"Шинчымаш кугорнышто" рубрик, 2016 ий, Идым тылзын 23-шо кечыже

Чолга тунемше – виян ончыкылык

Статьян авторжо Анастасия Эманова

2015 ий 29 октябрьыште РФ президент Владимир Путин «Тунемше-влакын Российысе движенийышт» общероссийский мер-кугыжаныш йоча организацийым ыштыме шотышто указым подписатлен. Ты движений кушшо тукымым воспитатлыме шотышто кугыжаныш политикым саемдыме да Россий обществылан келшыше ценность системе негызеш личностьым кушташ полшаш  шонымаш дене ышталтын.

Организацийын логотипше – Россий флагым ушештарыше тӱсан пырля ушналтше кум шар да книга. Книга – шинчымаш символ, а шар-влак икоян, ваш келшен илымым ончыктат.  

%d0%bb%d0%be%d1%81%d0%ba%d1%83%d1%82%d0%be%d0%b2%d0%b0Апрельыште Марий Элыште тунемше-влакын движенийыштын отделенийже почылтын. Тудын координаторжо Йошкар-Оласе Самырык тукым полатын молодежный программе да проект рӱдерым вуйлатыше Л.Лоскутова (снимкыште). Лариса Вячеславовна тунемше-влакын движенийышт нерген каласкалыш, пашашт дене палдарыш:

- Россий президентын у йоча организацийым ыштыме шотышто указым подписатлымыж деч вара элнан 85 регионыштыжо учредительный собраний ден конференций-влак эртеныт. А 19 майыште Москошто Ломоносов лӱмеш кугыжаныш университетыште «Тунемше-влакын движенийышт» организацийын икымше съездше лийын. Тушто движенийын председательжылан летчик-космонавт, Россий Герой Сергей Николаевич Рязанскийым сайленыт да сопредседательлан 2014 ийыште Идалыкысе туныктышо Алла Головенькинам да телевӱдышӧ Яна Чуриковам шогалтеныт.

Российысе кажне регионышто движенийын координаторжо-влак улыт. Тылеч посна пилотный школ-влакым ойырен налме. Тыгай школлаште движений шке пашажым виктара. Но палемдыман, тунемше-влакын организацийышкышт кажне йоча ушнен кертеш. Элыштына 250 утла школ Москосо Росдетцентр дене пырля пашам ыштыме йӧным да формым ямдыла. Марий Элыште пилотный лу школым палемдыме. Нине школлаште йоча ушем дене кылдалтше паша опыт кугу. Мутлан, Йошкар-Оласе 29-ше №-ан школышто йоча организаций ден кадет класс улыт. Кызыт тыгай школлаште информаций кампаний кая. Мый, школлашке лектын, икшыве-влакым Россий движений дене палдарем.

Вконтакте соцсетьыште «Российское движение школьников В Марий Эл» группо уло. Тушто шуко уверым пален налаш лиеш.

Движений тунемше-влакым чолга, пашаче, патриот лияш туныкта. Ныл направленийыште пашам ышта. Икымше – личностный развитий. Тидын дене кылдалтше мероприятий-влак йочан мастарлыкшым тӱрлӧ аланыште нӧлташ, ончыкылык профессийым ойырен налаш, таза илыш-йӱлам кучаш шонымаш дене эртаралтыт. 

Движений военно-патриотический пашам шукта. Тудын цельже-влак: военно-патриотический клублаш йоча-влакым пурташ, военный сборым, модмашым, акцийым, Россий Герой-влак дене вашлиймашым эртарымаш.

Икшыве-влак коклаште патриотизм шӱлыш нӧлташ тыршена. 23 сентябрьыште Самырык-влакын полатыштышт Российысе «Юнармия» йоча военно-патриотический мер организацийын регионысо отделенийжын икымше съездшым эртарена.

Вес направлений – гражданский активность. Тушто тӱткыш волонтерствылан, кычалме пашалан, историйым да краеведенийым шымлымылан ойыралтеш. Тылеч посна ветеран да РФ Герой-влак дене вашлиймаш лиеш. Волонтер паша дене кылдалтше ятыр мероприятийым палемдыме.

Тунемше-влакын движенийышт тылеч посна информационно-медийный могырым пашам ышта. Школлаште икшыве-влак шке газетыштым луктыт, тӱрлӧ видеом войзен кертыт, СМИ дене кылым ыштат.

5 сентябрьыште пилотный школ-влакын тунемшышт Йошкар-Оласе «Радуга» йоча организацийын участникше-влак дене пырля порылык урокым эртареныт да Россий паралимпиец-влакым поддержатлыме серыш-влакым возеныт. Тудым  боксер Николай Валуев (Йошкар-Олаште тудо 5-6 сентябрьыште лийын) гоч пуэн колтеныт.

   29 октябрьыште Йошкар-Олаште пилотный школ-влакын республикысе фестивальыштым эртарынена. Ты фестиваль тунемше-влакын Российысе движений шочмылан пӧлеклалтеш.

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: