"Рубрик деч посна", 2016 ий, Идым тылзын 23-шо кечыже

Сӧрал пашам сӱретлаш кид ден уш полшат

Статьян авторжо Эльвира Терентьева

 

4 октябрьыште Республикысе изосымыктыш тоштерыште Елена Кретининан персональный выставкыже почылтеш. Тудо батик йӧн дене 500 утла произведенийым сӱретлен. Тений Е.В.Кретининам Россий Художник ушемыш пуртеныт.

%d0%b5%d0%bb%d0%b5%d0%bd%d0%b04Елена Владимировна Удмуртийысе Глазов олаште шочын. Тусо художественный школ деч вара Йошкар-Оласе художественный училищыш толын, художник-оформительлан тунем лектын. Вара Звенигово тӱвыра пӧртыштӧ, шочмо олаштыже верланыше Чепецкий металлургический заводышто ик жап пашам ыштен. Марлан лекмыкыже, марийже дене пырля Санкт-Петербургышто иленыт, вара Марий Элыш пӧртылыныт. Йошкар-Оласе 2-шо №-ан художественный школышто кандаш ий пашам ыштен, вара тыгаяк 1-ше №-ан школыш куснен. Туныктышо гынат, шуко кутыраш ок йӧрате. Шкенжын нерген каласкалаш, пашаже-влакым ончыктылаш ок вашке. Тыматле койышан ӱдырамаш тений 30 мартыште 50 ияш лӱмгечыжым палемден. Персональный выставкыжымат молан пӧлекленда манмылан “Ынде 11 ий эртарен омыл, сандене” мане.

Елена Владимировнан картиныже-влакым ончен куанет. Нуно кумылым нӧлтат веле огыл, тыгак у пашалан таратат. Тыгай талантан сӱретче-влакын сылне произведенийыштым ужмеке, илымыла чучеш, шӱм-чоным куан тул авалта. Тӱняште сӧраллыкым ышташ шочыктышо мастар-влакым утыр пагалет да шочмо кундемыштат тыгай еҥ-влак улмо дене кугешнет.

Еленан ешыже сымыктыш тӱнян волгыдылыкшо дене ойыпаҥын ила. Пелашыжым, дизайнер Игорь Кретининым, республикыште веле огыл, моло кундемыштат палат да тудлан шке пӧртыштышт, паша верыштышт дизайным ышташ ӱшанат. Шукерте огыл тудо 9-ше микрорайонышто почылтшо “Астронлан” да “Марий сийгудо” ресторанлан дизайным ыштен. Мария ӱдырыштат графикым сӱретлаш йӧрата. Кызыт Москосо Суриков лӱмеш художественный институтын Озаҥысе филиалыштыже тунемеш.

Е.Кретинина батикым ышташ Санкт-Петербургышто пелашыж дене пырля илыме жапыште кумылаҥын. Йолташыже-влакын пашашт келшен да тидым шке шукташ, икте-весым пургедаш тӱҥалын. Батик дене пашам ышташ кок йӧн уло: “шокшо” ден “йӱштӧ”. Елена йӱштӧ манме технике дене пашам ышта. “Тидыже куштылгырак, санденак тудо эше колымшо курымышто гына шочын. А шокшо техникылан ырыктыме шыште, парафин дене пашам ыштыман”, — умылтара опытан туныктышо.

y_6e32a491Елена Владимировна “Декоративнная композиция” предметым туныкта. “Художественный школ деч вара сӱретче але дизайнер корно дене шагал йоча кая, но мый нуным тӱняште сӧраллыкым эскераш, эстетикым умылаш, илышым оҥайым ышташ кумылаҥдем. Кузе икшыве тидым шукта, вес паша. Тунем лектыт, тыште чытышым да изи але кугу мастарлыкым погат. Манаш веле, арнясе ныл кечыште кум шагат дене пашам ышташ куштылгак огыл”, — каласыш тудо.

Тунемшыже-влак кокла гыч республикыште сеҥыше радамыш логалше-влак ятырын улыт. Илья Белов Йошкар-Олаште ик эн палыме художник-граффитистлан шотлалтеш. Ола уремлаште сеҥымашлан да моло темылан возымо сӱретшым ужаш лиеш.

1990-ше ийлаште Е.Кретинина модельер-влак Игорь Дидиани ден Лариса Воробьева дене пырля тыршен, вургем коллекцийыштлан куэмыште росписьым возен. Бархатыште, крепдешиныште да моло куэмыштат пашам шуктен. Варажым шке произведенийжым Елена “Российын миссше” конкурсысо участникын тувырыштыжо ужын. Кызыт Игорь Дидианин Чебоксарыште Мода пӧртшӧ уло. Лариса Воробьева  uxdlk9ienuu ондак модым ончыктымо сомылым шуктен, Йошкар-Олаште шке ательежым почын. Тудлан сӱретче кок тувырым ямдылен.

Кеч-могай пашам ышташ кумыл полша. Елена Кретинина тыгодым художникат лияш ок кӱл манын ӱшандарыш. Лач шӱм-чонын ончыко каяш тыршымашыже лийже, тунам чыла паша сайын шукталтеш. Теве кок ий ончыч Елена курчак-влакым ышташ тӱҥалын. Адакат кумыл йодмо почеш. Но, очыни, шуктышаш сомылжат эше тиде веле огыл. “Шонымашем шуко, илыш эше кужу”, — мане мыланем. Ончалза пашажым да шӱм-чон моторлыкшым шижса.

Эльвира Терентьева.

Фото-влакым сӱретчын архивше гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: