"Улам мый Рве-зы-лык!" рубрик, 2016 ий, Шыжа тылзын 21-ше кечыже

Ачаж гаяк фермер лийнеже

Статьян авторжо Анастасия Эманова

Самырык ӱдыр Наталья Секретарева мланде пашалан кумылан. Тудо тыгак ача-аважлан вольыкым ончаш полша. Наташан мутшо почеш, ялыште вольык деч посна илаш неле. Таклан огыл калыкыште ойлат: вольык – суртоза гай, вольык уке – нимо уке.

bv6so6rxpksПашалан кожмак ӱдыр У Торъял район Сергейсола ялыште шочын-кушкын. Ача-аваже творческий шӱлышан улыт. Тидланак, очыни, нунын икшывышт сылнылык тӱням йӧратен кушкыт. «Ачам Руслан Сергеевич самырыкше годым гитар дене тӱрлӧ конкурсышто шоктен да мурым мурен. А авам Эльвира Григорьевна изиж годым школысо спектакльлаште модын, шке жапыштыже Палантай лӱмеш тӱвыра да сымыктыш колледжыш тунемаш пураш шонен, но тӱрлӧ амаллан кӧра шонымашыже шукталтын огыл. Кызыт колледжыште Настя шӱжарем актерлан тунемеш, тыгак фортепиано дене шокта. Антон шольымат музык дек шӱман. Вич ияш (кызыт тудлан 8 ий) гитар да фортепиано дене шокташ тунемеш», — ойла Н.Секретарева.

Наташа индеш классым Токтарсола школышто тунемын, а вара Тошто Торъял кыдалаш школым тунем пытарен. Изинек пӱртӱс лоҥгаште кошташ йӧрата. Шочмо кундемысе чодыра, олык, ший памаш ӱдырлан вийым пуат да творчествылан кумылаҥдат. Чон шижмашыжым, шочмо ялын моторлыкшым шке возымо почеламут корныла гоч почын пуа. Тылеч посна почеламутшылан семым шкеак келыштара. «Кум ий ончыч гитар дене шокташ кумыл лектын. Тидлан мыйым ачам туныктен. Тудо пеш уста гитарист, муро-влакымат возен, чаманен каласыман, ик пашажат аралалтын огыл. Мыйын икымше «Йӧратем, йӧратем, кунам тый воктенем» маналтеш», - палдарыш Наташа.

Ялысе ӱдыр паша деч огеш лӱд. Ешыже фермер озанлыкым куча, тӱкан шолдыра вольыкым ашна. Тидлан кӧра Наташа изинек ялозанлык дене кылдалтше профессийым налаш шонен. Кызыт тудо МарГУ-со аграрно-технологический институтын студенткыже. Икымше курсышто заочно тунемеш. «Ачамат тений ты институтышто визымше курсым тунем пытарышаш. Ме ешыштына икоян улына. Вашла ӱшанле эҥертыш лияш тыршена. Ончыкшым ачамын пашажым шуяш шонем», — манеш Н.Секретарева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: