"Ой, йӧратымаш..." рубрик, 2016 ий, Шыжа тылзын 7-ше кечыже

Уныкам ончынем

Статьян авторжо Татьяна Айтова

Эргымлан 27 ий. Пашаче, аракам ок йӱ, тамакым огеш шупш, но пешак вожылшо. Йӧратыме ӱдыржӧ уке. А жап эрта. Уныкам ончымем моткоч шуэш. Эргымлан ӱдырым кузе муаш?

Марина.

Волжский район.

Йодышлан Республикысе «Доверие» психологий да педагогике рӱдерын психологшо  М.Г.Емельянова вашешта:

- Ончычсо жап дене таҥастарымаште кызыт самырык-влак мужыраҥаш огыт вашке. Южыжо 30 ийым темымеке гына пелашан лияш кӱлмым шонаш тӱҥалыт.

Эн ончыч эргыдан кумылжым шотыш налаш кӱлеш. Тудо ешан лийнеже але уке? Уке гын, виеш ӱдырым кычалаш – арам паша.

Рвезе ешан лияш ямде гын, икмыняр каҥашым шотыш налза:

® Эн ондак могай ӱдырым кычалме нерген шоналтыза. Тудым кушто вашлийын кертыда, тушко чӱчкыдынрак коштса. Мутлан тӱвырам, сымыктышым йӧратыше таҥым мунеда гын, театрыш, музейыш, тоштерыш лекса.

® Йолташ-влак коклаштыда тӱткынрак ончалза. Ала шонымо ӱдырда воктенак. Тунам чолгарак, чулымрак лийза.

® Кызыт интернет йӧн дене палыме лияш куштылго. Но тыгодым тӱткӧ лийза.

® Тора родо-влак деке унала миен толза. У верыште у палыме-влак эре лектыт.

® Хоббим муза. Иктаж кружокыш, секцийыш возалтса. Ала лач тушто чонлан келшыше ӱдырым вашлийыда.

Йӧн моткоч шуко, лач верыште шинчыман огыл. Вожылмым сеҥен, ончыко каяш кӱлеш.

А ава ден ача-влаклан иктым гына каласыме шуэш: кажне ӱдырым ончыкылык шешке семын ида акле. Эргыланда ӱшаныза. Уто темлымаш, ой-каҥаш дене чӱчкыдын ида шӱшкылт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: