"Олимп" рубрик, 2016 ий, Шыжа тылзын 28-ше кечыже

Эрвелмарий рвезе — Российын чемпионжо

Статьян авторжо Татьяна Айтова

%d0%b4%d0%b5%d0%bd%d0%b8%d1%81-%d0%b2%d0%b0%d0%bb%d0%b8%d1%82%d0%be%d0%b2Октябрь тӱҥалтышыште Оренбург областьыште куштылго атлетике дене Российын чемпионатше эртен. Тушко тӱрлº кундем гыч 200 утла спортсмен чумырген. Чемпион лӱмым латиндеш ияш марий рвезе Денис Валитов (снимкыште покшелне) сулен налын.

Денис Пошкырт кундем Мишкан район Измар ялыште шочын-кушкын. Кызыт Москосо Олимпийский резерв училищыште тренерлан тунемеш. Шукерте огыл Денис дене мутланышна.
- Москваш тунемаш каяш кумыл кузе лектын?
- Токтар школышто шымше классыште тунемме годым кроссыш кайышым. Районышто икымше верым нальым. Тунам ик рвезе тренер Юрий Байгузинович Айгузин дене палымым ыштыш. Тудо мыйым шке группышкыжо нале, тренироватлаш тӱҥале. Эше кок ий гыч Пошкырт кундемысе чемпионатыште икымше верым нальым, да Российысе чемпионатыш колтышт. Туштат чылаштым ончылтышым. Куржмем Москосо тренер Надежда Сергеевна Логинова эскерен улмаш. Тудо мыйым Москош Олимпийский резерв школыш тунемаш ӱжº. Тыге 2013 ийыште 9 класс деч вара тышке тунемаш пурышым. Экзамен-влак утыжым неле лийын огытыл. Математике ден руш йылмым школышто йºратен тунемынам, садлан кертынам. Тылеч посна Российысе таҥасымашлаште участвоватлымым да сеҥен налме верым шотыш налыныт. Тыште 10-шо ден 11-ше классым тунем пытарышым. 2015 ийыште Москосо Олимпийский резерв училищыш тунемаш колтышт. Вигак кокымшо курсыш кусарышт. Теве ынде ик ий наре тыште тунемам.
- Студент илыш могайрак?
- Тунемаш чыла йӧн уло. Илаш тӱшкагудышто верым пуат, кечеш кум гана яра пукшат. Тунемме деч посна кечеш кок гана тренировкыш коштына. Икымше тренировко 10 шагатлан тӱҥалеш. Тудо кок шагат шуйна. Кечывал кочкыш деч вара тунемаш каена. Кокымшо тренировко вич шагат кастене тӱҥалеш да ик шагат шуйна.
Кажне тылзын 1217 теҥге стипендийым пуат. Южгунам спорт школ ешарен тӱла. Москошто илыш шерге, но илен моштет гын, чыла вереат йºным муаш лиеш.
Жап моткоч шагал, распорядкым шукташ кӱлеш. Южгунам йолташ-влак дене пырля кином ончаш миен толына гын – кугу куан. Тыште шке кундемысе Корак ял гыч Евгений Валитов, Соказа гыч Марсель Кутлусаманов тунемыт. Пырляште улмо годым моткоч весела.
- Шочмо сурт, еш деч посна тора велыште илаш куштылгыжак огыл?
- Мый ешыште кугурак йоча улам. Дима ден Максим шольым-влак школышто тунемыт. Шукерте огыл ачам колен колтыш, садлан авам мемнам йолӱмбаке шкет шогалта, суртсомыл паша чыла тудын ӱмбалне. Лишыл еҥем-влакым кертмем семын куандараш тыршем. Кеҥежым июль ден августышто шочмо верыш каникуллан миен тольым.
- Могай таҥасымаш-влак шарнымашеш поснак кодыныт?
- Кертме семын шке вийым тӱрлº таҥасымаште тергем. Теве тений кеҥежым Озаҥ олаште юниор-влакын куштылго атлетике дене первенствыштышт участвоватлышым. Кок тӱрлº дистанцийым куржмаште кумшо верым нальым. А Оренбургышто эшеат кугу чемпионат лийын. 1997-1998 ийлаште шочшо рвезе-влак коклаште куд километран дистанцийым 20 минут жапыште куржым да чемпион лӱмым сеҥен нальым. Таҥасымашын генеральный партнержо «Армада» компаний окса сертификатым кучыктыш. Ик ужашыжым шканем кодышым, весыжым мºҥгº колтышым. Российын сулло тренерже Ю.С.Кукановлан тауштем. Тудо у деч у сеҥымашыш шуаш полша.
Умбакыжым Денис Валитов кӱшыл образованийым налаш шона. Тыгай чолга марий рвезе дене шочмо Пошкырт кундемже веле огыл, меат кугешнена, эшеат кугу сеҥымашым тыланена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: