"Улам мый Рве-зы-лык!" рубрик, 2016 ий, Шыжа тылзын 7-ше кечыже

Команмелна да кравец дене сийленыт

Статьян авторжо Анастасия Эманова

26 сентябрь гыч 2 октябрь марте Калуга область Боровский районысо «Этномир» культурно-образовательный туристический рӱдерыште «Диалог культур» IIмолодежный этнокультурный лагерь пашам ыштен. Тудым «Диалог Культур – Единый Мир» фондын полшымыж дене национальность паша шотышто федеральный агентстве эртарен.

Марий Эл гыч делегацийТений лагерьыште 56 регион гыч 200 наре участник лийын. Нуно Российысе калык-влак коклаште кылым пеҥгыдемдаш полшышо проектым ямдыленыт.

Самырык ӱдыр-рвезе-влак «Будущее национальной политики» стратегий сессийыште участвоватленыт. Тылеч посна тӱрлӧ мастер-классыште, этнокультурым да калык-влак кокласе диалогым вияҥдаш да пеҥгыдемдаш полшымо шотышто проект-влакын презентацийыштышт, проектым ямдылаш туныктымо семинарыште, интерактивный мероприятийлаште лийыныт. Ныл проектный группо: «Образовательный этнопроект», «Этнособытие», «Этнотуризм» да «Информационное сопровождение этнокультурного проекта» — пашам ыштен. Группо-влак этнокультур аланыште эксперт ден практик-влакын вуйлатымышт почеш проект-влакым ямдыленыт. Жюри 40 наре проектым сайлан шотлен, поснак башкир йылмым лингвопрограммироватлыме шотышто проектым, Самарысе фотопроектым оҥай манын палемден. Лагерьын пытартыш кечынже усталык фестиваль лийын.

Марий Эл гыч «Диалог культур» лагерьыш визытын миеныт. Ик участник Анатолий Мартынов лагерь нерген теве мом ойла: «Лагерьыште мый денем пырля Игорь Эштуков, Ирина Кузьмина, Алексей Иванов, Александр Окольников лийыныт. Йошкар-Ола гыч Москва марте кумытын каенна. Вара мемнан деке А.Мартынов тумырым перкалаАлексей ушнен. А Александр дене «Этномир» рӱдерыште палыме лийынна. Лагерьын участникше-влак Москвасе Молодежный метро станцийыште погыненыт. Тыге автобусым вучымо годым вес регионла гыч толшо участник-влак дене палыме лийме. «Этномирыш» миен шумеке, регистрацийым эртенна. Иленна пу юртышто. Икымше кечын участник-влаклан экскурсийым да тӱрлӧ национальный модыш-влакым эртареныт. Лагерь индеш шагат эр гыч кандаш шагат кас марте пашам ыштен. Тӱрлӧ темылан лекцийым колыштынна, мастер-класслаште лийынна. Кажне кастене этнодискотеке, квест модыш эртаралтын. Алексей йолташна гармоньым пеленже конден, а мый – тӱмырым. Садлан кажне кастене лагерьыште марий сем шоктен, марла куштымаш-мурымаш лийын. Мероприятийын кокымшо кечынже лекций деч ончыч, марий тувырым чиен, мурым муралтенна, кушталтенна, лагерьын участникше-влаклан марий кочкышым, кравец ден команмелнам, темленна. Марий калыкын тӱвыраже, пайремже-влак да йӱлаж дене палдаренна. Участник-влак коклаште марий калык чимарий верам кызытат куча манмылан ӱшанен кертын огытыл. А лагерьын пытартыш кечыжлан ӱдыр-рвезе-влак «кандырам» сайын кушташ тунемыныт. Ик арня пеш вашке, оҥайын, веселан эртен кайыш. Лагерь сай шарнымашым веле коден. Ме тӱрлӧ калык-влакын историйышт, тӱвырашт дене палыме лийынна. Пырля тыгай мероприятийыште участвоватлен, икоян улмынам ончыктенна».

Анатолий Звенигово район Юлъял селаште шочын-кушкын. Йошкар-Оласе Технологический колледжым «Радиоэлектронный аппаратурым технически обслуживатлымаш да олмыктымаш» специальность дене тунем пытарен. Кызыт А.Мартынов Юлъял тӱвыра пӧртым вуйлата. «Школ годсек тӱвыра аланыште «пӧрдам», манаш лиеш. Кажне пайремлан концертым ончыктенна. Тунам ик йочат ӧрдыжеш кодын огыл, чылан пырля мурымаш-куштымашым ямдыленна, изинек сценыште шкеннам кучаш тунемынна. Музык, марий сем изинек чонемлан лишыл да йӧратыме. Авам яндар йӱкан, пеш сылнын мура, а ачам гармонь дене шокта. Ачамын могырым кочамат гармоньым устан шоктен, а ковам балалайке дене шоктен мошта. Мый тӱмырым перкалаш йӧратем, кызыт гармонь дене шокташ тунемам.

Технологический колледжым тунем пытарымеке, кӱшыл образованийым МарГТУ-што (кызыт ПГТУ) налынам. «Радиосвязь, радиовещаний, телевидений» специальностьлан тунем лектынам. Студент годым телефоным ачалыме шотышто сервис рӱдерыште пашам ыштенам. А дипломым налмеке, шочмо селаш пӧртылынам. Тӱвыра пӧрт пеленысе «Юл сем» фольклор ансамбльыш кошташ тӱҥалынам. Тунам тӱвыра пӧртым Леонид Дмитриевич Ружьев вуйлатен. Кызыт ты пашам мый шуктем.

Клублан ялысе калык полшен шога. Нуно концертымат ончаш коштыт, тӱрлӧ мероприятийымат эртараш, ялыш толшо уна-влакымат вашлияш полшат. Тидлан нунылан пеш кугу таум каласем. Ансамбльышкына чолга ӱдырамаш-влак коштыт. Нуно концертымат шындат да пайрем мероприятий-влакым ямдылат. Тале гармонистна Леонид Дмитриевич Ружьев  деч посна ик репетицият огеш эрте. Тудак ансамбльым поген. Ансамбльна Советский район Кельмаксолаште, Медведево район Мишкансолаште, Волжский районысо икмыняр ялыште кок гана, шке районыштат концертым ончыктенна. Йошкар-Олаште Пеледыш пайрем годым выступатленна. 8 октябрьыште «Марий сем» касым эртарена. Тений Оршанке районысо Кугу Орша ялыште эртыше марий самырык тукым слетышто участвоватленам. Тушто Игорь Эштуков рвезе дене палыме лийынам. «Диалог культур» лагерьыш лачак тудо мыйым ӱжын», — манеш А.Мартынов.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: