"Сылнылык тӱня" рубрик, 2016 ий, Идым тылзын 6-шо кечыже

Сӱретым, открыткым пеледыш гыч ышта

Статьян авторжо Анастасия Эманова

Йошкар-Олаште илыше Вера Шулятьева ятыр ий флористике дене заниматла. 72 ияш ӱдырамаш тӱрлӧ кушкыл, пеледыш гыч сӱретым, открыткым ышта. Пашаже-влак чатка, оҥай улыт. Тудын мутшо почеш, Марий Элыште сай флорист-влак шагалын улыт. Тылеч посна Вера Павловна кумыж гыч аралтышым, сувенир-влакым ыштылеш, тыгак декупаж технике дене тӱрлӧ арверым сӧрастара, тоштерлаште мастер-класс-влакым эртара.

Вера ШулятьеваУста ӱдырамаш Угарман кундем Шахунья олаште шочын-кушкын. Марлан лекмеке, пелашыж дене Йошкар-Олаш илаш кусненыт. Вера Павловна 1975-1990 ийлаште Марий политехнический институтышто патентоведлан пашам ыштен, вара 2001 ий марте МарГТУ-што лаборант лийын. Перестройко пагытыште окса ситыдымаш годым кидпашалан кумылаҥын. Эн ончыч уа дене корзиҥгам пидын, панном ыштен. Пӱртӱс лоҥгаште коштмыж годым лышташ ден пеледыш-влакым поген да коштен, вара тӱрлӧ композицийым ямдылен. Икмыняр жап гыч олым да кумыж дене пашам ышташ тӱҥалын. Калык прикладной искусствын тӱрлӧ видшылан тунем шумеке, пашаже-влакым ярмиҥгалаш луктын. Шиждымын чон-кумыл пашаже профессийыш савырнен, манаш лиеш.

DSC035322009 ийыште декоративно-прикладной творчестве тоштерыште В.Шулятьеван «В гармонии с собой и природой» персональный выставкыже эртен. Кидмастар – тӱрлӧ конкурсын дипломантше. Мутлан, 2012 ийыште тудо Кечывалвел Корейысе Куре олаште лийше флорист-влакын тӱнямбал конкурсыштышт 1-ше верым сеҥен налын.image

Вера Павловна тӱрлӧ кидпашалан йоча-влакымат, кугыеҥ-шамычымат туныкта, мастер-класс-влакымат эртара. Тудын тунемшыже-влакат тӱрлӧ конкурсышто призовой вер дене палемдалтыт.

«Флористике дене 2000 ий годсек заниматлем. США-ште прессованный флористике шотышто тӱнямбал гильдийын членже улам. Тушко интернет полшымо дене логалынам. Интернетыш лекме дене тӱрлӧ техникылан тунемаш йӧнанрак лийын. Ынде кӱлеш книгам кычалме олмеш сайтыште тыманмеш чыла муаш лиеш. Лач интернет гоч тӱня мучко флорист йолташ-влакым муынам. Ынде мыланем тӱрлӧ эл гыч пеледыш-влакым колтедат. США, Канада, Японий, Китай, Франций гыч пеш шуко пеледыш уло. Пеледыш гыч тӱрлым ыштыме годым сӱретче лийман, пӱртӱсын сылнылыкшым умылен моштыман. Чаманен каласыман, Марий Элыште флористике паша шагал ужалалтеш», — ойла image (5)кидмастар.

Вера Павловна деч олым дене «сӱретлыме» картиным, кумыж аралтышым да сувенир-влакым эреак налыт. «Оберегым ыштыме годым тӱрлӧ пеледышым, кушкылым, шӱрашым, кумыжым кучылтам. Вет тиде чыла пӱртӱс ужаш, а айдеме пӱртӱс дене келшен илышаш. Кажне «компонент» мом-гынат ончыкта. Мутлан, шӱльӧ окса поянлыкым конда, локама йӧратымашым арала, а пызле ача-ава деке пагалымашым ончыSS103620кта. Кумыж гыч аралтыш панном ышташ келша. Тыгай пашам налше-влак шукын улыт. Вет тудо мотор веле огыл, тыгак тамле пӱртӱс пушым шара. Кок арняште 35 кумыж панном ямдылен шуктем. Кажне кечын кандаш шагат эр гыч кок шагат йӱд марте шинчем.

Изи панно шулдынрак шога. Кокла чот дене ик тыгай паша 500-700 теҥгеш шуэш. Олым гыч ямдылыме сӱрет пеш моторын коеш. Тудым пу рамыш келыштарем, 150 теҥге шога, — манеш В.Шулятьева. – Тылеч посна декупаж технике дене сӧрастарыме ятыр пашам уло. Эн ончыч талиҥгаш сӱретым сӱретленам, а вара – кленчаш, шкатулкыш».

SS102104Кидмастар кугурак ийготан гынат, моткоч чолга. Тудын интернет сетьыште «В гармонии с природой» блогшо уло. Тушто ятыр пашаже-влак ончыкталтыныт.

Вера Павловналан кидпашаже-влак вийым пуат, а налше-влаклан куаным кондат. Тудо  кажне кечын мастарлыкшым вияҥда. Кызыт меж акварельлан тунемнеже. Тидлан кӱлеш материалым шукертак налын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: