"Сылнымут алан" рубрик, 2016 ий, Кылме тылзын 25-ше кечыже

Гармонь сем чонжым луштара

Статьян авторжо Анастасия Эманова

Параньга район Марий Сеснур ялын шочшыжо Алевтина Чиркова дене ик ий ончыч палыме лийынам. Уста ӱдыр поро шинчаончалтышыже, шыман мутланымыж дене сымыстара. Аля почеламутым возкала. Сылнымут пашаже шуко огыл гынат, кажныже келге шонымашан да оҥай.

%d1%87%d0%b8%d1%80%d0%ba%d0%be%d0%b2%d0%b01А.Чиркова Йошкар-Оласе И.С.Палантай лӱмеш тӱвыра да сымыктыш колледжысе «Калык семӱзгар творчестве» пӧлкам тунем пытарен. «Лу ияшак гармонь дене шокташ тунемынам. Ачам Герантий Максимович – уста гармонист. Но пример мыланем кокам лийын. Ачамын Рая акаже гармоньым шокталта гын, мыланем пуйто жап чарнен шогалеш. Лачак тудым ончен, мыят гармонист лияш шоненам. Садлан Кугу Пумарий школым тунем пытарымеке, Йошкар-Оласе колледжыш каенам», - ойла Алевтина.

Самырык гармоньчо шукерте огыл самодеятельный коллектив-влакын «Таланты Параньгинского района» смотрыштышт участвоватлен. «Альянск» группышто шоктен да мурен. «Конкурсышто икымше гана мастарлыкем тергенам. Тушко Кугу Пумарий ялын палыме гармонистше Михаил Веселов ӱжын. Тидлан мый моткоч куаненам, пуйто шулдырем кушкын, умбакыже, творческий тошкалтышым тошкалын, кӱшкӧ «кӱзаш» шонем, — манеш Чиркова. – Каласынем, гармоньым эргымат шокта. Тудо Параньга поселкышто музыкальный школым гармонь класс дене тунем пытарен».

Алян почеламутшо-влак йӧратымаш нерген улыт. «Икымше почеламутем чон «шортмо» годым шочын. Стих-влакым шуэн возем. Айда-лийже шинчын, почеламут огеш шоч. Ончыкшым мурымат возаш шонымаш уло, но кызытеш але тидлан кушкын шуын омыл»,- ойла тудо.

***

Ачай-авай, ул(ы)да мемнан эҥертыш,
Мемнан ӱшан да волгыдо тӱня.
Те пар олма гай ваш-ваш икте-весым
Чон пеленда ашналза лач пырля.

Лай кумылдажым икте ынже волто.
Пырля тошкалын ончык ошкылаш!
Ош Кугу Юмо, эреак полшен шого
Осал деч мемнан ешым аралаш.

Те мыланна улыда тугае лишыл,
Тыгай чечен кок шӧртньӧ падыраш.
Умбакыжат ваш умылен да вычыл-вычыл,
Ваш пагален да йӧратен илаш.

Авай-ачай, ме тыланда ты мурым
Чонна гыч лекше йӱк ден мурена.
Кидпӱанна гыч чыланат кучалын,
Пиал капкам вончалын коштына.

***

 Молан йӧратымаш чонем туржеш тынаре?

Молан ушем гыч от лек тый, йӧратымем?
Кузе чонлан умылтараш ом пале -
Мый кызытат вет уло чон дене тыйым йӧратем.

Малаш возам, но йӱд мучко ом мале.
Кунар шинчавӱд ден мый кӱпчыкым нӧртем.
Мый шкат палем, лач тый гына от пале -
Мый кызытат вет уло чон дене тыйым йӧратем.

Иктаж-кунам тый умылет, чыталте,
От керт тый вес айдемым йӧратен.
Вараш кодат да каласет: Вучалте,
Мый кызытат вет уло чон дене тыйым йӧратем!

Мый ом шогал тунам, кузе ыштет тый кызыт.
Мом шонкалаш, вет шуко жап эртен.
Шинчавӱдем кучен, мый шоналтем шке семын:
Мый кызытат вет уло чон дене тыйым йӧратем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: