"Айдеме да закон" рубрик, 2016 ий, Шыжа тылзын 28-ше кечыже

Ужар беретан-влак радамыш логалын

Статьян авторжо Светлана Кушакова

5 октябрьыште Россий Национальный гвардий войскан Софринысе бригадыжын тунемме рӱдерыштыже (Моско область) судлаште пеҥгыдемдыме порядкым эскерыше суд пристав-влак коклаште ужар беретым упшалаш правам налме шотышто таҥасымаш эртен. Тушко Россий суд пристав-влак федеральный службын верысе 23 управленийже гыч 47 суд пристав толын. Тылеч ончыч нуно чыланат шке кундемыштышт тале улмыштым ончыктеныт. Тыгай таҥасымаш 2011 ий годсек эртаралтеш.

1Ужар беретым упшалаш права верч арам огыл таҥасат. Берет патырлыкым да вийым, нелылыкым сеҥен моштымым, чапым да профессиональный мастарлыкым ончыкта.

Мемнан кундем гыч ужар берет верч ныл суд пристав таҥасен. Тушеч кокытынжо, Эдуард Глушков ден Вадим Чемеков, федеральный кӱкшытан таҥасымашке логалыныт. А Эдуард туштат чыла темлыме заданийым сайын шуктен. Ынде мемнан кундемыште тыгай беретым кум еҥ упшалеш: суд пристав-влак управленийын Советский районысо полкажын суд приставше Ю.Таныгин (2013 ийыште налын) да тыгак судлаште пеҥгыдемдыме порядкым эскерыше суд пристав-влакын специализированный пӧлкажым вуйлатышын алмаштышыже А.Шабердин. Тений тиде радамыш Эдуард Глушков ушнен.

Эдуард Шернур районысо Кугу Лужалу ялеш шочын. Школышто тунемме годым спорт деке шӱмаҥын. Армийыште лиймыж годым эшеат шуаралтын. А суд пристав-влак федеральный службын республикысе управленийышкыже 2005 ийыште толын. Тыште 11 ий пашам ышта.

2005 ийыште тыгаяк ноябрь ыле. Тунам кикбоксинг дене МВД-н чемпионатше эртен. Таҥасымаш годым суд пристав-влак управленийым вуйлатышын алмаштышыже Николай Александрович Кудряшов мыйым пашаш ӱжӧ. Ты жаплан лач паша деч посна шинченам. Садлан вигак кӧненам.

Ужар беретым нумалме верч таҥасымашке пытартыш кум ийыште веле ушненам. 2011, 2012 ийлаште тушко логалын кертын омыл. Россий чемпионатыште кок ий почела кидем пудыртенам. Мемнан пашаште везений манмат кугу верым налеш. Ужар берет куштылгын логалын огыл, кумшылан гына веле тудым упшалаш правам суленам. Претендент-влакат тале, виян лийыныт”, — ойла Э.Глушков.

Беретым сеҥен налаш физический подготовко дене нормативым шуктыман, лӱйкален моштымым ончыктыман, медицине полыш шотышто ятыр палыман. Финалыште Эдуард 10 меҥге кужытан марш-бросокым куржын. 50 минутышто тидым ыштен от шукто гын, умбакыже таҥасымаш гыч кораҥдат. Марш-бросок деч вара тӱрло чаракан полосам эртеныт, пистолет да автомат дене лӱйкаленыт. Пытартышлан оружий дене да оружий деч посна кучедалын моштымым онченыт. Спаррингыште беретан боец-влак ваштареш кредалаш логалын.

Ужар беретым налмем дене эн ончыч лу ияш паша лектышем иктешленам. Кажне боец, очыни, шке кӱкшытшым палышаш. А тыгай таҥасымаш лач тидым умылаш полша. Ӱмаште, мутлан, 10 меҥге кужытан марш-бросокым эртыме нормативым шуктен омыл. Садлан таҥасымаш деч вара, моҥго портылмеке, ты жапыш логалаш шканем цельым шынденам. Арняште кум гана лу меҥгым куржталаш тӱҥалынам. Управленият шке пашаеҥже-влаклан полша, ямдылалташ, кушкаш условийым ышта. Тидлан вуйлатыше А.Эммануилидилан, алмаштышыже Н.Кудряшовлан, оперативный дежурство шотышто специализированный пӧлкам вуйлатыше А.Ореховлан поснак тауштымо шуэш. Шындыме цельышкем шуынам. Ынде эргым-влакым ончен куштымылан утларак тӱткышым ойырем ”, — мутшым кошартыш Э.Глушков.

Тиде арнян шуматкечын Эдуард Глушковлан Москваште ужар беретым официально упшалтат, именной кинжалым кучыктат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: