"Сылнылык тӱня" рубрик, 2016 ий, Идым тылзын 6-шо кечыже

Премьер дене у тургым почылтын

Статьян авторжо Анастасия Эманова

26 августышто Йошкар-Оласе Курчак театрыште пресс-конференций эртен. Тудо театрын шушаш 75-ше тургымжылан пӧлеклалтын.

20160826_120642Вес ийын майыште тиде театрым почмылан 75 ий темеш. Тидлан кӧра театрыште шуко мероприятий эртаралтеш.

Тургым 1 сентябрьыште Д.Войдакын пьесыж почеш шындыме «Не болей, не кашляй, не чихай» спектакль дене почылтын. Режиссержо – самырык артист Максим Белецкий. Тений тудо курчак театрын режиссержо специальность дене Санкт-Петербургысо сценический искусство кугыжаныш институтым тунем пытарен.

У спектакльым 2 сентябрьыште «Особая семья» ден «Клуб друзей» организацийлаш пурышо инвалид йоча-влаклан ончыктат.

2016 ийыште эше ик премьер лийшаш. Тиде – А.Толстойын «Золотой ключик» йомакше негызеш шындыме спектакль. Тудын режиссержо — Санкт-Петербург гыч толшо Николай Боровков.

Театр кугыеҥ-шамычлан спектакль-влакым ончаш темла.

29 сентябрьыште Российысе «Золотая маска» национальный театральный премийым пуымо шотышто комиссийын представительже-влак Йошкар-Оласе курчак театрыште А.Чеховын «Три сестры» пьесыж почеш шындыме «Прозоровы. Эпитафия» спектакльым ончаш толыт. Постановко келша гын, театрым «Золотая Маска» фестивальыш ӱжыт.

Тиде спектакль дене «Соломенный жаворонок» V тӱнямбал курчак театр фестивальыште участвоватла. Тудо октябрьыште Челябинскыште эрта.

Тений театр «В гостях у сказки» проект дене регионласе театр-влаклан гастроль дене кошташ полшымо шотышто федеральный программыш пурен. Тидлан кӧра у тургымышто Йошкар-Олаш тӱрлӧ ола гыч курчак театр-влакын артистышт гастроль дене толыт. 24 да 25 сентябрьыште, мутлан, Волгоградысе Курчак театр «Сказка о рыбаке и рыбке» спектакльым ончыкта. 8 да 9 октябрьыште Набережный Челнасе курчак театр «Муха-Цокотуха» спектакльым темла, а 22 да 23 октябрьыште Марий Элысе йоча-влаклан Самара оласе театр «Малыш и Карлсон» спектакльым ончыкта. Тыгак ноябрьыште, декабрьыште вес олаласе артист-влакым вучена.

Тылеч посна ончаш толшо-влакым театрын историйже дене палдараш тӱҥалыт, тоштерысе экспозицийым пойдарат, уэмдат. 3 сентябрыште театрыште фотовыставке почылтеш. А 2017 ийыште Марий Элын аудиовизуальный документаций шотышто кугыжаныш архившын полшымыж дене Курчак театрын историйже дене кылдалтше интерактивный диск лекшаш. Кызыт тидлан театр пашаеҥ-влак материалым ямдылат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: