"Рубрик деч посна", 2016 ий, Кылме тылзын 24-ше кечыже

“Ах, гармонь” конкурс шӱм-чоным тарватен

Статьян авторжо Татьяна Иванова

18 ноябрьыште “Кугарня” газет редакций Морко район Волаксола школышто верысе ял шотан илемыште илыше гармонист-влак коклаште “Ах, гармонь” конкурсым эртарен. dsc_0041
Тыгак ты пайрем уста семмастар Александр Пчёлкиным шарныме лӱмеш пӧлеклалтын. Александр Павловичын Татьяна ӱдыржӧ — “Кугарня” газетын корреспондентше, а Сергей эргыже — Марий Эл Кугыжаныш куштышо да мурышо “Марий Эл” ансамбльын оркестржым вуйлатыше, кундемыштына уста музыкант семын палыме. Ешыште аралалтше йӱлам умбакыже шуяш манын, шочмо верыштышт семмастар-влакым чумыреныт.
Мероприятийым эртараш Волаксола ял шотан илемым вуйлатыше Владимир Иванович Михайлов да школ директор Владимир Валерьянович Николаев кумылын полшеныт.
Чынак, ял дене кылым шочмо сурт, пошкудо да родо-тукым ыштенак шогат. Тушто шӱлышак весе — чонлан ласка, кумыллан сай. Ача-авана илат гын, мӧҥгӧ чон эреак шупшеш, пеленна уке улмо годым чонлан йӧсӧ. Туге гынат шарнымаш тачат ила.image
Конкурсын шонымашыже тыгай лийын: калык семӱзгар дене шоктен моштышым муаш, кушкын толшо тукымлан семӱзгар дене палдараш. Ялыште гармонь сем йоҥгалтше, марий йӱла пӧртылжӧ да тудым арален кодымаште верысе калык тыршыже манын ышталтын.
Ӱжмӧ чыла участник толын кертын огыл гынат, чолга гармонист-влак калык кумылым кӱш нӧлтеныт. Таҥасымашке Чодырасола гыч Игорь Гаврилов (1 вер дене палемдалтын), Волаксолаште илыше Вячеслав Казаков (Смычке ялын шочшыжо, 2 верым сеҥен налын), Радик Логинов (кумылаҥдыше призым пуэныт) да Александр Акулов (Советский район гыч Волаксолаште суртым налын, ешыж дене ила, кумшо верым сеҥен налын) ушненыт. Тыгак конкурсым сӧрастараш Тыгыде Морко ял гыч семмастар да тусо клубым вуйлатыше Вениамин Николаев дене пырля “Йорга каче-влак” ансамбль толыныт.
Кеч-кудо гармоньчо шокташ веле тӱҥалын, ончаш толшо-влак рӱж кушташ лектыныт. Тошто годсо мурым тӱшкан муреныт. Шижалтеш, тыгай касым шукертсек вученыт.
Александр Пчёлкин жапше годым клубышто хорым чумырен, колхоз пашам ыштыше-влак дене концертым шынденыт. Шоферлан пашам ыштымыж годым машина кабиныштыже эре гармонь, шиялтыш коштыныт. Пасушто, кечывал кочкыш годым механизатор-влаклан мурым шоктен, кумылыштым куандарен. Школыштат тунемше-влакым концертлан ямдылен. Туддеч посна ик сӱанат эртен огыл. Ӱмыржӧ кӱчык лийын, шуко поро шонымашыже шукталтде кодын. “Вес ийын, ыгай конкурсым Александр Пчёлкинын 70 ияш шочмо кечыже вашеш эртарен колташ ямде улына. Ялыште тыгай пайрем нигунам лийын огыл, садлан тудым йӱлашке пурташ кӱлеш. Вет музыкант шӱвыр, тӱмыр, шиялтыш, кларнет, баян, гармонь, аккордеон да моло семӱзгар денат шоктен моштен, кундемыштына моткоч пагалыме еҥ лийын. Ончыкшым нине семӱзгар дене шоктен моштышо-влакымат вучена ”, — палемдыш Волаксола ял шотан илемым вуйлатыше Владимир Михайлов.
Конкурсыш толшо кажне гармонист мастарлыкшым ончыктен, кузе шокташ тунеммыж нерген каласкален.“Мыйым Саня изай шокташ кумылаҥден да туныктен. Пытартыш жапыште кидыш гармоньым шуэнрак налынам, изишак аптыранымаш койышем лектын, конкурс деч вара пуйто чонем ылыже” , — ойлыш Радик Логинов. Вес гармонист Вячеслав Казаков гармоньым шоктымо годым ик сюрпризым ыштыш. Оҥжо гыч Александр Пчёлкинын шиялтышыжым лукто да тыге палдарыш: “Саня изайын ӱмыржӧ кӱрылтмек, Сергей эргыже мыйым вӱд воктеке мияш ӱжӧ да ачамын шиялтышыжым тылат пӧлеклем, шокто, мане. Шинчаончылнем тачат ты сӱрет, тыгай шергакан ӱзгарым кидыш кучаш ӧрым, Сергейын ачажым йӧратымыже кумылем нале. Ты шиялтышым ынде латшым ий шоктем”.
Гармонь сем почеш мурым Елена Николаева муралтыш, тудо мурымыж дене икымше верым сеҥен нале.
Школышто тунемше-влак Юзо гармонь” конкурсышко ушненыт, сӱретым сӱретлен конденыт. Игорь Гавриловын шоктымыжым ончет да пуйто гармонь кидыштыже модеш. “Вес ийын Эльбрус курыкыш кӱзен, гармоньым шокташ шонем. Туризмым пагалем, курыкыш кӱзымӧ спорт дене кылым кучем, ӱшанем, 60 ияш лӱмгечем вашеш Российын гимнже да марий муро курык вуй гыч йоҥгалтеш. Тыгай конкурсым организоватлыше-влаклан, Александр Пчёлкинын шочшыштлан кугу таум каласем”, — мане гармоньчо.
Александр Акулов конкурслан Советский вел такмак ден муро-влакым ямдылен ыле. Тымарте тудын шоктен моштымыж нерген ялыште иктат пален огыл. Пеш керте.
Пайремын кажне участникше пӧлек дене палемдалтын. Пайремыш толшо кажне еҥлан кугу таум каласена.
Тыгай мероприятийым “Кугарня” газет редакций моло кундемыштат, ял шотан илемыште эртараш шона. Вет кажне семмастар кугу сценыш лектын ок керт, а тудын усталыкше ынже йом да шоктен моштымыжым моло еҥат палыже манын, поро паша ышталтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: