"Рубрик деч посна", 2016 ий, Идым тылзын 30-шо кечыже

Чыла еҥ гаяк иктӧр лияш манын…

Статьян авторжо Эльвира Терентьева

%d1%88%d0%ba%d0%be%d0%bb%d0%b0-%d0%ba%d1%802

Эше августышто Россий инвалид обществын Медведево районысо пӧлкаж пелен самырык да чолга инвалид-влак “Знак равенства” интеграционный молодежный клубым ыштеныт. Тидын нерген сентябрьыште гына увертареныт, вет ончычшо клубын лӱмжӧ лийын огыл. Тыге 17 сентябрьым клубын шочмо кечыжлан шотлат.

Ты клуб инвалид-влаклан илышыштышт кугун полшышаш. Тудын тӱҥ шонымашыже — начар тазалыкан еҥ-влак улыт да нунылан полшаш шотлыман, пагалыман шонымашым калык коклашке шараш. Але вес семын каласаш гын, инвалид ден обществе коклаште иктӧрлыкым шыҥдараш. Клубын девизше – “Чыла еҥ гаяк иктӧр”.

Ты клубым чолга да мероприятий-влакым эртараш кумылаҥше Ольга Ребко вуйлата. Клубым ты ӱдырынак инициативыж почеш чумырымо. Чыла организатор пашам Ольга шкеак шукта.

Клубыш ушнышо-влакын икымше пайремышт “Солдат удачи” паркыште лийын. Тунам инвалид-влак ныл тӱрлӧ оружий гыч лӱйкален онченыт. Вара ӱстел йыр шинчыныт, икте-весе дене мутланеныт, тамле сийым кочкыныт.

А кызыт ӱдыр-шамыч “Моторлык школ” занятийыш коштыт. Тымарте кок мастер-класс лийын. Тушто чурийым, коваштым эскераш, макияжым ышташ да моло пашаланат тунемыт. Тидлан ӱдыр-влакым профессионал мастер Наталья Кривошеева яра туныктен.

Пӧлемым Медведевысе историко-художественный тоштер ойырен. Тушко клубын участникше-влак кок арнялан ик гана шуматкечын погынат. Икымше занятийыш кудытын миеныт, кокымшыш – шымытын. А 8 октябрьыште лийшаш мастер-классыш 10 еҥ возалтын. Тунам инвалид-влак фоамиран гыч пеледышым кузе келыштараш пален налыт.

“Мастер-влак кумылын полшаш кӧненыт. Южыштым мый ятыр ий палем да нунын деч ой-каҥашым налам, — каласкала Ольга Ребко. — Профессионал-влаклан шке шонымашем ойлымеке, вигак келшеныт. Мутат уке, кызыт мемнам яра туныктат, а вес ганалан спонсор-влакым мумо шуэш, вет занятийлаште кучылтшаш материалым оксала налман. Эре яра йодаш огеш лий. А тиде проект почеш вес ийынат пашам ышташ тӱҥалына, шонем”.

Кызыт ӱдыр-рвезе-влак модым ончыкташ да паша-влакым ужалыме выставкым эртараш ямдылалтыт. Тунам еҥ-влак коляскыште шинчыше ӱдыр-рвезе-влак дене пырля модым ончыктат. Тидыже лач инвалид-влакын декадышт жапыште лийшаш.

Тылеч посна “Знак равенства” клуб Медведево посёлкысо “Витязь” ФОК дене кутырен келшен. Клубын участникше-влак тысе икмыняр занятийыш ушнен кертыт. Ӱстембал теннис дене модаш, спортзалыште тӱрлӧ упражненийым ышташ, дарст ден армрестлинглан тунемаш йӧным ыштыме. Эсогыл колясочник-влак теннис дене модын, спортзалыште заниматлаш лиеш.

Инвалид-шамычлан спорт – неле паша. Кызытеш нуно чыла занятийыш 50 процентан скидке дене коштыт. А клуб вес корно дене кайынеже, профессиональный тренер-влакым кычалеш. Лишыл жапыште Йошкар-Оласе “Дельфин” бассейныште “Парадайвинг” секций почылтшаш.

Клубын планже моткоч кугу, тӱрлӧ проектым илышыш шыҥдараш ямде. Полыш кидым шуялтыше еҥ-влаклан гын участник-влак моткоч куанат да шонымашыштым, темлымашыштым шотыш налаш ойлат.

Фото-влакым клубын альбомжо гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: