"Рубрик деч посна", 2016 ий, Идым тылзын 30-шо кечыже

Семым ок кол, но моторын кушта

Статьян авторжо Эльвира Терентьева


 

Тиде рвезым Йошкар-Олан пайремже годым ужым. Тунам йытыра чурийвылышан, мотор самырык рвезе Миша Хуснутдинов (снимкыште) тудын семынак коляскыште шинчыше ӱдыр-влак дене пырля куштыш. Англичан йылме дене мотор сылне сем йоҥга, а тудо ош тувыр дене ты тӱшкам волгалтара. Ончаш толшо калыкланат шыргыжме кечыйолым пӧлекла, ала сандене шинча эре тудымак веле онча. Мотор ӱдыр коклаште куштымаш сымыктышлан тунемаш кӧнымыжат оҥайын чучо.

Сеҥымашын ХХХ идалыкше лӱмеш тӱвыра полатыш инвалид-влакын каныш кечылаште кушташ тунемаш коштмышт нерген колынам ыле. Куштышо-влакын лӱмыштым каласенак кодем: Ольга Пасеева (Шернурышто ила гынат, олаш толаш жапым да йӧным муэш), Ирина Лежнина, Екатерина Пояркова, Анна Матвеева. Нунын деке рвезын ушнымыжым пален омыл. Тидым уждымо еҥлан соцсетьыште видеом ончаш темлем.

%d1%82%d0%b0%d0%bd%d1%86%d1%8b4

Миша дене вашлияш шонен, шукерте огыл тудлан социальный сеть гоч серышым возышым. Но тудо вигак соҥгыра улмыжым шижтарыш. А кузе еҥ-влак дене мутланет? “Телефон да интернет гоч”, — вашештыш тудо. Тыге Миша дене ышна вашлий. Йодышем-влаклан вашештымыж годым шинчаончалтышыжым шижаш ыш лий гынат, умылышым: 2012 ийыште лийше ойгым рвезе эше монден да умылен, чаракым тӱрыснек эртен кертын огыл. Кокымшо пачаш гыч пуреҥгайымеке, икмыняр жап комышто киен, а вара эркын дене колмым чарнен.

А кузе вара тудо, семым колде, тыге моторын, весе-влак дене пырля икгай ритмике дене куштен мошта? “Ме кызыт у куштымашым тунемына. Репетицийыште коллективысе участник-влакын капым але кидым кузе тарватылмыштым тӱткын эскерем, чурийыштышт мимикыштым ончем да мом кузе ыштышашын пел пашажым умылем, вара ончыктат. А йолташем-влакым шӱргывылышым тарватылмышт да движенийышт гоч уужам да мутланем”, — ойлыш Михаил.

Миша илышыште писын сусыргаш лийме нерген пала. Вет тудо моло таза еҥ семынак кушкын. Йошкар-Оласе 30-шо №-ан школ деч вара Медведево посёлкысо Автодорожный техникумышто тунемын, армийыш миен толын. А 20 ияш рвезын кӱшыч камвочмекыже, вуйдорыкшо эмганен, тупрӱдыжӧ пудырген да соҥгыра лийын. Тидлан ныл ий эртен…

Мо самырык еҥым тургыжландара? Эн ончычак инвалид-шамычлан чарак деч посна уремыш лекташ да кошташ, кевытыш, парикмахерскийыш да моло верыш пураш йӧн укелык. Яра жапшым телевизор ончылно эртара. Утларакшым ожно годсо фильм-влакым онча: “Дальнобойщики”, “Кавказская пленница”, “Операция “Ы” или другие приключения Шурика”, “Абориген”. Владислав Галкинын, Владмир Турчинскийын да Сергей Бодровын модмыштым куанен онча.

Кушташ тунеммаш Михаил Хуснутдиновлан илышыште иктаж-мом ыштен кертмыжым пеҥгыдемдаш полша. Тыге самырык еҥ шканже кумылым нӧлта. Теве изиш черланен гынат, ты шуматкечын адакат репетицийыш каяш шонымаш дене ила.

Эльвира Терентьева.

 

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: