме годым ойлен: “Политикыш ом шӱшкылт, властьыш ынем шогал. Лийме верлаштем лач пайдам кондынем”.

О.Тактаров 1967 ийыште Угарман кундем Саров олаште шочын. Сандене Йошкар-Оласе кӱртньыгорно вокзалыште Йыван Кырлалан памятникым ужмеке, палемден: “Йыван Кырла – марий киноактёр, мыят марий киноактёр улам. Мый тендан деке Кино идалыкыште толынам да ты памятникым ужынам. А “Путёвка в жизнь” фильмын ужашыжым шочмо олаштем – Саровышто – сниматленыт. Тукым ден тукым кузе кылдалт кертыт улмаш. Символ семын чучеш”.

Олег Тактаровын ачаже Николай Михайлович Тоншай районышто шочын. Шочмо кундемжылан Березята ялым шотла. Ачаже тушеч Березина фамилиян ӱдырым марлан налын улмаш. А такшым Токтаровмыт пошкудо Трошонки ден Токтар ялла гыч лийыныт. А фамилийыште ик букваже, илен-толын, вашталтын. Олег Тактаровын ачаже Саров (ондак Арзамас-16 маналтын да петырыме ола лийын) илен, тыштак Олег шочын. Кочаже марла кутырен моштен. Палемдена: Угарман кундемысе марий-влак йӱдвел-касвел наречий дене мутланат.

Олегын икымше рольжо «Военно-юридическая служба» сериалыште лийын. Вара Российысе шпионым, бандитым да отрицательный рольым ятыр модын. Актёр улмыжым 2001 ийыште «15 минут славы» фильмын экраныш лекмыж деч вара шижын. Ты фильм тӱня мучко ончыкталтын, сандене Олег кумдан палыме актёрыш савырнен, а съёмочный площадкыште тудын дене пырля Роберт Де Ниро, Эйвери Брукс да Вера Фармига лийыныт.

Кум гана ӱдырым налын. Кумшо пелашыж деч 2012 ийыште ойырлен. Сергей, Китон да Никита эргыже-влак кушкыт. Кызыт США-ште ила, но чӱчкыдынак Российышке толеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: