"Рубрик деч посна", 2016 ий, Шыжа тылзын 14-ше кечыже

Марий команде Российыште кумшо

Статьян авторжо Татьяна Айтова

img_9198Тений 5-25 сентябрьыште Анапа олаште «Смена» йоча рӱдер пашам ыштен. Тушто «Президентские состязания» спортивно-оздоровительный фестивальын всероссийский этапше эртен. Ты таҥасымаште Пошкырт кундем Мишкан район Чорай ялысе Яныш Ялкайн лӱмеш марий гимназийын тунемшыже-влак кумшо верым налыныт.

Тыгай таҥасымашыш ты гимназийыште тунемше-влак тений нылымше гана миеныт. Йоча-влакым уста тренер-влак Сергей Михайлович ден Лариса Николаевна Мурзашевмыт ямдыленыт. Нуно физкультурым ятыр ий туныктат. Сергей Михайлович — спорт мастер, Россий Федераций общий образованийын сулло пашаеҥже.

Фестивальыште 6-шо, 7-ше, 8-ше класслаште тунемше-влак участвоватлен кертыт. Апрельыште Москваште шеревам эртарат. Тушто могай классым ойырен налме нерген каҥашат, вара школлаш увертарат. Кажне ийын тӱрлӧ классым налыт, садлан ончылгоч ямдылалт шогыман. Командыште ик классыште тунемше-влак гына лийын кертыт.

«Икымше гана «Смена» йоча рӱдерыш 2011 ийыште миенна, — каласкала Лариса Николаевна. — Тушко каяш манын, ондак регионышто сай результатым ончыктыман. Республикыште эн шуко очком погымекына, Анапыш каяш йӧн лектын. Спортивный многоборьеште тунам кумшо верым налынна. Чумыр налмаште,12 команде коклаште 10-шо верыш лектынна. Эше ик ий гыч шке вийнам угыч тергенна. Ындыжым спортивный многоборьеште икымше лийынна. Чыла команде коклаште 9-ше верым сеҥен налынна. Вес гана «Президентский состязанийыште» 2015 ийыште таҥасенна. Многоборьеште эн ончылно лийынна.

Кум ий 7-ше классыште тунемше-влакым намиен коштыктенна гын, тений 6-шо класс шке вийжым терген.  Региональный этапым эртыме деч вара чот ямдылалтынна. Июньышто, июльышто 3-4 шагат дене кече еда тренироватлалтынна.

Тений икшыве-влак спортын тӱрлӧ видыштыже чот тыршеныт, теорийыште поснак виян лийыныт. Моло ийын полуфиналыш логалынна гын, тений финалыш лектынна. Теорийым палымаште Юлия Ахметьянова ойыртемалтын. Многоборьеште сай результатым Анита Тимиркаева ончыктен. Тыгак чолга радамыште Георгий Галилов лийын. Уло вийым пыштыме арам эртен огыл, кумшо верыш лектынна. Тыгай сеҥымаш кажнын кумылжым нӧлтен. Ончыкшымат школнан чапшым кӱшнӧ кучаш шонена.

Тиде таҥасымашыш миен кошташ республик, район, школ, ача-ава, родо-тукым, спонсор-влак полшеныт. Нунылан кугу таум каласена».

Марий гимназийын тунемшыже ден тренерже-влакым меат саламлена, у сеҥымаш-влакым тыланена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: