"Ӱшанем... Вучем..." рубрик, 2016 ий, Идым тылзын 23-шо кечыже

Поро чонан еҥым икшыват, вольыкат шижеш

Статьян авторжо Татьяна Айтова

Салам лийже, «Ӱшанем…Вучем…» лаштыкым лудшо йолташ-влак. Возымо серышем иктаж ӱдырлан оҥай лиеш манын шоннем.

Тачысе жапыште чын да ӱшанле илыш пелашым муаш куштылго огыл. Мый 30  утла ий ончыч марлан лектынам. Пелашем – тыматле, поро кумылан айдеме. Тудым вашлиймем годым кокам шке илышыж гыч историйым каласкален ыле. Лач тудын каҥашыжлан кӧра Валерийым ойырен налынам. Тыландат тиде секрет нерген каласкалынем.

Кокам, чынжымак, пиалан ӱдырамаш. Пелашыж дене коктын ныл икшывым ончен куштеныт. Суртыштышт йӧратымаш, пагалымаш шӱлыш эре шижалтын.

Самырык пагыт годым кокам  почеш ятыр качымарий коштын улмаш. А чӱчӱ дене йӧршеш вучыдымын палыме лийыныт.

Институтышто тунемме годым нуно практикыш вес кундемыш каеныт. Гена чӱчӱ тунам кумшо курсышто тунемын, кокам — кокымшышто. Икана кокам ик сӱретым эскерен: рвезе ялысе икшыве-влак дене модеш. Нунын дене тыматлын кутыра, воштылеш. А йоча-влак тудын йыр шукын-шукын погыненыт, юарлат. Кокам нуным шыпак эскерен шоген. Теве тыгай рвезе сай ача, ӱшанле пелаш лиеш манын шонен. А вара ала-кушеч толын лекше изи пий йолышкыжо кержалтын. Чӱчӱм кокамым пий деч утарен, эмлымвер марте кидыштыже нумал каен. Тыге нуно палыме лийыныт.

Икана кокам деке унала миенам ыле. Тунам кок рвезе дене келшенам. Иктыже – Олег, весыже – Валера. Олег сай еш гыч лийын, а Валера – тулык. Койыш-шоктышышт дене икгайрак чучыныт. Кокамлан тидын нерген ойленам. Тудо рвезе-влакым тергаш темлен. Икшыве дене кутырен моштышо, пий ден пырыс дене тыматлын мутланыше айдеме сай илыш пелаш лиеш манын.

Икымше кечын Олегым унала ӱжынам. Тудо жапыште кокам лач кок ияш уныкажым унала конден. Ик жаплан рвезым йоча дене коденна да эскеренна. Олег верже гычат тарванен огыл, телевизорым ончен шинчен. лу минут жапыште йоча ӱмбак ончалынат огыл.

Вес гана Валерам ӱжынам. Ончычсо семынак изи Кириллым пеленже коденна. Тудо вигак икшыве дене модаш тӱҥалын.  Кокам тунам чоян шыргыжалын да пелештен:

- Пошкудо Вера ковай эмлымверыште кия. Пырысшым пукшаш мыланем коден. Ала те миен толыда ыле?

Валера тореш лийын огыл. Пырыс тудын кидше гыч кочкышым вигак налын, йырже мырлен пӧрдын. Тулеч вара Валера дене пырля улына.

Поро чонан еҥым икшыват, вольыкат шижеш, маныт. Чын але уке, шке тергыза. Пелашемым тыге ойырен налмемлан ом ӧпкеле. Тудын пелен моткоч пиалан улам.

Александра.

Волжск ола.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: