"Олимп" рубрик, 2016 ий, Шыжа тылзын 28-ше кечыже

У деч у кӱкшытыш шуаш тырша

Статьян авторжо Татьяна Айтова

Морко район Арsyugusvo2-mын селан шочшыжо Раисия Иванова – куштылго атлетике дене Российын чемпионкыжо, спорт мастер.
Ӱдыр Чебоксар олаште шым ий наре ила.

«Индешымше класс марте Арын школышто тунемынам, — каласкала Раисия. – Физкультурым тушто Валериян Васильевич Романов туныктен. Тудо мыйын усталыкем эн ондак ужын, кушкашем полшен. Урок деч вара тренировкыш чӱчкыдын коден. А мый тудо жапыште медицинский институтыш тунемаш каяш шоненам, садлан тренировко гыч чӱчкыдын шылын куржынам. Икана Алина акам мылам Чебоксарыш Олимпийский резерв училищыш тунемаш каяш темлен. Талантет уло, тудым умбакыжат шуараш кӱлеш манын. Авам ден ачам акамын шомакше дене келшеныт. Тыге мый Чебоксарыш тунемаш каенам. Вич ий жап пеш вашке эртыш. Кок ий ончыч тренер-преподаватель специальность дене дипломым нальым. Тылеч вара Озаҥ оласе физический культур, спорт да туризм академийыш тунемаш пурышым».
Раисия тӱрлº таҥа-сымаште шке вийжым эре терга. 2012 ийыште Пенза олаште куштылго атлетике дене Российын первенствыштыже икымше верым сеҥен налын. 2014 ийыште Чебоксар олаште эртыше таҥасымаште кокымшо верыш лектын. 2015 ийыште Саранск олаште эртыше куштылго атлетике дене Российын первенствыштыже кумшо верым налын.
«Озаҥ олаште тӱнямбал универсиадыште вич меҥгым куржмаште икымше лийынам, — каласкала Иванова. – Тиде — эн кугу сеҥымашем. Ешем тидлан моткоч куанен. Школышто тунеммыж годым авамат спорт дене кылым кучен. Ачам ден авам шым икшывым ончен куштат. Мый кокымшо улам, садлан кажне сеҥымашем — шольо ден шӱжар-влаклан пример».
Чолга спортсменке кызыт Озаҥ олаште тунемеш, но Чебоксар олаште тренироватлалтеш. Садлан чӱчкыдын ик вер гыч вес верыш кудалыштеш. Тылеч посна спортивный сборлашке коштеш. Тудым Алексей Геннадьевич Прокопьев шым ий наре тренироватла. Тудын вуйлатымыж почеш Раисия спорт мастер лӱмым сулен налын.
«Тренировкылан ик кечыште ныл шагатым ойырем. Куржталме деч посна бассейныште ик шагат наре заниматлем, — ойла Раисия. — Тунемаш да тунамак тренировкыш кошташ куштылгыжак огыл, но чыла пашамат шот дене ышташ шонем. Кажне гана у деч у кӱкшытыш шуаш тыршем, тидлан жап ден вийым ом чамане. Ончыкшым тренер лийнем. Йоча-шамыч дене пашам ышташ келша».

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: