"Улам мый Рве-зы-лык!" рубрик, 2016 ий, Шыжа тылзын 28-ше кечыже

Марий Элыште этнотуризм вияҥшаш

Статьян авторжо Анастасия Эманова

Тыге ойла Волжский район Нурсола ялын ӱдыржӧ Ирина Кузьмина. Тудо 26 сентябрь гыч 2 октябрь марте Калуга область Боровский районысо «Этномир» культурно-образовательный туристический рӱдерыште «Диалог культур» молодежный этнокультурный лагерьыште лийын. 

qquqvjajv_4Ирина 9-ше класс марте Упшер школышто тунемын, а вара — Памар школышто. Историйым, марий литературым йӧратен. ИКН дене районысо олимпиадыште участвоватлен. Школ деч вара ӱдыр ПГТУ-со социальный технологий факультетыш пурен. Кызыт Волгатехыште туризм направлений дене магистратурышто тунемеш. Ирина чолга. Университетыште эртаралтше тӱрлӧ мероприятийыште волонтер лийын. Тыгак форумлаште, фестивальлаште участвоватлен. «Магистратурыш куснымеке, мер пашалан жап огеш сите. Тений кеҥежым «Кравец» форумышто вожатый лийынам, а шукерте огыл «Диалог культур» лагерьыште участвоватленам. Диплом пашам Этнотуризм дене кылдалтын. Садлан лагерь мыланем пеш пайдалын да оҥайын эртен. Тушто мый да Марий Эл гыч ныл участник вес национальностян ӱдыр-рвезе-влаклан марий калыкна нерген каласкаленна, йӱлана, тӱвырана дене палдаренна. Марий кундем дене кылдалтше оҥай факт-влакым ойленна. Владимир область гыч ик ӱдыр республикышкына толын каяш кумылжо улмо нерген палдарен. Тудо «Небесные жены луговых мари» фильмым ончымо деч вара марий-влак нерген утларак палаш шона.  

Мыланем якут ӱдыр-влак моткоч келшышт. Пеш тыматле улыт. Мурымаш-куштымашышт оҥай. Ынде Саха республикым ужнем.

Российна мотор вершӧржӧ, калыкше-влак дене сымыстара. Кажне элын, кундемын шке историйышт уло. Тидым шотыш налын, этнотуризмым вияҥдаш лиеш. Мый Европысо эллаш ала-молан кайымем нигунам шуын огыл. Байкалым ужнем, Сибирьыште, Кавказыште лийнем.

Мемнан республикна пеш мотор. Но марий колоритым кызытсе илышыш утларак пуртыман, шонем. Мутлан, тувырым изирак марий тӱр дене сӧрастараш лиеш. Тыгайжым концерт годым веле огыл, а тыглай кечыште чияш лиеш», — ойла И.Кузьмина.

Ирина усталык шӱлышан, тудо ырес дене тӱрлен мошта. Сылнылык тӱням йӧратымаш ачаж деч куснен, очыни. Ачаже Михаил Кузьмин гитар дене шокта, шкеак мурым воза. Кок мурыжо шке жапыштыже Марий Эл радиошто чӱчкыдын йоҥген. Тиде «Пошкудо ӱдыр» (Александр Речкин мура) да «У ий» (Елена Афанасьева мура). Ирина лишыл жапыште шун гыч ненчаш тунемнеже, тидын шотышто мастер-классыш миен толнеже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: